ក្រុមហ៊ុន Software យក្សរបស់ពិភពលោក Microsoft បានបញ្ចេញស្មាតហ្វូនស៊េរីថ្មីម៉ូដែល Lumia 540 សម្រាប់ប្រកូតប្រជែងទីផ្សារស្មាតហ្វូនដែលកំពុងតែមានសន្ទុះខ្លាំងក្លាក្នុងពេលបច្ចុប្បន្ន។ Lumia 540 មិនត្រឹមតែជាស្មាតហ្វូនដែលមានតម្លៃធូរថ្លៃប៉ុណ្ណោះទេ តែវាក៏ជាស្មាតហ្វូន Windows Phone ដែលពោរពេញទៅដោយគុណសម្បត្តិសម្រាប់ការប្រើប្រាស់ទាំងការងារកម្សាន្ត ទំនាក់ទំនង និងមុខងារជំនួញ។ តួរយ៉ាងដូចជាអាចប្រើបានស៊ីមពីរ និងមានអេក្រង់ទំហំ 5.0 អ៊ីង IPS LCD។
ការរចនា
ទោះបីជា Lumia 540 មានកម្រាស់រាងក្រាស់បន្តិច (8.6មម) ក៏ដោយតែបើយើងពិនិត្យទៅលើរចនាបថទាំងមូលរបស់វាឃើញថាពិតជាស័ក្តិសម ស្រស់ស្អាតទាក់ភ្នែក ព្រមទាំងបង្ហាញពីភាពស៊ីវីល័យដល់អ្នកកាន់ប្រើប្រាស់ថែមទៀតផង។
អេក្រង់ IPS LCD ទំហំ 5.0 អ៊ីង
មិនធំពេកហើយក៏មិនតូចពេកដែរសម្រាប់ទំហំ 5.0 អ៊ីងដែលមាននៅលើ Lumia 540 ព្រោះថា វាផ្តល់ភាពងាយស្រួលគ្រប់បែបយ៉ាងមិនថាការទស្សនាវីដេអូ រូបភាព លេងហ្គេម ហ្វេសប៊ុក វាយអត្ថបទផ្ញើសារ អានសារព័ត៌មានក្នុងវ៉ិបសាយ…ជាដើម។
បន្ទះឈីប និងអង្គគណនា
Lumia 540 ត្រូវបាន Microsoft បំពាក់នូវបន្ទឈីប Qualcomm ស៊េរី Snapdragon 200 ជាមួយនឹងអង្គគណនាបួនគ្រាប់ (Quad-Core Processor) ល្បឿដំណើរការ 1.2 GHz Cortex-A7 និងមានរ៉េមទំហំ 1 GB។
ថ្មខ្នាត 2,200 mAh
សមត្ថភាពថាមពលថ្មរបស់ Lumia 540 គឺអាចបើកទុកចោល (Stand-by) បាន 24 ថ្ងៃ, បើកតន្ត្រីស្តាប់បានរហូតដល់ទៅ 81 ម៉ោង, ប្រើក្នុងការសន្ទនាបានជាង 26 ម៉ោងសម្រាប់ប្រព័ន្ធ 2G និង 3G បានជាង 14 ម៉ោង។
កាមេរ៉ាថតរូប និងវីដេអូ
លោកអ្នកពិតជាចូលចិត្តថតរូបបែប Selfie ណាស់មែនទេ? ជាមួយនឹង Lumia 540 មិនធ្វើឲ្យលោកអ្នកខកចិត្តឡើយដោយម៉ូដែលមួយនេះបំពាក់នៅកាមេរ៉ាមុខទំហំរហូតដល់ទៅ 5.0 MP ដូច្នេះលោកអ្នកអាចថតរូប Cute Cute…ដោយខ្លួនឯងបានយ៉ាងច្បាស់ល្អ រួមនឹងកាមេរ៉ាផ្នែកខាងក្រោយទំហំ 8.0 MP autofocus, LED flash ដែលអាចថតរូបបានកម្រិត HD យ៉ាងច្បាស់គ្រប់ស្ថានភាព។
ប្រព័ន្ធប្រតិបត្តិការ
Lumia 540 ដំណើរការជាមួយ Microsoft Windows Phone 8.1 ដែលជាកំណែប្រែចុងក្រោយនៃជំនាន់មួយនេះ ហើយនៅថ្ងៃខាងមុខក៏នឹងអាចដំឡើងបានជាមួយនឹង Windows Phone 10 ផងដែរនៅពេលប្រតិបត្តិការជំនាន់ថ្មីមួយនេះដាក់ចេញឲ្យប្រើប្រាស់ជាផ្លូវការណ៍៕