ក្រុមហ៊ុន SONY បានប្រើប្រាស់កញ្ចក់អេក្រង់ប្រភេទ LCD panels នៅលើទូរស័ព្ទ និងឧបករណ៍ថេបប្លែតរបស់ខ្លួនអស់រយះពេលយូរយារណាស់មកហើយ។ ប៉ុន្តែទើបតែពេលនេះ មានរបាយការណ៍ថ្មីមួយចេញពីទឹកដីកំណើតរបស់ SONY គឺប្រទេសជប៉ុន បានប្រលយប្រយោគចេញមកថា នៅទីបំផុតក្រុមហ៊ុន SONY កំពុងមានគម្រោងប្រើប្រាស់បច្ចេកវិទ្យាកញ្ចក់អេក្រង់ OLED Display សម្រាប់ស្រឡាយកំពូលទូរស័ព្ទស្មាតហ្វូនរបស់ខ្លួននៅពេលអនាគត។ នេះមានន័យថា ទូរស័ព្ទស្មាតហ្វូនរបស់ SONY នឹងប្តូរទៅប្រើប្រាស់បច្ចេកវិទ្យាកញ្ចក់អេក្រង់ពពួក OLED ដូចកំពូលទូរស័ព្ទស្មាតហ្វូនរបស់ក្រុមហ៊ុន Samsung ដែរ ដែលក្រុមហ៊ុនកូរ៉េមួយនេះ គឺជាអ្នកផលិតនូវបន្ទះកញ្ចក់អេក្រង់ប្រភេទ OLED panels ខ្លួនឯងផ្ទាល់ និងបានប្រើនៅលើស្រឡាយស្មាតហ្វូន Galaxy S និង Note អស់រយះពេលជាច្រើនឆ្នាំមកហើយរហូតមកទល់នឹងបច្ចុប្បន្ននេះ។
ក្រុមហ៊ុនផលិតស្មាតហ្វូនដើរដោយ Android ជាច្រើនទៀត ក៏កំពុងតែមានគម្រោងជ្រើសរើសប្រើប្រាស់បច្ចេកវិទ្យាកញ្ចក់អេក្រង់ OLED សម្រាប់ផលិត ផលស្មាតហ្វូនរបស់ពួកគេផងដែរ ហើយក្នុងនោះក្រុមហ៊ុនបិតាបច្ចេកវិទ្យាអាមេរិក Apple ក៏កំពុងសម្រេចចិត្តក្នុងការផ្លាស់ប្តូរទៅប្រើកញ្ចក់អេក្រង់ OLED ជំនូសកញ្ចក់អេក្រង់ LCD panels ដែលបានប្រើនៅលើ iPhone អស់រយះពេលជិតដប់ឆ្នាំផងដែរ។
Samsung គឺជាក្រុមហ៊ុនធំជាងគេក្នុងការផលិតបន្ទះកញ្ចក់អេក្រង់ប្រភេទ Super AMOLED ឬ OLED សម្រាប់ប្រើនៅលើស្មាតហ្វូន ប៉ុន្តែ បើតាមរបាយការណ៍ SONY កំពុងរងចាំការផលិតកញ្ចក់អេក្រង់ OLED ពីសំណាក់ក្រុមហ៊ុន LG និង JDI ដើម្បីធ្វើការកុម្ម៉ង់ទិញ ពីក្រុមហ៊ុនទាំងពីរនេះ ជំនួសក្រុមហ៊ុន Samsung ដែលក្រុមហ៊ុនទាំងពីរនេះ នឹងចាប់ផ្តើមការផ្គត់ផ្គងផលិតផលកញ្ចក់អេក្រង់ OLED ពេញលេញនៅឆ្នាំ 2018 ឬ 2019 ហើយ សូម្បីតែក្រុមហ៊ុន Apple ក៏នឹងក្លាយជាផ្នែកដ៏សំខាន់មួយនៃសង្វាក់ផ្គត់ផ្គងក្នុងពេលនោះផងដែរ៕