បន្ទាប់ពីបានបើកសម្ពោធជាផ្លូវការ នាពេលថ្មីៗនេះ ទូរស័ព្ទ Nokia 3310 ស៊េរីថ្មី បានចេញលក់ជាផ្លូវការនៅក្នុងប្រទេសកម្ពុជាយើងហើយនៅថ្ងៃនេះ ដែលមានតម្លៃ 48 ដុល្លា។ រឿងដែលគួរអោយភ្ញាក់ផ្អើលបំផុតនោះ គឺពេលដែលចេញលក់ភ្លាម អស់ពីស្តុកភ្លាមតែម្តង នេះបើតាមការបញ្ជាក់របស់លោក Sopheng Kieng អ្នកតំណាងក្រុមហ៊ុន HDM Globle (Nokia) ប្រចាំនៅប្រទេសកម្ពុជា។ លោកបានបន្តថា នេះគឺដោយសារតែមានការកម្ម៉ង់ទុកជាមុនកាលពីថ្ងៃបើកសម្ពោធមានចំនួនច្រើនលើសកំណត់។ Nokia 3310 ដែលបានចេញលក់ថ្ងៃនេះ គឺមាន 4 ពណ៌ គឺក្រហម និងលឿង ដែលមានសម្បករលោង ចំណែកប្រផេះ និងខៀវ មានសម្បកគ្រើម។
Nokia 3310 ត្រូុវបានផ្លាស់ប្តូររូបរាងទាំងស្រុង គឺមានកំរ៉ាស់ស្តើង ហើយស្រាល និងមានសមត្ថភាពប្រើធន់បានយូរគ្មានទូរស័ព្ទណាដូច នោះទេ ដោយបានធ្វើឱ្យ Nokia 3310 ជំនាន់ថ្មីនេះ ក្លាយទៅជាទូរស័ព្ទ ដែលលក់ដាច់បំផុតមួយក្នុងប្រវត្តិសាស្ត្រ។ Nokia 3310 ត្រូវបានផលិតជាថ្មីជាមួយកំណែប្រែថ្មី ដោយសារតែវាមានពណ៌ស្រស់ស្អាត ការរចនាមានលក្ខណៈទំនើប ពិសេសកាន់ថ្មបានយូរ ដោយអាចនិយាយបានរហូតដល់ 22 ម៉ោង ហើយបើគ្រាន់តែ ទុកសម្រាប់ទទួលការហៅចូលវិញ គឺអាចទុកបានដល់ទៅមួយខែឯណោះ។ លក្ខណះពិសេសនៃទូរស័ព្ទថ្មីនេះ គឺអ្នកប្រើប្រាស់អាចផ្ញើសារ ហើយនិងអាចនិយាយបានពេញមួយថ្ងៃ ថតរូប ស្តាប់ចម្រៀង និងលេងហ្គេមពស់ដ៏ល្បីល្បាញជាថ្មីម្តងទៀត ដោយប្រើថាមពលថ្មតែមួយ។ រីឯថាមពលថ្ម សមត្ថភាពកាន់ថ្មបានយូររហូតដល់ពេញមួយខែ។ និយាយរួម គឺមាន Nokia 3310 គឺមានអ្វីៗគ្រប់យ៉ាងដែលអ្នកធ្លាប់ស្គាល់ និងស្រឡាញ់។