ដើម្បីធ្វើការការពារនូវការកើនឡើងកម្តៅខ្លាំងនៃថាមពលថ្មប្រើប្រាស់នៅលើទូរស័ព្ទ LG G6 ក្រុមហ៊ុន LG បានបញ្ជាក់ថា ក្រុមហ៊ុននឹងប្រើប្រាស់នូវបំពង់កម្តៅទង់ដែងមួយសម្រាប់សាយភាយកម្តៅនៅជុំវិញនោះបាន។ ជាមួយនឹងបំពង់កម្តៅក្នុងក្នុងទូរស័ព្ទនេះ ថាមពលថ្ម នឹងមិនឡើងកម្តៅខ្លាំងនោះទេ សូម្បីតែសីតុណ្ហភាពឡើងខ្ពស់ទៅដល់ 150 ដឺក្រេក៏ដោយ។ បច្ចេកវិទ្យាមួយនេះត្រូវបានគេប្រើប្រាស់នៅក្នុងថាមពលថ្មជាច្រើនរបស់កុំព្យូទ័រលើតុ កុំព្យូទ័រយួរដៃ និងស៊េរី Notebook ផងដែរហើយវាអាចធ្វើការបន្ថយសីតុណ្ហភាពពី 6% ទៅ 10% ថែមទៀតផង។
ទូរស័ព្ទស៊េរីថ្មី LG G6 ត្រូវបានបង្កើតឡើងដោយដាក់ផ្នែកដែលកើនឡើងកម្តៅខ្លាំងស្ថិតនៅឆ្ងាយពីគ្នា។ ក្រុមហ៊ុន LG កំពុងតែព្យាយាមប្រើប្រាស់នូវបច្ចេកវិទ្យាសុវត្ថិភាពដើម្បីឱ្យទូរស័ព្ទ LG G6 នេះមានលក្ខណៈផ្សេងគ្នាពីទូរស័ព្ទ Galaxy S8 របស់ក្រុមហ៊ុន Samsung ។ ក្នុងការសន្យាប្រើប្រាស់ថាមពលថ្ម ដែលមានសុវត្ថិភាពនៅក្នុងទូរស័ព្ទស៊េរីថ្មីនេះ ក្រុមហ៊ុន LG រំពឹងថាការលក់នឹងមានការកើនឡើង និងទាញការចាប់អារម្មណ៍ពីអ្នកប្រើប្រាស់ដែលភ័យខ្លាចរឿងផ្ទុះ Samsung Galaxy Note 7 កាលពីឆ្នាំមុននេះ រហូតធ្វើឱ្យក្រុមហ៊ុន Samsung ប្រកាសប្រមូលជាលើកទី 2 ពីទីផ្សារពិភពលោកទាំងអស់ និងផ្អាកឈប់ផលិតទាំងស្រុងតែម្តង។ បន្ថែមពីនេះទៅទៀត ក្រុមហ៊ុន LG បានបញ្ជាក់ថា ក្រុមហ៊ុនកំពុងតែធ្វើការតេស្តសាកល្បងទៅលើថាមពលថ្មសម្រាប់ប្រើប្រាស់នៅលើស្មាតហ្វូនស៊េរីថ្មីនេះដែលមានសីតុណ្ហភាពកើនឡើង 15% ជាងថ្មស្តង់ដារប្រើប្រាស់នៅសហរដ្ឋអាមេរិច និងសហភាពអ៊ឺរ៉ុប។
ជាមួយគ្នានេះផងដែរ ក្រុមហ៊ុន LG ក៏ត្រៀមខ្លួនក្នុងការបញ្ចេញនូវស្មាតហ្វូនស៊េរីថ្មីនេះចូលទៅកាន់ទីផ្សារមុនពេលដែលក្រុមហ៊ុន Samsung ធ្វើការប្រកាសបង្ហាញលក់ទូរស័ព្ទ Samsung Galaxy S8 ។ ទូរស័ព្ទ LG G6 ប្រហែលជាប្រកាសបង្ហាញវត្តមាននៅក្នុងព្រឹត្តិការណ៍តាំងពិពរណ៍ MWC នៅខែក្រោយនេះហើយប្រហែលជាដាក់លក់នៅថ្ងៃទី 10 ខែមីនា ចំនែកទូរស័ព្ទ Galaxy S8 ប្រហែលជាដាក់បង្ហាញនៅក្នុងព្រឹត្តិការណ៍ MWC ផងដែរ ប៉ុន្តែការដាក់លក់ប្រហែលជាត្រូវរង់ចាំរហូដល់ខែមេសា។ ការពន្យារពេលនេះដើម្បីឱ្យរោងចក្រផលិតធ្វើការតេស្តសាកល្បងថ្មថាពិតជាមិនមានបញ្ហាសារជាថ្មីដូច Samsung Galaxy Note 7 នោះទេ។
លោក Lee Seok-jong បាននិយាយថា យើងនឹងធ្វើការបង្កើននូវសុវត្ថិភាព និងគុណភាពនៃស្មាតហ្វូនស៊េរីថ្មីរបស់ពួកយើងព្រោះអតិថិជនជាច្រើនកំពុងតែត្រូវការទូរស័ព្ទដែលមានសុវត្ថិភាពខ្ពស់។ យើងកំពុងតែធ្វើការផលិតនូវថាមពលថ្មដែលមានសីតុណ្ហភាពខ្ពស់ជាងមុនដល់ទៅ 15% ខ្ពស់ជាងស្តង់ដារថ្ម ដែលប្រើប្រាស់នៅក្នុងសហរដ្ឋអាមេរិច និងសហភាពអ៊ឺរ៉ុប។ ថាមពលថ្មនេះកំពុងតែធ្វើការតេស្តសាកល្បងជាច្រើនវិធីដូចជាការទម្លាក់វត្ថុធ្ងន់លើ ការសង្កត់ពីលើ និងវិធីជាច្រើនទៀត៕
