នៅលើទីផ្សារស្មាតហ្វូននាពេលបច្ចុប្បន្នមានម៉ាកសញ្ញាស្មាតហ្វូនជាច្រើនកំពុងតែចរាចរណ៍លក់លើទីផ្សារ ប៉ុន្តែម៉ាកសញ្ញាដែលមានភាពល្បីល្បាញខ្លាំងជាងគេបំផុតនោះគឺមាន Samsung, iPhone, Huawei, Sony និង LG ជាដើម។ ដោយឡែកបើយើងក្រឡេកទៅមើលក្នុងឧស្សាហកម្មផលិតស្មាតហ្វូនដែលមានក្រុមហ៊ុនផលិត និងម៉ាកសញ្ញាច្រើនជាគេបំផុតក្នុងពិភពលោក គឺមានតែប្រទេសចិនតែប៉ុណ្ណោះ ហើយសូម្បីតែ iPhone របស់ Apple ក៏ផលិតដោយក្រុមហ៊ុនរបស់ប្រទេសនេះដែរ។ Gionee គឺជាក្រុមហ៊ុនមានឈ្មោះបោះសំឡេងគ្រាន់បើដែរក្នុងវិស័យផលិតស្មាតហ្វូនក្នុងប្រទេសចិន ប៉ុន្តែសម្រាប់ទីផ្សារអន្តរជាតិវិញក្រុមហ៊ុនមួយនេះហាក់មិនទាន់ទទួលបានប្រជាប្រិយភាពខ្លាំងប៉ុន្មានទេ។
ថ្មីៗនេះ ក្រុមហ៊ុនមួយនេះ បានធ្វើការប្រកាសចេញស្មាតហ្វូនជំនាន់ថ្មីរបស់ខ្លួនម៉ូដែល Gionee P7 ដែលមានតម្លៃធូរថ្លៃបំផុតប្រមាណតែ $150 ប៉ុណ្ណោះ។ ស្មាតហ្វូនស៊េរីថ្មីនេះគឺជាប្អូនរបស់ Gionee P7 Max ដែលបានប្រកាសចេញកាលពីខែមុន និងបានប្រកាសចេញលក់ក្នុងទីផ្សារប្រទេសឥណ្ឌារួចហើយដែរ។ Gionee P7 ត្រូវបានក្រុមហ៊ុនធ្វើការពង្រួមទំហំខ្លួនពី P7 Max មកនៅត្រឹមកញ្ចក់អេក្រង់ទំហំ 5.0” ប្រភេទ IPS LCD ដែលមានសមត្ថភាពបង្ហាញរូបភាពបានកម្រិត HD ឬ 720x1290 ភិចសែល។ ស្មាតហ្វូនមួយនេះដើរលើអង្គគណនាចំនួនបួនគ្រាប់មានល្បឿន 1.3GHz ជាមួយរ៉េមទំហំ 2GB, ប្រើប្រតិបត្តិការ Android Marshmallow v6.0 ស្រោបដោយអ៊ីនធើហ្វេស Amigo 3.2 និងមានទំហំម៉េមូរីក្នុងម៉ាស៊ីនស្រាប់ 16GB ព្រមទាំងអាចបន្ថែមទំហំបាន 256GB។
សម្រាប់កាមេរ៉ាថតរូបវិញគឺខាងក្រោយមានទំហំ 8.0MP ជាមួយភ្លើងហ្វាស់ LED មួយគ្រាប់ និងកាមេរ៉ាខាងមុខទំហំ 5.0MP។ Gionee P7 មានថ្មជាប់តួរកំលាំង 2,300mAh, ប្រើប្រាស់ស៊ីមកាត 4G បានពីរទ្រទ្រង់ដោយបច្ចេកវិទ្យា VoLTE និងប្លូធូស 4.0 ។ ទូរស័ព្ទស៊េរីថ្មីមួយនេះត្រូវបានក្រុមហ៊ុនប្រកាសចេញលក់ជាផ្លូវការណ៍ហើយដែរនៅក្នុងទីផ្សារប្រទេសឥណ្ឌាដែលមានដាក់លក់តាមរយះអនឡាញ និងនៅហាង Brick និង Mortar Store ជាមួយតម្លៃប្រមាណ 9999 រ៉ូពី ឬប្រហែល 150 ដុល្លារជាមួយជម្រើសបីពណ៌គឺ ស ទឹកមាស និងប្រផេះ៕
