ភាពរំភើបរីករាយ និងការទន្ទឹងរង់ចាំរបស់សិស្សានុសិស្ស បុគ្គលិកការងារ មាតាបិតារបស់សិស្ស និងពីសំណាក់មហាជន កំពុងមានសន្ទុះយ៉ាងខ្លាំង ដោយសារពួកគេនឹងបានជួបជាមួយនឹងតារាល្បីៗដែលពួក គេស្រលាញ់ពេញចិត្ត និង បានទស្សនាការសម្តែងពីសំណាក់ក្រុមរាំរបាំប្រពៃណីខ្មែរ នៅក្នុងកម្មវិធីសប្បុរសធម៌ក្នុងឱកាសចូលឆ្នាំប្រពៃណីខ្មែររបស់សាលាអេស៊ីអ៊ី ដែលធ្វើឡើងនៅថ្ងៃទី 2 ខែ មេសា ឆ្នាំ 2017 ក្នុងសាលពិពរណ៌កោះពេជ្រ អគារ B និង C នាពេលខាងមុខនេះ។ ក្រោមការរៀបចំរបស់គណៈកម្មការសង្គមរបស់អាយឌីភី និង អេស៊ីអ៊ី និងចូលរួមដឹកនាំដោយអគ្គរាជទូតសុឆន្ទៈសិស្ស និងបុគ្គលិករបស់សាលាអេស៊ីអ៊ីទាំងអស់ កម្មវិធីសប្បុរសធម៌ក្នុងឱកាសចូលឆ្នាំប្រពៃណីខ្មែរនេះត្រូវបានប្រារព្ធឡើងរយៈពេលកន្លះថ្ងៃ ក្នុងគោលបំណងរកមូលនិធិជូនទៅដល់មន្ទីរពេទ្យគន្ធបុប្ផា។
កំពូលតារាចំរៀងល្បីៗ និងតារាចំរៀងនិពន្ធស្នាដៃដើម បានស្ម័គ្រចិត្តចូលរួមសម្ដែងក្នុងកម្មវិធីសប្បុរសធម៌ដ៏មហោឡារិកនេះ ហើយដែលរំពឹងទុកថានឹងមានអ្នកចូលរួមកម្មវិធីប្រមាណជាង 1500នាក់ រួមមាន៖ ជី ដេវិត,ទេព បុព្រឹក្ស,ថែល ថៃ, ចម្រើន សុភក្រ័្ដ, សាវាឌី ធីរិកា,សេម រ៉ុកគឺ, និកគីនិកគី, ម៉ារី,ស្រណោះ,កញ្ជនា,ដឹ ម៉ាស្តាច,សូរិយា, តូនី វិនសុន និងតារាមានទេពកោសល្យជាច្រើនរូបទៀត។ មិនត្រឹមតែប៉ុណ្ណោះ របាំប្រពៃណីខ្មែរនឹងត្រូវសម្តែងជួនអ្នកចូលរួមផងដែរ ដោយក្រុមឈ្មោះ របាំ។ លោក សូរិយា អ៊ូង បានបកស្រាយពីចំណាប់អារម្មណ៍របស់លោកក្នុងការមកសម្តែងក្នុងកម្មវិធីដោយមិនយកកំរៃថា «ពួកយើងទាំងអស់គ្នាតែងតែស្វែងរកវិធីក្នុងការជួយគ្នាទៅវិញទៅមក ដូច្នេះក្នុងនាមខ្ញុំបាទជាអ្នក សម្តែងម្នាក់ ខ្ញុំបាទសង្ឃឹមថាការសម្តែងលើឆាករបស់ខ្ញុំគឺជាចំណែកមួយក្នុងការប្រមូលមូលនិធិជូនទៅដល់មន្ទីរពេទ្យកាន់តែប្រសើរ»។
លោកស្រី ជា ចិន្តាមុនី ប្រធានគណៈកម្មាធិការសង្គម IDP-ACE បានមានប្រសាសន៍ថា វានឹងក្លាយជាព្រឹត្តិការណ៍ដ៏អស្ចារ្យដែលសិស្សសាលាអេស៊ីអ៊ី ទាំងអស់, មាតាបិតា, បុគ្គលិក,មិត្តភក្តិនិងក្រុមគ្រួសាររបស់ពួកគេទាំងអស់មករួមគ្នាដើម្បីអបអរឆ្នាំថ្មីប្រពៃណីខ្មែរសម្រាប់កម្មវិធីសប្បុរសធម៍។សិស្សសាលាអេស៊ីអ៊ី ឈ្មោះលី ណេង បាននិយាយផងដែរថា «មិត្តភក្តិរបស់ខ្ញុំ និងរូបខ្ញុំផ្ទាល់បានទិញសំបុត្រចូលរួមកម្មវិធីរួចរាល់ហើយ» «បង និកគីនិកគី ជាតារាក្នុងដួងចិត្តរបស់ពួកខ្ញុំ។ សឿង ចាន់តារា ឯកអគ្គរដ្ឋទូតសុឆន្ទៈសិស្សរបស់សាលាអេស៊ីអ៊ីដែលផ្តួចផ្តើមកម្មវិធីនេះម្នាក់បានមានមតិថា: «កម្មវិធីនេះនឹងក្លាយជាកំណត់ចំណាំពិសេសប្រចាំឆ្នាំរបស់យើង ហើយពួកយើងមានអារម្មណ៏រំភើបនិងមានមោទនភាពក្នុងការចូលរួមរៀបចំកម្មវិធីមួយនេះ។
លោកជំទាវ គឹម សេដ្ឋានី រដ្ឋលេខាធិការ នៃក្រសួងអប់រំ យុវជន និងកីឡាបានមានប្រសាសន៍ថា «ក្រសួងអប់រំ យុវជន និងកីឡា សូមគាំទ្រនូវកម្មវិធីសប្បុរសធម៌ ក្នុងឱកាសចូលឆ្នាំខ្មែរប្រពៃណីជាតិរបស់មជ្ឈមណ្ឌលអូស្ត្រាលីសម្រាប់ការបណ្តុះបណ្តាល (ACE) ។ ក្រៅពីជួយបណ្តុះនូវផ្នត់គំនិតក្នុងការចែករំលែកធនធានផ្ទាល់ខ្លួន ទោះតិចក្តី ច្រើនក្តី ដើម្បីជួយដល់សង្គម កម្មវិធីនេះ បានរួមចំណែកផ្សព្វផ្សាយការយល់ដឹង ក្នុងស្រទាប់យុវវ័យឱ្យចូលរួមលើកកម្ពស់វប្បធម៌ប្រពៃណី និងអរិយធម៌ខ្មែរទាំងអស់គ្នា។» សាលពិពណ៌កោះពេជ្រទាំងពីរ នឹងមានការដាក់តាំងបង្ហាញជាមួយស្តង់ផ្សេងៗ មានដូចជាស្តង់អាហារសម្រន់ និង វត្ថុអនុស្សាវរីយ៍ពិសេសៗ សំរាប់ឱកាសបុណ្យចូលឆ្នាំខ្មែរ និងស្តង់ថតរូបដោយខ្លួនឯងជាដើម។
លោកម៉ៅស្រេងនាយក អាយ ឌី ភី និង អេ ស៊ី អ៊ី ប្រចាំនៅកម្ពុជាបានមានប្រសាសន៏ថា យើងរង់ចាំស្វាគមន៍អ្នករាល់គ្នាដើម្បីចូលរួមកម្មវិធីសប្បុរសធម៏រៃអង្គាស និងការប្រារព្ធពិធីចូលឆ្នាំខ្មែរក្នុងឆ្នាំនេះ។ យើងមានក្ដីសោមនស្ស យ៉ាងខ្លាំងចំពោះកិច្ចខិតខំប្រឹងប្រែងរបស់បុគ្គលិករបស់យើង, ឯកអគ្គរដ្ឋ ទូតសុឆន្ទៈសិស្សនិងគ្រួសាររបស់ពួកគេនៅក្នុងការរៀបចំ និងគាំទ្រកម្មវិធីនេះដើម្បីអបអរឆ្នាំថ្មីផង និងដើម្បីរៃអង្គាសប្រាក់ដើម្បីជួយកុមារនៅមន្ទីរពេទ្យគន្ធបុប្ផាផង ។
សំបុត្រសម្រាប់ចូលរួមកម្មវិធីសប្បុរសធម៌ក្នុងឱកាសចូលឆ្នាំប្រពៃណីខ្មែររបស់សាលាអេស៊ីអ៊ី មានលក់នៅៈ
១. គ្រប់សាខាសាលារៀន ACE (សាខា សម្ដេចប៉ាន សន្ធរម៉ុក ទួលទំពូង និងសៀមរាប)
២. ហាងកាហ្វេ Brown (សាខា IFL Pencil សុធារស)
៣. ហាងតែ KOI (សាខា ម៉ៅសេទុង IFL ត្រសក់ផ្អែម)
៤. ហាងកាហ្វេ Artease
៥. Premium Party
- សំបុត្រតម្លៃ 30000 រៀល នឹងទទួលបានអាវយឺត 1 ផងដែរ! ថវិការទាំងអស់ដែលទទួលបានពីកម្មវិធីនឹងបរិច្ចាគជូន មន្ទីពេទ្យគន្ធបុប្ផា។