មិនថាអ្នកថតរូបលំដាប់អាជីព មិនអាជីព ឬអ្នកប្រើប្រាស់ ដែលចូលចិត្តខាងការថតរូបនោះទេ ភាគច្រើនពួកគេតែងតែជ្រើសរើសយកកាមេរ៉ារបស់ក្រុមហ៊ុនកាណុងសម្រាប់យកទៅប្រើប្រាស់ផ្តិតយកផ្ទាំងទស្សនីយភាពទាំងឡាយ ដែលពួកគេបានឃើញទុកជាអនុស្សាវរីយ៍។ EOS M5 គឺជាកាមេរ៉ាថតរូប និងវីដេអូជំនាន់ថ្មីមួយទៀតរបស់ Canon ដែលពិតជាស័ក្តិសមបំផុតសម្រាប់ប្រើប្រាស់ក្នុងការថតរូប និងវីដេអូជាមួយនឹងសមត្ថភាពកាមេរ៉ាកាន់តែអស្ចារ្យបំផុត។
1. ការរចនារូបរាងខាងក្រៅ
ជាទូទៅកាមេរ៉ារបស់ក្រុមហ៊ុន Canon គឺត្រូវបានផលិតឡើងសម្រាប់ផ្តល់នូវភាពងាយស្រួលក្នុងការកាន់ប្រើប្រាស់ និងទុកដាក់តាមខ្លួន។ Canon EOS M5 មានតួរខ្លួនផ្សំឡើងដោយស្បែកប្រភេទគ្រើម និងជ័ររលោងស្វិតដែលបានផ្សាភ្ជាប់ចូលគ្នាបានយ៉ាងជិតល្អបំផុតជាមួយទំហំវិមាត្ររួម 115.6 x 89.2 x 60.6មម, មានទំងន់តួរ 380 ក្រាម និងទំងន់សរុបទាំងថ្ម និងម៉េមូរីកាត 427 ក្រាម។ ខាងមុនមានកញ្ចក់ Lens ដែលអាចភ្ជាប់ជាមួយកែវពង្រីកពង្រួមបានខ្នាត 18-150មម, ខាងក្រោយមានកញ្ចក់អេក្រង់ប្រភេទ TFT ទំហំ 3.2” សម្រាប់បង្ហាញមុខងារទូទៅ រូបភាព និងវីដេអូដែលបានថតរួមជាមួយនឹងកញ្ចក់ LCD សម្រាប់មើលនូវប្លង់រូបភាពក្នុងពេលថត។ ចំពោះប៊ូតុងចុចបញ្ជាមុខងារទូទៅត្រូវបានរៀបចំទៅតាមចំនុចនីមួយៗស្របតាមម្រាមដៃរបស់យើងផ្តល់នូវភាពងាយស្រួលក្នុងការប្រើប្រាស់បំផុត។
2. សមត្ថភាពថតរូប និងវីដេអូ
ជាមួយនឹងកញ្ចក់កែវកាមេរ៉ា (Lens) ប្រភេទ Digital single-lens non-reflex AF/AE ខ្នាត 18-150mm STM Kit ដែលបានបង្កប់ដោយកាមេរ៉ាទំហំ 24.2 MP និងអាចបង្កើនសមត្ថភាពបានដល់ 25.8MP ដែលអាចឲ្យយើងកំនត់ទំហំថតរូបភាពសន្លឹកដែលយើងចង់បានចាប់ពីទំហំ Aspect Ratio 1:1, 3:2, 4:3 ដល់ 16:9 និងវីដេអូបានដល់កម្រិត Full-HD ហើយគ្រប់ប្លង់នៃរូបភាព និងគុណភាពវីដេអូដែលបានផ្តិតចេញមកពិតជាច្បាស់ល្អបំផុតគួរជាទីគាប់ចិត្ត។ បន្ថែមពីនេះកាមេរ៉ារបស់ EOS M5 បានភ្ជាប់មកជាមួយញាណចាប់រូបដ៏ឆ្លាតវៃស៊េរី Dual Pixel CMOS AF ដែលមានភ្ជាប់នូវមុខងារ Face+Tracking AF, 1-point AF, AF 49 points, EV -1–18 ជាមួយកម្រិតពន្លឺ ISO100-6400 ដែលធ្វើឲ្យគុណភាពរូបភាព និងវីដេអូកាន់តែច្បាស់ស្រស់ស្អាតបែបធម្មជាតិពិតៗមិនព្រាលមិនស្រអាប់ និងកាត់បន្ថយស្នាមអុចៗលើផ្ទៃរូបភាពបានកាន់តែប្រសើរបំផុត។ ហើយរឹតតែពិសេសគឺវាបានភ្ជាប់មកជាមួយនូវអំពូលភ្លើង LED Lamp និងភ្លើងហ្វាស់ស៊េរី E-TTL II ប្រភេទ autofocus សម្រាប់ជាជំនួយនៅពេលថតនៅទីដែលមានពន្លឺទាប ឬពេលយប់។
3. សមត្ថភាពថ្ម
ភ្ជាប់មកជាមួយថ្មដែលអាចដោះចេញបានប្រភេទ LP-E17 មានសមត្ថភាពកាន់ថាមពលក្នុងការថតរូបសន្លឹកដោយប្រើមុខងារ CIPA compliant បាន 290 សន្លឹក, ប្រើមុខងារ Eco Mode On បាន 420 សន្លឹក ថតវីដេអូជាមួយមុខងារ CIPA compliant បាន 85 នាទី, ប្រើមុខងារ Electronic Color Viewfinder On បាន 90 នាទី និងចាក់វីដេអូមើលបានរហូតដល់ទៅ 4 ម៉ោង។
4. កំលាំងម៉ាស៊ីន និងដំណរភ្ជាប់
ដើម្បីទ្រទ្រង់កាមេរ៉ាថតរូបទំហំ 24.2MP និងបច្ចេកវិទ្យាថ្មីៗ ហើយដើម្បីឲ្យកាមេរ៉ាស៊េរីថ្មីមួយនេះ ដំណើរការទៅបានរលូនល្អក្រុមហ៊ុន Canon បានបំពាក់នូវបន្ទះ ឈីបកាមេរ៉ាជំនាន់ DIGIC 7 Processor ដែលមានសមត្ថភាពដំណើរការថតរូបបានលឿនរហ័សបំផុតដោយប្រើពេលចាប់រូបភាពត្រឹមតែ 30 វិនាទីក្នុងមួយប៉ុស្តិ៍ជាមួយមុខងារ Auto Mode និងដំណើរការកាមេរ៉ាប្រើពេល 1.0 វិនាទីប៉ុណ្ណោះ។ ហើយបន្ទះឈីបប្រភេទនេះ មានសមត្ថភាពអាចទ្រទ្រង់បាននូវបច្ចេកវិទ្យា និងមុខងារទំនើបៗដូចជាទ្រទ្រង់នូវប្រព័ន្ធ Wi-Fi, NFC, ប្លូធូស, PictBridge, Creative Filter, Scene Intelligent Auto, Creative Assist និង Remote Shooting ជាដើម។ ដោយឡែកសម្រាប់មុខងារតភ្ជាប់ដោយប្រើប្រាស់ខ្សែវិញគឺអាចប្រើតាមរន្ធដោត USB 2.0 សម្រាប់ផ្ទេរទិន្នន័យ និងរន្ធដោត HDMI សម្រាប់ភ្ជាប់ទៅកាន់ទូរទស្សន៍ស្មាតធីវីទៀតផង។
Canon EOS M5 ទ្រទ្រង់បានជាមួយម៉េមូរីកាតប្រភេទ SD/SDHC/SDXC និង UHS-I។ ជារួមមកវិញកាមេរ៉ា Canon EOS M5 ស៊េរីថ្មីមួយនេះពិតជាមានសមត្ថភាពគ្រប់គ្រាន់សម្រាប់ការប្រើប្រាស់ក្នុងការថតរូប និងវីដេអូជាមួយមុខងាររួមទាំងបច្ចេកវិទ្យាកំនត់ការថតទំនើបៗ យ៉ាងសម្បូរបែបតែម្តង ដែលមិនធ្វើឲ្យលោកអ្នកធុញទ្រាន់ក្នុងការកាន់ថតរូបឡើយ៕
