ក្រុមហ៊ុន Samsung បានបំពាក់នូវប៊ូតុង Home នៅលើរូបរាងរបស់ទូរស័ព្ទស្មាតហ្វូននេះជាយូរមកហើយ ប៉ុន្តែរបាយការណ៍ថ្មីជាច្រើនបានបញ្ជាក់ថា នៅទីបញ្ចប់ក្រុមហ៊ុននឹងធ្វើការដកចេញនូវប៊ូតុង Home ចេញពីទូរស័ព្ទថ្មី Galaxy S8 ។ បន្ថែមពីនេះទៀត ទូរស័ព្ទនោះនឹងភ្ជាប់អេក្រង់គ្របដណ្តប់នៅលើផ្នែកខាងមុខទាំងស្រុងដោយគ្មានប៊ូតុង Home និងគែមព័ទ្ធជុំវិញអេក្រង់នោះទេ។
សម្រាប់ប៊ូតុងបញ្ជាស្ថិតនៅផ្នែកខាងក្រោមគឺជាប្រភេទនិម្មិត ហើយប្រហែលជាប្រើប្រាស់នូវប្រព័ន្ធស្កែនក្រយ៉ៅដៃ ultrasonic របស់ក្រុមហ៊ុន Qualcomm ដែលដាក់នៅក្រោមកញ្ចក់អេក្រង់តែម្តង (ក្រុមហ៊ុន Xiaomi បានប្រើបច្ចេកវិទ្យានេះនៅលើទូរស័ព្ទ Mi 5S និង Mi MIX) ។
អេក្រង់របស់ទូរស័ព្ទនេះនឹងនៅតែជាប្រភេទ Super AMOLED ដដែល ប៉ុន្តែវាត្រូវបានគេរាយការណ៍ថានឹងធ្វើការកំណែទម្រង់ PenTile ទៅជាប្រភេទ RGB Matrix វិញ។ យើងគួរតែអាចមើលឃើញនូវអេក្រង់កោងដដែលសម្រាប់ជំនាន់នេះនៅក្នុងទំហំអេក្រង់ 5.1 អ៊ីង និង 5.5 អ៊ីង(ហើយប្រហែលជាអេក្រង់អាចធំជាងនេះ?) ។
ប្រភពព័ត៌មាននេះអះអាងថា ក្រុមហ៊ុន Samsung មានបំណងក្នុងការប្រកាសនូវទូរស័ព្ទ Galaxy S8 នៅក្នុងខែមីនា ប៉ុន្តែបើពិនិត្យតាមការធ្វើតេស្តដូចអ្វីបានគ្រោងទុក នោះការប្រកាសអាចនឹងបង្ហាញនៅក្នុងខែមេសា។ អ្នកវិភាគម្នាក់នៅក្រុមហ៊ុន HMC Investment Securities បានចង្អុលបង្ហាញថា “សុវត្ថិភាពនៃទូរស័ព្ទនេះគឺពិតជាសំខាន់ជាងការច្នៃប្រឌិតទៅលើផ្នែករឹងទៀត”។
តាមរបាយការណ៍នេះ កាមេរ៉ាភ្លោះប្រហែលជាត្រូវបោះបង់ចោល។ ផ្ទុយទៅវិញ ក្រុមហ៊ុន Samsung អាចផ្តោតលើការធ្វើឱ្យទៅលើផ្នែក Software ជាមួយនឹងការបង្កើតនូវប្រព័ន្ធជំនួយការឆ្លាតវៃដែលបង្កើតឡើងដោយ Labs Viv (ស្ថាបនិកដែលផលិតនូវកម្មវិធី Siri) ។
ជាក់ស្តែង វានៅមិនទាន់មានការបញ្ជាក់ណាមួយដោយក្រុមហ៊ុន Samsung នោះទេ ប៉ុន្តែក្រុមហ៊ុននេះកំពុងប្រឈមមុខនឹងការប្រកួតប្រជែងខ្លាំង។ ពាក្យចចាមអារ៉ាមបានបញ្ជាក់ថាក្រុមហ៊ុន Apple ចង់ផ្លាស់ប្ដូរទៅជាអេក្រង់ OLED វិញ។ ក្រុមហ៊ុន Xiaomi បានចាប់ផ្តើមប្រកាសបង្ហាញនូវទូរស័ព្ទ Mi MIX ដែលមានគែមព័ទ្ធជុំវិញអេក្រង់កាន់តែស្តើងនៅលើទីផ្សាររួចមកហើយផងដែរ៕
