កាលពីថ្ងៃទី 19 ខែធ្នូ ឆ្នាំ 2016 នៅសណ្ឋាគារ Intercontinental ក្រុមហ៊ុន Tech MAX Group ដែលជាក្រុមហ៊ុនទទួលបានសិទ្ធិស្របច្បាប់ ក្នុងការចែកចាយផ្តាច់មុខផលិតផលម៉ាក JABRA នៅក្នុងទីផ្សារនៃព្រះរាជាណាចក្រកម្ពុជា បានរៀបចំពិធីសម្ពោធជាផ្លូវការ ក៏ដូចជាប្រកាសនាំមកនូវផលិតផលប្លូ៊ធូស និងកាសសន្ទនា (Call Center) រួមនឹងឧបករណ៍បំពងសំលេង សំរាប់បំពេញតំរូវការអតិថិជនកម្ពុជា។ ពិធីដ៏មហោឡារឹកនេះ គឺមានការអញ្ជើញចូលរូមពីសំណាក់លោក Staporn Sambhavaphala នាយកគ្រប់គ្រងក្រុមហ៊ុន JABRA ប្រចាំប្រទេសថៃ និងឥណ្ឌូចិន និងលោក ប៉ាង វិធាន នាយកគ្រប់គ្រងក្រុមហ៊ុន Tech MAX Group រួមជាមួយនឹងភ្ញៀវកិត្តិយស តំណាងក្រុមហ៊ុន និងអ្នកចែកចាយបន្តជាច្រើនរូប។
លោក ប៉ាង វិធាន បានមានប្រសាសន៍ថា ទស្សនៈវិស័យរបស់ក្រុមហ៊ុន Tech MAX Group គឺផ្តល់ជូននូវរាល់បច្ចេកវិទ្យាទំនើបៗបំផុតរបស់ពិភពលោក ចូលមកកាន់ទីផ្សារព្រះរាជាណាចក្រកម្ពុជា។ សព្វថ្ងៃនេះ ក្រុមហ៊ុន បានកំណត់ចេញនូវការបោះជំហានថ្មីមួយ ជាមួយនឹងឧស្សាហកម្មផ្នែកទំនាក់ទំនងឥតខ្សែ គឺផលិតផលម៉ាក JABRA ដែលជាប្រ៊ែនស៍លំដាប់លេខ 1 ដែលបានគ្របដណ្តប់លើទីផ្សារពិភពលោក អស់រយៈពេលជាង 30 ឆ្នាំកន្លងមកហើយ។ Tech MAX Group ពិតជាមានមោទនភាពយ៉ាងខ្លាំង ក្នុងការទទួលយកប្រ៊ែនស៍ JABRA ក្នុងនាមជាក្រុមហ៊ុនស្របច្បាប់ ដែលទទួលបានសិទ្ធិចែកចាយផ្តាច់មុខក្នុងព្រះរាជាណាចក្រកម្ពុជា។
Tech MAX Group មានជំនឿថា ក្រុមហ៊ុនកំពុងតែចាប់ផ្តើមឈានជំហានទី 1 នៅទីនេះជាមួយនឹងផលិតផល JABRA។ ក្រុមហ៊ុន ក៏មានគម្រោងនាំចូលមកកាន់ទីផ្សារព្រះរាជាណាចក្រកម្ពុជា នូវ Consumer Products ម៉ាកល្បីៗជាច្រើនផ្សេងទៀត ដែលពិភពលោកទទួលស្គាល់ ជូនដល់សហគ្រាស ខ្នាតតូច និងខ្នាតមធ្យម (SME) នាពេលអនាគតដ៏ខ្លីខាងមុខនេះ។
លោក ប៉ាង វិធាន បានបន្តថា " កម្ពុជាយើង គឺជាប្រទេសមួយក្នុងសមាគមន៍អាស៊ាន ដែលមានកំណើនសេដ្ឋកិច្ចលឿនបំផុត គឺសំរេចបានកំណើនផលិតផលក្នុងស្រុកសរុប (GDP) ជាង 7.3% ព្រមទាំងមានការព្យាករណ៍ថា ទីផ្សារប្រើប្រាស់ Electronic របស់យើង នឹងកើនឡើងរហូតដល់ 4% ក្នុងរយៈពេល 5 ឆ្នាំខាងមុខនេះ។ ជាមួយនឹងកំណើននៃការប្រើប្រាស់នេះហើយ ដែលយើងខ្ញុំមើលឃើញថា ការបង្ហាញជូននូវផលិតផល Electronic ជូនដល់ទីផ្សារបច្ចេកវិទ្យា គឺជាយុទ្ធសាស្ត្រដ៏ត្រឹមត្រូវ។" បន្ថែមពីលើនេះ ក្នុងនាមជាស្ថានប័នមួយ លោកក៏បានស្វះស្វែងបង្កើតអោយបាន នូវសហគមន៍មួយដែលមានការអភិវឌ្ឍន៍ជឿនលឿន និងមានការអប់រំខ្ពស់ ក្នុងការផ្តល់ជូនដល់យុវវ័យសម័យនេះ នូវមធ្យោបាយដ៏ប្រសើរ ដើម្បីអោយពួកគេសម្រេចបាននូវជោគជ័យដ៏អស្ចារ្យ។
លោក ប៉ាង វិធាន បានបញ្ជាក់បន្ថែមថា " យើងមានជំនឿយ៉ាងមុតមាំថា តាមរយៈការធ្វើជំនួញដោយភាពស្មោះត្រង់ និងប្រកបដោយក្រមសីលធម៌ នោះនឹងជំរុញអោយពួកយើងទាំងអស់គ្នា អាចឈានទៅកាន់ភាពជោគជ័យជាក់ជាមិនខាន។ ជាមួយនឹងការចែកចាយរាល់ព័ត៌មានរបស់ Tech MAX Group គឺប្រាកដជាអាចជួយលោកអ្នក អោយសម្រេចបានជោគជ័យប្រកបដោយកំនើនប្រាក់ចំណេញខ្ពស់ជាក់ជាមិនខាន។ ជាមួយគ្នានេះ Tech MAX Group ក៏បានរៀបចំបែងចែករួចជាស្រេច នូវចំណែកប្រាក់ចំណេញ ក៏ដូចជា rebate Programs យ៉ាងពិសេស គួរជាទីពេញចិត្ត ជូនដល់គ្រប់ដៃគូរសហការទាំងអស់។ យើងនឹងសម្រេចជោគជ័យទាំងអស់គ្នា" ។
សូមជំរាបថា Tech MAX Group បានក្លាយជាដៃគូស្របច្បាប់លើវិស័យអប់រំជាមួយ Edulink International Campus ក្នុងការផ្តល់ជូនដល់យុវវ័យសម័យនេះ នូវមធ្យោបាយដើម្បីទទួលបានឱកាសសិក្សាកំរិតបរិញ្ញាប័ត្រ នៅមហាវិទ្យាល័យល្បីៗលើពិភពលោក រួមមានមហាវិទ្យាល័យ Greenwich មហាវិទ្យាល័យ Nothamton នៃចក្រភពអង់គ្លេសជាដើម ដោយចំណាយពេលវេលា និងថវិកាតិចជាងមុន។
