ទូរស័ព្ទ iPhone 8 ស៊េរីថ្មីរបស់ក្រុមហ៊ុន Apple ត្រូវបានគេចាត់ទុកថាជាទូរស័ព្ទដែលមនុស្សគ្រប់គ្នាកំពុងតែទន្ទឹងរង់ចាំមើលច្រើនជាងគេបំផុតនៅក្នុងឆ្នាំ 2017 ខាងមុខនេះ ជាពិសេសវាក៏ជាខួបអនុស្សាវរីយ៍លើកទី 10 នៃក្រុមហ៊ុន Apple ហើយក្រុមហ៊ុនមួយនេះ ត្រូវបានគេរំពឹងថា នឹងដាក់បង្ហាញនូវផលិតផលបច្ចេកវិទ្យាដែលមានលក្ខណៈពិសេសទាក់ទាញបំផុតដែលបំពាក់នូវលក្ខណៈសម្បត្តិយ៉ាងអស្ចារ្យជាច្រើន។ ខណៈពេលនេះ លក្ខណៈសម្បត្តិរបស់វា នៅមិនទាន់បានបែកធ្លាយចេញមកក្រៅនៅឡើយទេ ពាក្យចចាមអារ៉ាមជាច្រើននៅតែបន្តផ្សព្វផ្សាយជុំវិញទូរស័ព្ទ iPhone 8 (ឬ iPhone 7s - ឈ្មោះនេះ នៅមិនទាន់បានបង្ហើបប្រាប់ឱ្យដឹងតាមរយៈក្រុមហ៊ុន Apple នោះទេ)។ យ៉ាងណាមិញ យើងនៅមិនទាន់ដឹងថា អំពីលក្ខណៈសម្បត្តិរបស់ទូរស័ព្ទ iPhone 8 នៅឡើយទេ គ្រាន់តែយើងដឹងថា វាពិតជាអស្ចារ្យ និងទាក់ទាញបំផុត។
ខាងក្រោមនេះជាលក្ខណៈសម្បត្តិទាំង 8 ដែលយើងរំពឹងថានឹងបំពាក់នៅលើទូរស័ព្ទ iPhone 8៖
1.អេក្រង់កោង OLED: ទូរស័ព្ទ iPhone ត្រូវបានគេរំពឹងថានឹងមាន 3 ស៊េរីម៉ូដែលផ្សេងគ្នាដែលក្នុងនោះពីរស៊េរីម៉ូដែលនឹងប្រើប្រាស់នូវរូបរាងស្រោបដោយអាលុយមីញ៉ូមដូចទៅនឹងទូរស័ព្ទ iPhone 7/7S ហើយមួយស៊េរីម៉ូដែលទៀតជាប្រភេទ OLED ។ កញ្ចក់អេក្រង់ OLED នេះត្រូវបានគេដឹងថាផ្គត់ផ្គង់ដោយក្រុមហ៊ុន Samsung ។ ទូរស័ព្ទ iPhone 8 អេក្រង់ OLED ប្រហែលជាបង្កប់នូវសែនស័រជាច្រើននៅលើកញ្ចក់អេក្រង់តែម្តង ហើយទូរស័ព្ទនេះប្រហែលជាមានគែមដូចទៅនឹងទូរស័ព្ទ Samsung Galaxy S7 Edge ។
2.ប៊ូតុង Home ត្រូវដកចេញ: នៅទីបំផុត ក្រុមហ៊ុន Apple ប្រហែលជាធ្វើការបោះបង់នូវប៊ូតុង Home ដែលក្រុមហ៊ុនបច្ចេកវិទ្យានេះធ្លាប់បានប្រើប្រាស់នៅលើទូរស័ព្ទ iPhone ជាលើកដំបូងតាំងពីឆ្នាំ 2007 មកម្ល៉េះ។ ជំនួសមកវិញ ក្រុមហ៊ុននេះប្រហែលជាប្រើប្រាស់នូវប្រព័ន្ធស្កែនក្រយ៉ៅដៃនៅក្រោមកញ្ចក់អេក្រង់តែម្តង។
3.បន្ទះឈីប A11: ទូរស័ព្ទ iPhone ត្រូវបានគេរំពឹងថានឹងប្រើប្រាស់នូវបច្ចេកវិទ្យា 10nm នៅលើបន្ទះឈីប A11 ដែលផលិតឡើងដោយក្រុមហ៊ុន Semiconductor របស់តៃវ៉ាន់។ បន្ទះឈីបនេះនឹងមានល្បឿនកាន់តែខ្លាំងក្លាជាងមុន 30% និងសន្សំសំចៃថាមពលដល់ទៅ 20% បើធ្វើការប្រៀបធៀបជាមួយនឹងបន្ទះឈីបជំនាន់មុន។ ក្រុមហ៊ុន TSMC ជាអ្នកទទួលខុសត្រូវក្នុងការផ្គត់ផ្គង់នូវការផលិតបន្ទះឈីប A11 ដែលចាប់ផ្តើមនៅក្នុងខែមេសាឆ្នាំ 2017 ។
4.ប្រព័ន្ធបញ្ចូលថ្ម Wireless: ទូរស័ព្ទ iPhone 8 ត្រូវបានគេរំពឹងថានឹងមានការរចនាស្ទើរតែជាកញ្ចក់ទាំងអស់ពេញមួយតួខ្លួនទាំងមូលដែលប្រើប្រាស់នូវការបញ្ចូលថ្មតាមប្រព័ន្ធ Wireless ថែមទៀត។ ការរចនាទៅលើកញ្ចក់អេក្រង់នេះគឺដើម្បីធ្វើឱ្យវាកាន់តែប្រសើរឡើងសម្រាប់ការបញ្ចូលថ្មតាមប្រព័ន្ធ Wireless ប៉ុន្តែគ្រាន់តែវាមានទម្រង់មួយបែបណានៅមិនទាន់ដឹងនៅឡើយទេ។
5.បច្ចេកវិទ្យា Touch ID និងការពង្រឹងទៅលើកាមេរ៉ា: ប្រសិនបើក្រុមហ៊ុន Apple ប្រើប្រាស់នូវការរចនាបច្ចេកវិទ្យា Edge-to-Edge វាអាចនឹងធ្វើការផ្លាស់ប្តូរសម្រាប់កាមេរ៉ាផ្នែកខាងមុខ និងប្រព័ន្ធស្កែនក្រយ៉ៅដៃផងដែរ។ ទូរស័ព្ទ iPhone 8 ត្រូវបានគេរំពឹងថានឹងប្រើប្រាស់នូវប្រព័ន្ធកាមេរ៉ាមួយទៅក្នុងអេក្រង់តែម្តងជាមួយនឹងសែនស័រ Touch ID ។ សរុបមក ទូរស័ព្ទនេះប្រៀបបីដូចជាកញ្ចក់មួយដែលមានបំពាក់នូវមុខងារពិសេសជាច្រើននៅខាងក្នុងអេក្រង់តែម្តង។
6.បច្ចេកវិទ្យាស្កែនប្រស្រីភ្នែក និងស្កែនមុខ (Iris/Facial): ទូរស័ព្ទ iPhone 8 ត្រូវបានគេនិយាយថានឹងពង្រឹងទៅលើសុវត្ថិភាពជាច្រើនថែមទៀត។ ក្រុមហ៊ុន Apple ត្រូវបានគេរំពឹងថានឹងជំនួសការប្រើប្រាស់នូវ Passcode Encryption ជាមួយនឹងការប្រើប្រាស់បច្ចេកវិទ្យាស្កែនប្រស្រីភ្នែក និងបច្ចេកវិទ្យាស្កែនមុខវិញសម្រាប់ធ្វើការដោះសោរដោយប្រើប្រាស់កាមេរ៉ាមុខរបស់ទូរស័ព្ទនេះ។ ក្រុមហ៊ុននេះហៅប្រព័ន្ធស្កែនប្រស្រីភ្នែកនេះថា Retina Eye Scanner ។
7.ប្រព័ន្ធកាមេរ៉ា Multi-Sensor: ទូរស័ព្ទស្មាតហ្វូនសម្រាប់ឆ្នាំ 2017 ត្រូវបានគេរំពឹងថានឹងប្រើប្រាស់នូវប្រព័ន្ធកាមេរ៉ា Multi-Sensor ដែលមានសមត្ថភាពក្នុងការប្រើប្រាស់នូវការចាប់ពន្លឺនៅក្នុងកម្រិតខ្ពស់បំផុតដែលផ្តល់នូវរូបភាពកាន់តែច្បាស់ជាងមុន និងរូបភាពដែលមានពណ៌កូល័រច្បាស់បំផុត។
8.ការរចនារូបរាងថ្មី: ទូរស័ព្ទ iPhone 8 ត្រូវបានគេរំពឹងថានឹងធ្វើការផ្លាស់ប្តូររូបរាងថ្មីទាំងមូលតែម្តង។ ក្រៅពីដឹងថាវានឹងមានស៊ុមព័ទ្ធជុំវិញអេក្រង់កាន់តែតូចនោះ ទូរស័ព្ទ iPhone 8 នេះត្រូវបានគេរំពឹងថានឹងមានរូបរាងកាន់តែស្តើងជាងទូរស័ព្ទ iPhones ដែលក្រុមហ៊ុនមាន៕
