រូបភាព​របស់​ Galaxy​ A5​ (2017)​ ត្រូវ​បាន​បែកធ្លាយ​កាន់តែ​ច្បាស់​ជាមួយនឹង​លក្ខណៈសម្បត្តិ​ដ៏​ទាក់ទាញ​!

ចុះផ្សាយថ្ងៃទី 27 ខែ 12 ឆ្នាំ 2016 | ម៉ោង 10:53 am

មាននៅក្នុង ព័ត៌មានក្រៅប្រទេស

​កាលពី​ក្នុង​ខែវិច្ឆិកា​ ពិភព​អេ​ឡិច​ត្រូ​និក​ ធ្លាប់​បាន​ប្រាប់​លោក​អ្នក​មក​ហើយ​ថា​ ទូរស័ព្ទ​ស្មា​ត​ហ្វូ​ន​ Samsung​ Galaxy​ A5​ (2017)​ នឹង​ធ្វើការ​ប្រកាស​បង្ហាញខ្លួន​ជាមួយនឹង​ 4​ ពណ៌​ដ៏​ស្រស់​ស្អាត​សម្រាប់​ធ្វើការ​ជ្រើសរើស​គឺ​ពណ៌​ខ្មៅ​ ពណ៌​មាស​ ពណ៌​ផ្កាឈូក​ និង​ពណ៌​ខៀវ​។​ នៅ​ព្រឹក​នេះ​វិញ​ រូបភាព​របស់​ទូរស័ព្ទ​នេះ​ ត្រូវ​បាន​គេ​យក​មក​ផ្សព្វផ្សាយ​បែកធ្លាយ​ពាសពេញ​អ៊ី​ន​ធើ​ណិ​ត​។​ ក្រៅពី​រូបរាង​របស់​ទូរស័ព្ទ​មួយ​នេះ​ លក្ខណៈសម្បត្តិ​របស់​ទូរស័ព្ទ​នេះ​ ក៏​ត្រូវ​បាន​បែកធ្លាយ​ផង​ដែរ​។​ បើ​យោង​តាម​ប្រភព​ជា​ច្រើន​នៃ​រូបភាព​ទាំងនេះ​ បាន​បង្ហាញ​ថា​ ទូរស័ព្ទ​ Galaxy​ A5​ (2017)​ នឹង​បំពាក់​នូវ​អេ​ក្រង់​ទំហំ​ 5.2​ អ៊ី​ង​ដែល​មាន​កម្រិត​ភាព​ច្បាស់​ 1080​ x​ 1920​ ភិ​ច​សែ​ល​។​

 

​សម្រាប់​លក្ខណៈសម្បត្តិ​ផ្សេង​ទៀត​របស់​ទូរស័ព្ទ​នេះ​ ត្រូវ​បាន​គេ​ដឹង​ថា​ នឹង​បំពាក់​នូវ​បន្ទះ​ឈី​ប​ប្រភេទ​ Exynos​ 7880​ SoC​ ជាមួយនឹង​ CPU​ ចំនួន​ 8​ គ្រាប់​ដែល​មាន​ល្បឿន​ 1.8GHz​ ក្រាហ្វិក​កាត​ GPU​ ប្រភេទ​ Mali-T860​ MP4​ រ៉េ​ម​ផ្ទុក​ទិន្នន័យ​បណ្តោះអាសន្ន​ទំហំ​ 3GB​ ជាមួយនឹង​ម៉េ​មូ​រី​ក្នុង​ម៉ាស៊ីន​ទំហំ​ 32GB​ ។​ កាមេរ៉ា​ផ្នែក​ខាង​មុខ​ និង​ផ្នែក​ខាងក្រោយ​របស់​ទូរស័ព្ទ​នេះ​មាន​ទំហំ​ 16​ មេ​ហ្គា​ភិ​ច​សែ​ល​ និង​ថ្ម​ដែល​មាន​កម្លាំង​ថាមពល​ 3000mAh​ ហើយ​វា​ធ្វើការ​តម្លើង​នូវ​ប្រព័ន្ធ​ប្រតិបត្តិការ​ Android​ 6.0​ រួច​ជា​ស្រេច​។​

 

Samsung​ Galaxy​ A5​ (2017)​ នឹង​មាន​កម្រាស់​ 7.8​ ម​ម​ ហើយ​វា​ថែម​ទាំង​ប្រើប្រាស់​នូវ​រន្ធ​ផត​ USB​ Type-C​ ។​ កាលពី​ដើមខែ​នេះ​ វី​ដេ​អូ​នៃ​ទូរស័ព្ទ​នេះ​ត្រូវ​បាន​រក​ឃើញ​នៅ​លើ​បណ្តាញ​ YouTube​ ប៉ុន្តែ​ពេល​នេះ​វា​ត្រូវ​បាន​យក​ចេញ​បាត់​វិញ​ហើយ​។​ ប្រព័ន្ធ​ស្កែ​ន​ក្រ​យ៉ៅ​ដៃ​ត្រូវ​បាន​ដាក់​បញ្ចូល​នៅ​លើ​ប៊ូ​តុង​ Home​ ហើយ​យើង​ប្រហែលជា​អាច​ឃើញ​នូវ​មុខងារ​ IP68​ ថែម​ទៀត​ផង​ វា​មាន​ន័យ​ថា​ទូរស័ព្ទ​នេះ​អាច​ស្ថិត​នៅ​ក្រោម​ទឹកបាន​កម្ពស់​ជិត​ 10​ ហ្វី​ត​រយៈពេល​ 30​ នាទី​ដោយ​គ្មាន​បញ្ហា​នោះ​ទេ​។​

 

​យើង​អាច​មើលឃើញ​ទូរស័ព្ទ​នេះ​នឹង​ធ្វើការ​ប្រកាស​បង្ហាញ​នៅ​ក្នុង​ព្រឹត្តិការណ៍​តាំង​ពិ​ពរ​ណ៍​ CES​ នៅ​ខែ​ក្រោយ​នេះ​នៅ​ក្នុង​ទីក្រុង​ Las​ Vegas​ ជាមួយនឹង​វត្តមាន​របស់​ទូរស័ព្ទ​ Samsung​ Galaxy​ A3​ (2017)​ និង​ Samsung​ Galaxy​ A7​ (2017)​ ផង​ដែរ​៕

 

 

© 2015 Electronic World Magazine (Cambodia). All rights reserved.

Follow Us