ថ្មីនេះៗ ក្រុមហ៊ុន LG បានបញ្ចេញនូវទូរស័ព្ទស្មាតហ្វូនថ្នាក់មធ្យមក្នុងគ្រូសារ K Series 2017 ដើម្បីធ្វើការប្រគូតប្រជែងទីផ្សារជាមួយស្មាតហ្វូនថ្នាក់មធ្យមរបស់បណ្តាក្រុមហ៊ុនដទៃទៀត។ ស្មាតហ្វូនទាំងនោះ មាន K10, K8, K4 និង K3 ជាដើម។ ជាមួយនឹងការរចនារួបរាងថ្មីស្រស់ស្អាតប្លែក និងទាក់ទាញទូរស័ព្ទ LG K Series 2017 ទាំងអស់ក៏មានបំពាក់មកជាមួយលក្ខណះសម្បត្តិល្អៗយ៉ាងសម្បូរបែបសម្រាប់ការប្រើប្រាស់ថែមទៀតផង។ តទៅទៀនេះខ្ញុំសូមលើកយកពីរម៉ូដែលក្នុងចំនោមបួនម៉ូដែលគឺ K10 (2017) មកធ្វើការបង្ហាញជូនប្រិយមិត្តឲ្យបានដឹងពីគុណសម្បត្តិទូទៅដែលមានភ្ជាប់មកជាមួយស្មាតហ្ចូនថ្មីនេះ។
LG K10 (2017) មានការរចនារូបរាងថ្មី ដោយផ្ទៃខាងមុខរបស់ពួកវាត្រូវបានក្រាលដោយកញ្ចក់អេក្រង់មានសភាពផុស និងរាងកោងគែមបន្តិច ស៊ុមព័ទ្ធជុំវិញតួររាងមូលក្តោបគែមជាប្រភេទអ៊ីណុក និងខាងក្រោយជាសន្ទះជ័រផ្លាស្ទីកមានសណ្ឋានដូចលោហះរាងកោងគែមសងខាងដែលអាចដោះចេញបាន។ LG K10 មានកម្រាស់ 7.9 មម, ទំងន់ 144 ក្រាម។ ផ្ទៃខាងមុខក្រោមកញ្ចក់អេក្រង់រំលេចដោយឡូហ្គោ LG ខាងលើវិញមានឧប៉ាល័រស្តាប់ការសន្ទនា សែនស័របិទពន្លឺអេក្រង់ និងកាមេរ៉ាមួយគ្រាប់។ នៅជុំវិញតួរផ្នែកខាងស្តាំមិនមានអ្វីនោះទេ ខាងក្រោមមានរន្ធដោតកាស, USB និងម៉ិចស័រស្រូបសំឡេង។ ងាកមកចំហៀងខាងស្តាំដៃវិញមានប៊ូតុងឡើងចុះសំឡេង។
ផ្ទៃខាងក្រោយនៃស្មាតហ្វូននេះមានរំលេចដោយកាមេរ៉ារាងរង្វង់ក្រោមបន្តិចជាអំពូលភ្លើង LED flash, ទ្រនាប់ស្កែនក្រយ៉ៅម្រាមដៃ។ ទ្រនាប់ស្កែនម្រាមដៃក៏ប្រើជាប៊ូតុងសម្រាប់ចាក់សោរ និងបិទបើកទូរស័ព្ទផងដែរ។ ដោយឡែកសម្រាប់រន្ធសម្រាប់ស៊កបញ្ចូលស៊ីមកាតទាំងពីរ និងម៉េមូរីកាតស្ថិតនៅក្រោមសន្ទះខាងក្រោយតែម្តង។ ស្មាតហ្វូនស៊េរីថ្មីនេះ គឺមានបំពាក់ដោយកញ្ចក់អេក្រង់ប្រភេទ IPS LCD 2.5D Glass មានទំហំកញ្ចក់អេក្រង់ 5.2 អ៊ីង ដែលអាចទ្រទ្រង់ការបង្ហាញរូបភាពវីដេអូបានក្នុងកម្រិត HD ឬ 720 x 1280 ភិចសែល ។
ស្មាតហ្វូនម៉ូដែល K10 2017នេះ មានទំហំ 13MP ដែលមានកម្រិត Aperture f/2.2 ជាមួយសែនស័រចាប់រូបខ្នាត 1/3” អមដោយអំពូលភ្លើងជំនួយ LED Flash មួយគ្រាប់ និងមានកាមេរ៉ាខាងមុខទំហំ 5 MP ប្រភេទ Autofocus មានសមត្ថភាពអាចថតវីដេអូបានក្នុងកម្រិត Full-HD ឬ 1080 ភិចសែលក្នុងល្បឿន 30fps ដូច្នេះទាំងរូបភាពសែលហ្វី និងវីដេអូ ដែលផ្តិតចេញមកទាំងមុខ និងក្រោយ គឺពិតជាមានលក្ខណះល្អប្រសើរ ដែលអាចនិយាយបានថា ពិេសសដូចស្មាតហ្វូនថ្នាក់ខ្ពស់អញ្ចឹងដែរ។
ងាកមកមើលកំលាំងម៉ាស៊ីន និងប្រព័ន្ធប្រតិបត្តិកាវិញ LG K10 (2017) គឺជាស្មាតហ្វូនថ្នាក់មធ្យមដូចនេះ វាមានកំលាំងម៉ាស៊ីនសមល្មមអាចបំពេញតម្រូវការប្រើប្រាស់ជាប្រចាំថ្ងៃរបស់យើងបានដូចជាការទំនាក់ទំនង លេងហ្គេម ការទស្សនាវីដេអូ ការលេងបណ្តាញសង្គម និងកិច្ចការស្រាវជ្រាវលើប្រព័ន្ធអ៊ីនធើណិតជាដើម។ LG K10 (2017) ប្រើប្រាស់បន្ទះឈីប Mediatek ស៊េរី MT6750 ដែលមានអង្គប្រតិបត្តិការ 8-Core ប្រភេទ Cortex-A53 រត់បានក្នុងល្បឿន 1.5GHz ជាមួយរ៉េមទំហំ 2GB និងប្រើក្រាហ្វិកពពួក Mali-T860MP2។ ស្មាតហ្វូនស៊េរីថ្មីនេះ ត្រូវបានក្រុមហ៊ុន LG ដំឡើងមកជាមួយស្រាប់នូវប្រតិបត្តិការ Android ជំនាន់ចុងក្រោយបំផុតគឺ Nougat v7.0 និងស្រោបដោយផ្ទៃអ៊ីនធើហ្វេសផ្ទាល់របស់ក្រុមហ៊ុនតែម្តង។ ដូច្នេះ មានន័យថា វាមានភ្ជាប់មកជាមួយស្រាប់នូវកម្មវិធី និងមុខងារប្រើប្រាស់ថ្មីៗ យ៉ាងច្រើនសម្បូរបែបសម្រាប់ប្រើប្រាស់លេងកម្សាន្ត។
សំរាប់ផ្នែកសំខាន់ៗផ្សេងៗទៀតនៅលើ K10 2017 នេះគឺមានដូចជា៖
1. កំលាំងថាមពលថ្ម៖ LG K10 មានទំហំ 2,800mAh ជាប្រភេទថ្ម Li-Ion ។
2. ទំហំផ្ទុកទិន្នន័យក្នុងម៉ាស៊ីន៖ LG K10 2017 មានទំហំផ្ទុកទិន្នន័យស្រាប់ក្នុងម៉ាស៊ីនទំហំ 16GB ហើយក៏អាចដាក់បន្ថែមទំហំម៉េមូរីបានផងដែរជាប្រភេទ microSD ដោយ K10 អាចបន្ថែមបានទំហំ 256GB ឯណោះ។
3. ប្រព័ន្ធស៊ីមកាត ៖ ស្មាតហ្វូន LG K 10 2017 នេះអាចប្រើប្រាស់ស៊ីមកាតបានពីរប្រព័ន្ធប្រភេទ Nano SIM ដែលទ្រទ្រង់បាននូវសេវា 4G LTE ជាមួយមុខងារ Dual SIM Stand-by។
4. ប្រព័ន្ធស្កែនក្រយ៉ៅម្រាមដៃ៖ ដើម្បីធ្វើឲ្យការប្រើប្រាស់កាន់តែមានលក្ខណះទំនើបទាន់សម័យកាលបច្ចេកវិទ្យា និងមានសុវត្ថិភាពខ្ពស់ LG បានសម្រេចបំពាក់នូវប្រព័ន្ធចាក់សោរ និងដោះសោរលើស្មាតហ្វូនស៊េរីថ្មីនេះ ដោយការប្រើប្រាស់ក្រយ៉ៅម្រាមដៃ (Fingerprint Scanner)។
5. មុខងារតភ្ជាប់៖ នៅលើស្មាតហ្វូន K10 មានមុខងារតភ្ជាប់សម្រាប់ចែករំលែកទិន្នន័យទៅមកដោយឥតប្រើខ្សែដូចជាប្រព័ន្ធបច្ចេកវិទ្យាប្លូធូស v4.2, A2DP, LE, NFC, Wi-Fi 802.11 b/g/n, Wi-Fi Direct និងhotspot ជាដើម។
សរុបសេចក្តីមក LG K10 (2017) គឺជាស្មាតហ្វូនថ្នាក់មធ្យមដែល LG ផលិតឡើងសម្រាប់ទីផ្សារអ្នកប្រើប្រាស់ដែលមានចំនូលមធ្យមជាវយកទៅប្រើប្រាស់។ ហើយបើគន់គូរមើលទៅលើគុណសម្បត្តិសម្រាប់ការប្រើប្រាស់ទូទៅ និងគុណភាពនៃការផលិតរបស់ពួកវាគឺពិតជាសាកសមបំផុតទៅនឹងតម្លៃ។ តួរយ៉ាងដូចជាវាមានរូបរាងស្រស់ស្អាត កាមេរ៉ាថតរូប និងវីដេអបានច្បាស់ល្អអាចទទួលយកបាន កញ្ចក់អេក្រង់ផុសទំហំធំល្មមបង្ហាញចេញនូវពន្លឺ និងពណ៌ធម្មជាតិភ្លឺច្បាស់ត្រជាក់ភ្នែក មានកម្មវិធី និងមុខងារប្រើប្រាស់ថ្មីៗទំនើបច្រើនសម្បូរបែបបំពេញបានតាមសេចក្តីត្រូវការនៃអ្នកប្រើប្រាស់។ LG K10 គឺស្មាតហ្វូនស៊េរីថ្មី ជម្រើសថ្មី បទពិសោធន៍ប្រើប្រាស់ថ្មី សមតាមអ្វីដែលអ្នករាល់គ្នាត្រូវការ។ រីឯតម្លៃវិញ ក៏ពិេសសផងដែរ គឺត្រឹមតែ 230 ដុល្លា តែប៉ុណ្ណោះ មានថែមស្រោមការពារ Original មួយ បូករួមជាមួយនឹងការផ្តល់ជូននូវអត្ថប្រយោជណ៍ជាច្រើនទៀត៕