ក្រុមហ៊ុនផលិតស្មាតហ្វូនក្នុងប្រទេសចិន Meizu បានចេញលិខិតអញ្ជើញទៅកាន់បណ្តាប្រព័ន្ធផ្សព្វផ្សាយនានាដើម្បីចូលរួមក្នុងព្រឹត្តិការណ៍របស់ក្រុមហ៊ុននៅថ្ងៃទី 27 ខែមករា 2017 ខាងមុខនេះ។ មានព័ត៌មានចចាមអារ៉ាមបានលេច លឺមកថាក្នុងព្រឹត្តិការណ៍នោះ Meizu នឹងដាក់បង្ហាញចេញស្មាតហ្វូនស៊េរីថ្មីរបស់ខ្លួនម៉ូដែល Meizu M5s ដែលស្មាតហ្វូនមួយនេះមានលេចចេញលក្ខណះសម្បត្តិខ្លះៗរួចទៅហើយកាលពីខែធ្នូឆ្នាំទៅ។
កាលពីខែធ្នូរូបភាពប្រអប់នៃស្មាតហ្វូនស៊េរីថ្មីរបស់ Meizu ត្រូវបានបែកធ្លាយចេញ ប៉ុន្តែ គេមិនទទួលបានព័ត៌មានច្បាស់អំពីឈ្មោះ និងថ្ងៃប្រកាសចេញជាផ្លូវការណ៍របស់វានោះទេ។ បន្ទាប់មកទៀតគេក៏បានឃើញបណ្តាញ TENNA Certification របស់ចិនបានបង្ហាញចេញនូវបញ្ចីទូរស័ព្ទ Meizu ចំនួនពីរម៉ូដែលជាមួយលក្ខណះសម្បត្តិខ្លះៗរបស់ពួកវា ហើយគេក៏បានសន្និដ្ឋានបានថាមួយម៉ូដែលសម្រាប់ទីផ្សារប្រទេសចិន និងម៉ូដែលផ្សេងទៀតសម្រាប់ទីផ្សារសកល។ ស្មាតហ្វូន Meizu M5s ដែលត្រៀមប្រកាសចេញនៅថ្ងៃទី 27 មករាខាងមុខនេះអាចជាកំនែប្រែអាប់ដែតថ្មីពីម៉ូដែល M5 ប៉ុន្តែវាមានទំហំរាងតូចជាម៉ូដែលនេះបន្តិច។
M5s នឹងបំពាក់នូវកញ្ចក់អេក្រង់ទំហំ 5.2” ប្រភេទ LCD ប្រើបន្ទះឈីប MediaTek MT6753 មានអង្គគណនា 8 គ្រាប់ប្រភេទ Octa-core Cortex-A53 ល្បឿនគណនា 1.3GHz។ ក្នុងឆ្នាំ 2017 នេះ Meizu មានគម្រោងប្រកាសចេញស្មាតហ្វូនស៊េរីថ្មីៗរបស់ខ្លួនចំនួន 6 ស៊េរីដើម្បីវាយលុកទីផ្សារ ហើយ M5s នេះគឺជាជំហានដំបូងនៅដើមឆ្នាំ 2017 នេះ ហើយស្មាតហ្វូនបន្ទាប់ទៀតដែលនឹងបង្ហាញវត្តមាននៅខែកុម្ភះអាចជាម៉ូដែល Meizu 5S។
Meizu គឺជាក្រុមហ៊ុនផលិតស្មាតហ្វូនមួយដែលកំពុងទទួលបានប្រជាប្រិយភាពខ្លាំងទាំងក្នុងទីផ្សារប្រគូតប្រជែងក្នុងប្រទេសចិន និងទីផ្សារសកល។ កាលពីឆ្នាំ 2016 ក្រុមហ៊ុនចិនមួយនេះលក់ស្មាតហ្វូនរបស់ខ្លួនបានមិនតិចជាង 22 លានគ្រឿងនោះទេ ដែលនេះគឺជាភាពជោគជ័យមួយរឹតតែជម្រុញឲ្យក្រុមហ៊ុនចិនមួយនេះខិតខំប្រឹងប្រែបន្តទៀតក្នុងទីផ្សារស្មាតហ្វូនដែលកំពុងតែមានភាពក្កៅគគុកមួយនេះ៕