បើទោះបីជាមនុស្សភាគច្រើននាពេលបច្ចុប្បន្ននេះ បានចាប់ផ្តើមចាប់អារម្មណ៍ទៅលើស្មាតហ្វូនស៊េរីថ្មីៗ ដែលមានអេក្រង់កាន់តែធំឡើងៗក្តី ថ្មីៗនេះ ក្រុមហ៊ុន HUAWEI បានបង្ហាញនូវថេប្លេតស៊េរីថ្មីរបស់ខ្លួនម៉ូដែល MediaPad M3 Lite 8 ដែលមានរូបរាងស្រស់ស្អាត ស៊ីវិល័យ ទាន់សម័យ និងគួរអោយចង់ប្រើប្រាស់ជាទីបំផុត។ ថេប្លេតនេះ ទើបតែប្រកាសបង្ហាញខ្លួននៅក្នុងខែមិថុនា ឆ្នាំ 2017 នេះជាមួយនឹងលក្ខណៈសម្បត្តិពិសេសៗជាច្រើន។ បើពិនិត្យទៅលើកម្រាស់របស់ថេប្លេតនេះ គឺត្រឹមតែ 7.5 មម ដែលពិតជាងាយស្រួលមែនទែន នៅក្នុងការយកតាមខ្លួនបានគ្រប់ទីកន្លែង ហើយវាមានទម្ងន់ត្រឹមតែ 310 ក្រាម ដែលមិនធ្វើអោយលោកអ្នករោយដៃនោះទេ នៅពេលចាប់កាន់ថេប្លេតនេះ។ MediaPad M3 Lite 8 មិនត្រឹមតែពង្រឹងទៅលើថាមពលថ្មខ្លាំងប៉ុណ្ណោះទេ វាថែមទាំងពង្រឹងទៅលើប្រព័ន្ធកាមេរ៉ា និងកម្លាំងម៉ាស៊ីនផងដែរ។
ការរចនារូបរាងដ៏ពេញនិយម
ថេប្លេតស៊េរីថ្មី MediaPad M3 Lite 8 មានការរចនារូបរាងយ៉ាងស្រស់ស្អាតភ្ជាប់ជាមួយអេក្រង់ទំហំ 8 អ៊ីង និងកម្រាស់ត្រឹមតែ 7.5 មមតែប៉ុណ្ណោះ។ ថេប្លេតស៊េរីថ្មីនេះពិតជាមានរូបរាងស៊ីវិល័យ សក្តិសមក្នុងការប្រើប្រាស់សម្រាប់មនុស្សគ្រប់វ័យតែម្តង។ ក្រឡេកទៅមើលការរចនារូបរាងរបស់ថេប្លេតស៊េរីថ្មី MediaPad M3 Lite 8 វិញម្តង នៅផ្ទាំងផ្នែកខាងមុខលើអេក្រង់រាបស្មើរនេះ គេសង្កេតឃើញមានតួអក្សរ HUAWEI ស្ថិតនៅគែមខាងឆ្វេង និងកាមេរ៉ាខាងមុខនៅចំណុចកណ្តាលខាងលើតែម្តង។ ចំនែកនៅផ្នែកខាងក្រោមវិញគេសង្កេតឃើញមានតែប៊ូតុង Home ដែលមានការរចនារូបរាងទ្រវែងតែមួយប៉ុណ្ណោះនៅចំចំណុចកណ្តាល។ ក្រឡេកទៅមើលផ្នែកគែមខាងស្តាំរបស់ថេប្លេតស៊េរីថ្មីនេះវិញ គេសង្កេតឃើញមានប៊ូតុងចំនួន 3 គឺប៊ូតុងឡើងចុះសំឡេងស្ថិតនៅលើប៊ូតុងបិទបើក~ចាក់សោរ ហើយនៅខាងក្រោមគេក៏សង្កេតឃើញមានរន្ធសម្រាប់ដាក់ស៊ីម ឬម៉េមូរីបន្ថែមប្រភេទ microSD ថែមទៀតផង ខណៈពេលដែលនៅគែមខាងឆ្វេងមិនមានរន្ធ ឬប៊ូតុងអ្វីនោះទេ។
ចំនែកផ្នែកខាងក្រោយរបស់ស្មាតហ្វូននេះវិញគឺធ្វើពីលោហធាតុដ៏រឹងម៉ាំដែលផ្នែកខាងលើគេសង្កេតឃើញមានកាមេរ៉ាមួយគ្រាប់ស្ថិតនៅលើជ្រុងផ្នែកខាងឆ្វេង ហើយនៅជិតពាក់កណ្តាលគេសង្កេតឃើញមានពាក្យថា HUAWEI ដែលដំណាងអោយម៉ាកយីហោរបស់ក្រុមហ៊ុន។ នៅខាងក្រោមនៃផ្នែកខាងក្រោយរបស់ថេប្លេតស៊េរីថ្មី MediaPad M3 Lite 8 នេះគេឃើញមានអក្សរ Harman/Kardon ដែលយើងអាចដឹងថាថេប្លេតនេះពិតជាបំពាក់នូវប្រព័ន្ធសំឡេងកម្រិតខ្ពស់ជាក់ជាមិនខាន។ នៅផ្នែកខាងក្រោមរបស់ថេប្លេតស៊េរីថ្មីនេះ គេសង្កេតឃើញមានរន្ធសម្រាប់ Charging ប្រភេទ micro-USB 2.0 និងឧបាល័រដែលមានរន្ធចំនួន 7 សម្រាប់បញេ្ចញសំឡេងពិរោះរណ្តំចិត្ត ហើយផ្នែកខាងលើគេសង្កេតឃើញមានរន្ធមួយសម្រាប់ដោតកាសស្តាប់ផងដែរ។ ថេប្លេតស៊េរីថ្មីនេះមាន 3 ពណ៌សម្រាប់ជ្រើសរើសគឺពណ៌ស ពណ៌មាស និងពណ៌ប្រផេះ។
ប្រព័ន្ធដំណើរការខ្លាំង ការកម្សាន្តគ្មានដែនកំណត់
ថេប្លេតស៊េរីថ្មី MediaPad M3 Lite 8 បំពាក់ជាមួយនឹងបន្ទះឈីប Qualcomm MSM8940 Snapdragon 435 ដែលមានអង្គគណនាប្រភេទ Octa-core 1.4 GHz Cortex-A53 និងក្រាហ្វិកកាតប្រភេទ Adreno 505 ដែលអាចដំណើរការកម្មវិធី ឬហ្គេមដែលមានក្រាហ្វិកធំបានយ៉ាងរលូន។ បន្ថែមពីនេះទៀត ថេប្លេតនេះបំពាក់នូវអង្គចងចាំផ្ទុកទិន្នន័យបណ្តោះអាសន្នទំហំ 3GB/4GB ម៉េមូរីក្នុងម៉ាស៊ីនទំហំ 32GB/64GB ហើយថែមទាំងទ្រទ្រង់ម៉េមូរីបន្ថែមប្រភេទ microSD កាតទំហំដល់ទៅ 256GB ។ អ្វីដែលកាន់តែពិសេសជាងនេះទៀតនោះ ថេប្លេតនេះដំណើរការប្រព័ន្ធប្រតិបត្តិការ Android 7.0 (Nougat) ដែលនាំយកជាមួយនឹងកម្មវិធី Software ថ្មីៗ និង EMUI 5.1 ថែមទៀតផង។ ថេប្លេតស៊េរីថ្មីនេះទ្រទ្រង់នូវប្រព័ន្ធ Wi-Fi 802.11 a/b/g/n/ac, hotspot ប្រព័ន្ធ Bluetooth 4.0, A2DP ប្រព័ន្ធ GPS (A-GPS, GLONASS, BDS) និងសែនស័រជាច្រើនទៀត។ សម្រាប់លោកអ្នកដែលចូលចិត្តការកម្សាន្តនោះ លោកអ្នកនឹងគ្មានការព្រួយបារម្ភនោះទេដោយសារតែថេប្លេតស៊េរីថ្មីនេះភ្ជាប់ជាមួយថាមពលថ្មខ្លាំងកម្លាំង 4800mAh ដែលអាចធានាដល់ការប្រើប្រាស់បានពេញមួយថ្ងៃ។
កាមេរ៉ាដ៏ឆ្លាតវៃ និងអេក្រង់ភ្លឺច្បាស់
MediaPad M3 Lite 8 មានអេក្រង់ទំហំ 8 អ៊ីងកញ្ចក់ប្រភេទ S-IPS LCD capacitive touchscreen ដែលទ្រទ្រង់ 16 លានពណ៌ ហើយវាមានកម្រិតភាពច្បាស់ដល់ទៅ 1200 x 1920 ភិចសែល។ បើធៀបទំហំអេក្រង់ជាមួយនឹងតួខ្លួនរបស់វានោះគឺប្រហែលជា 70.6% ។ បើពិនិត្យទៅលើប្រព័ន្ធកាមេរ៉ាខាងក្រោយរបស់ថេប្លេតនេះមានទំហំ 8 មេហ្គាភិចសែលភ្ជាប់ជាមួយនឹងមុខងារ autofocus, Geo-tagging, touch focus, face detection ហើយថែមទាំងអាចថតវីដេអូនៅក្នុងកម្រិត [email protected] ថែមទៀតផង។ ប្រព័ន្ធកាមេរ៉ាខាងមុខរបស់ថេប្លេតនេះមានទំហំ 8 មេហ្គាភិចសែលដែលពិតជាងាយស្រួលក្នុងការថតរូប Selfies និងការប្រើប្រាស់មុខងារវីដេអូខល។ ការសន្និដ្ឋាន៖ ថេប្លេត MediaPad M3 Lite 8 ស៊េរីថ្មីរបស់ក្រុមហ៊ុនបច្ចេកវិទ្យា HUAWEI មិនត្រឹមតែមានរូបរាងស្រស់ស្អាត ពោរពេញដោយសមត្ថភាពនោះទេ ប៉ុន្តែវាក៏អាចប្រើប្រាស់ជំនួយទៅលើការកម្សាន្តរបស់លោកអ្នកគ្មានដែនកំណត់នោះទេ។ អ្វីដែលកាន់តែពិសេសជាងនេះទៀត ថេប្លេតនេះប្រើប្រាស់នូវបច្ចេកវិទ្យាប្រព័ន្ធសំឡេងកម្រិតខ្ពស់ដែលធានាទៅលើគុណភាពសំឡេងលឺច្បាស់ពិរោះរងំថែមទៀតផង។ MediaPad M3 Lite 8 មានសមត្ថភាពមិនចាញ់ថេប្លេតស៊េរីថ្មីរបស់ក្រុមហ៊ុនបច្ចេកវិទ្យាក្រុមហ៊ុនផ្សេងនោះទេ៕
