បុគ្គលិកក្រុមហ៊ុន Samsung ស្ម័គ្រចិត្តបរិច្ចាគឈាមដើម្បីជួយសម្រួលដល់ការខ្វះខាតឈាមនៃមជ្ឈមណ្ឌលជាតិផ្តល់ឈាម (NBTC)

នៅថ្ងៃទី 19 ខែឧសភា ឆ្នាំ 2017 នេះ នៅមជ្ឈមណ្ឌលជាតិផ្តល់ឈាម (NBTC) មានបុគ្គលិករបស់ក្រុមហ៊ុន Thai Samsung Electronics សាខាកម្ពុជា ជាច្រើនរូប បានរួបរួមគ្នាជាច្មីម្តងទៀត ដើម្បីបរិច្ចាគឈាមជូនដល់មជ្ឈមណ្ឌលជាតិផ្តល់ឈាម (NBTC) ដែលកំពុងតែត្រូវការឈាមជាច្រើនរៀងរាល់ថ្ងៃ ក្នុងការជួយជិវិតរបស់អ្នកជំងឺ។ តាមការបញ្ជាក់របស់ក្រុមហ៊ុន Samsung បានអោយដឹងថា «កម្មវិធីបរិច្ចាគឈាមក្រុមហ៊ុន Samsung » គឺជាផ្នែកមួយនៃកម្មវិធី Samsung Love & Care ដែលក្រុមហ៊ុន Samsung តែងតែផ្តល់នូវក្តីស្រលាញ់ និងការយកចិត្តទុកដាក់ចំពោះប្រជាជនកម្ពុជាតាមរយៈសកម្មភាពសង្គមនានា។ ជាក់ស្តែងសកម្មភាពស្ម័គ្រចិត្តបរិច្ចាគឈាមរបស់ បុគ្គលិកសាមសុងថ្ងៃនេះគឺមានគោលដៅតែមួយគត់ ដើម្បីឆ្លើយតបទៅនឹងតម្រូវការសំខាន់នៃការផ្គត់ផ្គង់ឈាមដើម្បីជួយសង្គ្រោះជីវិតមនុស្ស។

លោក Seungho Choi អគ្គនាយកគ្រប់គ្រងសាខាក្រុមហ៊ុនThai Samsung Electronics ប្រចាំប្រទេសកម្ពុជា បានមានប្រសាសន៍ថា៖ ក្រុមហ៊ុន Samsung ស្ថិតនៅទីនេះ ដើម្បីជម្រុញឲ្យផ្នែក បច្ចេកវិទ្យា ផលិតផល និងការច្នៃប្រឌិតរបស់យើង ហើយយើងសង្ឃឹមថានឹងអាចធ្វើឲ្យជីវិតមនុស្សកាន់តែប្រសើរ។ Samsung ថែមទាំងជឿជាក់ថា ការកសាងសង្គមប្រកបដោយទំនួលខុសត្រូវ និងការយកចិត្តទុកដាក់គឺចាប់ផ្តើមចេញពីយើងម្នាក់ៗ។ ដូច្នេះហើយ បានជាយើងធ្វើការបរិច្ចាគឈាមនេះ ជារៀងរាល់ឆ្នាំ ហើយយើងធ្វើវាពីចេញពីក្រអៅបេះដូងរបស់យើង។ ជាចុងក្រោយ ក្រុមហ៊ុន ក៏សូមសំនូមពរឲ្យសាធារណជន និងប្រិយមិត្តអ្នកអានទាំងអស់ ដែលគិតថា ខ្លួនមានសុខភាពល្អគ្រប់គ្រាន់ដើម្បីផ្តល់ជូនឈាមសម្រាប់អ្នកដែលត្រូវការជាបន្ទាន់ ដោយទំនាក់ទំនងទៅកាន់មជ្ឈមណ្ឌលជាតិផ្តល់ឈាមតាមរយៈទូរស័ព្ទលេខ 092 99 8000។