នៅថ្ងៃទី 29 ខែមេសា ឆ្នាំ 2017 ពិព័ណ៌វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) បានបើកទ្វារ សម្រាប់អនាគតកុមារកម្ពុជា ដែលមានកុមាររាប់រយនាក់មកពីខេត្តក្រុងនៃព្រះរាជាណាចក្រកម្ពុជា នៅមជ្ឈមណ្ឌល និងសន្និបាតកោះពេជ្រ។ ពិព័ណ៌ «វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា» ដែលហៅកាត់ថា (STEM) ឆ្នាំ 2017 នេះ ត្រូវបានរៀបចំឡើងក្នុងគោលបំណងចិញ្ចឹមអនាគតអ្នកវិទ្យាសាស្ត្រ និងវិស្វករសម្រាប់កម្ពុជា ដែលនេះ គឺជាលើកទី 13 នៅប្រទេសកម្ពុជាហើយ។
គួរបញ្ជាក់ថា STEM ឆ្នាំ 2017 នេះ គឺមានការចូលរួមបង្ហាញពីគំនិតច្នៃប្រឌិតថ្មីៗ ជាច្រើនជាងមុន ដែលលើកគឺបានឆ្លុះបញ្ចាំងពីភាពរីកចំរើននៃគំនិតថ្មីៗរបស់កម្ពុជា។ ពិព័ណ៌វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា STEM ឆ្នាំ 2017 នេះ អាចដំណើរការទៅបាន គឺមានការចូលរួមឧបត្ថម្ភពីក្រុមហ៊ុន សាមសុង និងក្រុមហ៊ុនជាច្រើនទៀត។
ក្រុមហ៊ុនសាមសុង គឺជាក្រុមហ៊ុនឈានមុខគេលើសកលលោក ក្នុងការផ្តល់ឧបករណ៌អេឡិចត្រូនិច និង ទូរស័ព្ទដៃ ដែលមានទស្សនវិស័យ “INSPIRE THE WORLD, CREATE THE FUTURE” ជាមួយការប្តេជ្ញាចិត្ត ក្នុងការចូលរួមយ៉ាងសកម្ម និងឧបត្ថម្ភសម្រាប់កម្មវិធី STEM ក្នុងឆ្នាំនេះ។ លោកជា សុជាតិ ប្រធានផ្នែកទីផ្សារនៃសាខាក្រុមហ៊ុនថៃសាមសុងអេឡិចត្រូនិចប្រចាំប្រទេសកម្ពុជា បានមានប្រសាសន៍ថា «ដូចដែលអ្នកធ្លាប់បានដឹងរួចមកហើយ បេសកកម្មរបស់ក្រុមហ៊ុនសាមសុងគឺ “ធ្វើឲ្យពិភពលោកសម្បូរបែបទៅដោយភាពប្រឌិតខ្ពស់ផ្នែកបច្ចេកវិទ្យា, ផលិតផល, និងការរចនា ដែលធ្វើឲ្យជីវិតកាន់តែប្រសើរឡើង ប្រកបដោយទំនួលខុសត្រូវកិច្ចការសង្គម ហើយមាននិរន្តរភាព។ កាន់តែអស្ចារ្យជាងនេះ ទៅទៀត ដោយសារបេសកកម្មរបស់យើងនេះ ធ្វើឲ្យយើងបានរួមចំណែកក្នុងកម្មវិធីដ៏អស្ចារ្យមួយនេះ»។
ការតាំងពិព័រណ៍ វិទ្យាសាស្រ្ត បច្ចេកវិទ្យា វិស្វកម្ម និងគណិតវិទ្យា លើកទី 13 សិស្សានុសិស្ស នឹងបង្ហាញការងារទាក់ទិនទៅនឹងវិទ្យាសាស្រ្ត ហើយមានឱកាសធ្វើអន្តរកម្មជាមួយសិស្ស និងគ្រូបង្រៀន ផ្សេងៗទៀតផង។ ការតាំងពិព័រណ៍ប្រកបដោយជំនាញវិជ្ជាជីវៈដូចជា ក្រុមហ៊ុន សាមសុង និងដៃគូ ផ្សេងទៀត នឹងត្រូវបានដាក់បង្ហាញ ដើម្បីផ្តល់ឱកាសក្នុងការផ្លាស់ប្តូរគំនិត សិក្សាពីគ្នាទៅវិញទៅមកអំពីហេតុផល និងវិធីសាស្រ្តរបស់ខ្លួនក្នុងការដោះស្រាយបញ្ហាផ្នែកបច្ចេកទេស និងវិទ្យាសាស្រ្ត។
ការតាំងពិព័រណ៍ វិទ្យាសាស្រ្ត បច្ចេកវិទ្យា វិស្វកម្ម និងគណិតវិទ្យា លើកទី 13 នេះគឺប្រារព្ធធ្វើទ្បើងរយះពេលពីរថ្ងៃ គឺចាប់នៅថ្ងៃទី 29 និង 30 ខែមេសា ឆ្នាំ 2017 នៅអាគារ A, B និង C មជ្ឈមណ្ឌលពិព័រណ៍ និងសន្និបាតកោះពេជ្រ ។ សូមអញ្ជើញមកចូលរួមក្នុងព្រឹត្តិការណ៍ដ៏អស្ចារ្យនេះ ជាមួយយើងទាំងអស់គ្នា! សម្រាប់ព័ត៌មានបន្ថែមអំពី STEM CAMBODIA: http://www.stemcambodia.ngo/
