DJI ដែលជាក្រុមហ៊ុនផលិតយន្តហោះគ្មានមនុស្សបើក (Drone) កំពុងទទួលបានជោគជ័យ និហមានការគាំទ្រខ្លាំងពីសំណាក់អតិថិជន ពេលនេះ ត្រូវបានគេរាយការណ៍ថា ក្រុមហ៊ុននេះ បានទិញបានភាគហ៊ុនធំច្រើនជាងគេនៅក្នុងក្រុមហ៊ុនកាមេរ៉ា Hasselblad របស់ប្រទេសស៊ុយអ៊ែត។ ព័ត៌មាននៃការទិញបានភាគហ៊ុននេះ ត្រូវបានរាយការណ៍ដំបូងបំផុតដោយ Luminous Landscape និងប្រភពឧស្សាហកម្មជាច្រើនទៀត ដែលបានផ្ទៀងផ្ទាត់ទៅលើកិច្ចព្រមព្រៀងនេះជាមួយនឹង TechCrunch ។ ប្រភពនៅខាងក្នុងនេះ បានបង្ហាញថា ក្រុមហ៊ុន DJI មិនមែន ទិញយកភាគហ៊ុនទាំងអស់នោះទេ ប៉ុន្តែក្រុមហ៊ុនមួយនេះ បានទិញបានភាគហ៊ុនធំមួយនៅក្នុងក្រុមហ៊ុនផលិតកាមេរ៉ានេះ។
ក្រុមហ៊ុន DJI ទិញបានភាគហ៊ុនធំមួយនៅក្នុងក្រុមហ៊ុនផលិតកាមេរ៉ារបស់ប្រទេសស៊ុយអ៊ែតនៅក្នុងឆ្នាំ 2015 នៅក្នុងរង្វង់ទឹកប្រាក់ ដែលមិនទាន់បានដឹងនៅឡើយទេ។ នៅក្នុងកិច្ចព្រមព្រៀងនេះ ត្រូវបានរាយការណ៍ថា ក្រុមហ៊ុន DJI បានឈរដំណែងជាប្រធានប្រតិបត្តិរបស់ក្រុមហ៊ុនកាមេរ៉ា Hasselblad នេះ។ នៅពេលដែលសាកសួរអំពីការទិញបានភាគហ៊ុនធំនៅក្នុងក្រុមហ៊ុនកាមេរ៉ាមួយនេះ ក្រុមហ៊ុន DJI បានប្រាប់ព័ត៌មាន The Verge ថា វាមិនមានព័ត៌មានបន្ថែមទៀតនោះទេអំពីការសហការគ្នាជាមួយនឹងក្រុមហ៊ុន Hasselblad។ អ្នកនាំពាក្យបានបញ្ជាក់ថា ក្រុមហ៊ុន DJI នឹងធ្វើការសហការគ្នាក្នុងការជម្រុញឆ្ពោះទៅមុខដើម្បីបង្កើតនូវរូបភាពដ៏អស្ចារ្យនៅជុំវិញពិភពលោកសម្រាប់លោកអ្នក។
លោកអ្នកប្រហែលជាចងចាំហើយថា ក្រុមហ៊ុន Hasselblad ជាក្រុមហ៊ុនមួយក្នុងចំណោមក្រុមហ៊ុនផលិតកាមេរ៉ាលំដាប់កំពូលរបស់ពិភពលោក។ ក្រុមហ៊ុន Hasselblad ត្រូវបានបង្កើតឡើងនៅក្នុងឆ្នាំ 1941 ហើយកាមេរ៉ារបស់ក្រុមហ៊ុនមួយនេះ មានប្រវត្តិល្បីល្បាញដោយសារតែវាបានប្រើប្រាស់សម្រាប់ថតនៅក្នុងអាល់ប៊ុម Abbey Road របស់ក្រុម Beatles រូបភាពសខ្មៅរបស់ Steve Jobs និងរូបភាពអវកាសជាច្រើនទៀតរបស់ក្រុម NASA ។ វាពិតជាគួរឱ្យចាប់អារម្មណ៍ខ្លាំងមែនទែនចំពោះការសហការគ្នាឆ្ពោះទៅមុខរបស់ក្រុមហ៊ុន DJI និងក្រុមហ៊ុន Hasselblad ។ តើវានឹងមានអ្វីអស្ចារ្យបន្ថែមទៀត នៅពេលដែលក្រុមហ៊ុន Hasselblad បានប្រើប្រាស់បច្ចេកវិទ្យារបស់ខ្លួនសម្រាប់បំពាក់នៅលើយន្តហោះ Drone ស៊េរីថ្មីរបស់ក្រុមហ៊ុន DJI នោះ?
