នាពេលបច្ចុប្បន្ននេះ នៅលើគេហទំព័ររបស់ក្រុមហ៊ុនបច្ចេកវិទ្យា ASUS គឺបានដាក់បង្ហាញនូវសា្មតហ្វូនស៊េរីថ្មី Zenfone Zoom S ។ ស្មាតហ្វូននេះ គឺដូចគ្នាទៅនឹងលេខកូដម៉ូដែលរបស់ Zenfone 3 Zoom ដែលមានន័យថា ក្រុមហ៊ុន ASUS ផ្លាស់ប្តូរឈ្មោះថ្មី របស់ស្មាតហ្វូននេះ គឺសម្រាប់ចេញលក់នៅលើទីផ្សារផ្សេងៗគ្នាជាច្រើននៅក្នុងតំបន់អាស៊ីដូចជា ប្រទេសឥណ្ឌូនេស៊ី ប្រទេសថៃ និងប្រទេសម៉ាឡេស៊ីជាដើម។ ពាក្យចចាមអារ៉ាមមុននេះ បានបង្ហាញថា ស្មាតហ្វូន Zenfone S មានអេក្រង់តូចជាងត្រឹមតែ 5.2 អ៊ីងខណៈ ពេលដែលវត្តមានរបស់ស្មាតហ្វូននេះ ជាផ្លូវការគឺអេក្រង់ទំហំ 5.5 អ៊ីងដូចគ្នាទៅនឹងស្មាតហ្វូន Zenfone 3 Zoom។
ស្មាតហ្វូន Zenfone Zoom S ប្រើប្រាស់នូវកាមេរ៉ាភ្លោះ Sony IMX362 sensors (12MP) ជាមួយនឹង f/1.7 lenses ។ កាមេរ៉ានេះអាចធ្វើការ Zoom បានកម្រិតដល់ទៅ 2.3x គ្មានការបាត់បង់នូវភាពច្បាស់នៃរូបភាពនោះទេ។ ដើម្បីរក្សារូបភាពអោយមានលំនឹង កាមេរ៉ានេះប្រើប្រាស់នូវមុខងារ OIS និង EIS ផងដែរ។ បើសិនជាលោកអ្នកបន្ថែមនូវ Digital Zoom នោះវាអាចធ្វើការ Zoom បានកម្រិត 12X ។ ក្រុមហ៊ុនបច្ចេកវិទ្យា ASUS អះអាងថា កាមេរ៉ា Zenfone Zoom S មានកម្រិតពន្លឺខ្ពស់ជាង iPhone 7 Plus ដល់ទៅ 2.5 ដង។
អ្វីដែលកាន់តែពិសេសជាងនេះទៀតនោះ ស្មាតហ្វូន Zenfone Zoom S ប្រើប្រាស់នូវមុខងារ DualPixel phase-detection Autofocus ដូចគ្នាទៅនឹងស្មាតហ្វូន Galaxy S7 ។ មុខងារនេះ អនុញ្ញាតឱ្យកាមេរ៉ាប្រើប្រាស់នូវកម្រិតភិចសែលបានខ្ពស់បំផុត។ ក្រៅពីនេះ វាមានប្រើប្រាស់នូវ “RGB color correction sensor” ដែលជំនួយសម្រាប់មើលវីដេអូប្រភេទ 4K កម្រិតពណ៌ធម្មជាតិស្រស់ស្អាតបំផុត។
Zenfone S មានកម្រិត Aperture និង Pixels ធំ។ ក្រុមហ៊ុន ASUS ផ្តោតសំខាន់ទៅលើបច្ចេកវិទ្យាកាមេរ៉ា ហើយស្មាតហ្វូនស៊េរីថ្មីនេះ ពិតជាអាចប្រកួតប្រជែងបានជាមួយនឹងទូរស័ព្ទ Apple iPhone 7 Plus។ ស្មាតហ្វូន Zenfone Zoom S បំពាក់នូវថាមពលថ្មទំហំ 5,000 mAh ដែលលោកអ្នកអាចប្រើប្រាស់ បានពេញមួយថ្ងៃដោយគ្មានបញ្ហានោះទេ។ ក្រុមហ៊ុន ASUS បន្ថែមទៀតថា ស្មាតហ្វូននេះ អាចមានតួនាទីជា Power Bank សម្រាប់បញ្ជូលថាមពលទៅកាន់ស្មាតហ្វូនស៊េរីទំហំដូចគ្នាបានផងដែរ។ សរុបមក ស្មាតហ្វូន Zenfone Zoom S គឺជាស្មាតហ្វូន Zenfone 3 Zoom ខុសគ្នាតែឈ្មោះប៉ុណ្ណោះ៕
សំរាប់ការមកដល់ប្រទេសកម្ពុជា ស្មាតហ្វូន Asus "Zenfone Zoom S" ឬ "Zenfone 3 Zoom" គឺមានតម្លៃ 515 ដុល្លារ រួមជាមួយនិងការបន្ថែមនូវកាដូយ៉ាងច្រើនទៀតផង។ លោកអ្នក អាចរកជាវបាននៅគ្រប់បណ្តាហាងលក់ទូរស័ព្ទនានានៅទូទាំងប្រទេសកម្ពុជា។
