ស្របពេលដែលទីផ្សារម៉ាស៊ីនកុំព្យូទ័រប្រភេទ Gaming Laptop កំពុងមានសន្ទុះខ្លាំងក្រុមហ៊ុនផលិតកុំព្យូទ័រល្បីៗក្នុងពិភពលោកបានធ្វើការផលិតចេញនូវម៉ាស៊ីនកុំព្យូទ័រប្រភេទនេះដើម្បីប្រកូតប្រជែងក្នុងទីផ្សារ និងបំពេញសេចក្តីត្រូវការនៃអ្នកប្រើប្រាស់។ Asus គឺជាក្រុមហ៊ុនផលិតកុំព្យូទ័ររបស់កោះតៃវ៉ាន់ដែលមានភាពល្បីល្បាញជាយូរឆ្នាំមកហើយ ហើយម៉ាស៊ីនកុំព្យូទ័រហ្គេមីងដែលទទួលបានការគាំទ្រខ្លាំងពី Gamer គ្រប់រូបនោះគឺម៉ាក ROG (Republic Of Gamer)។ ហើយថ្មីៗនេះ Asus ទើបតែបានធ្វើការបង្ហាញចេញនូវម៉ាស៊ីនកុំព្យូទ័រហ្គេមីងស៊េរីថ្មីរបស់ខ្លួនម៉ូដែល Asus ROG Strix SCAR II GL704 ដែលជាការ Upgrade ចេញពីជំនាន់មុនក្នុងក្រកូល ROG របស់វា។
ម៉ាស៊ីនកុំព្យូទ័រស៊េរីថ្មីនេះត្រូវបានក្រុមហ៊ុនធ្វើការវិវត្តិន៍ឡើងអោយកាន់តែមានភាពប្រសើរជាងម៉ាស៊ីនជំនាន់មុនដោយបំពាក់នូវអេក្រង់ដែលមានគែមស្តើង (Thin-bezel) ធំទូលាយទំហំ 17.3 អ៊ីងប្រភេទកញ្ចក់បង្ហាញ AUO AHVA IPS panels ដែលជាកញ្ចក់អេក្រង់មានគុណភាពបង្ហាញចេញក្នុងកម្រិតខ្ពស់មានភាពភ្លឺច្បាស់ មានពណ៌ច្បាស់ដិតល្អ និងសាច់បង្ហាញចេញមានភាពទូលាយច្បាស់គ្រប់ជ្រុង។ អេក្រង់របស់វាចែកកម្រិតបង្ហាញចេញជាពីរ ផ្សេងគ្នាគឺកម្រិតបង្ហាញ Full-HD ទំហំ 1920x1080px ជាមួយកម្រិតល្បឿន 60Hz និង Full-HD (1920x1080px) ជាមួយកម្រិតល្បឿន 144Hz។
កំលាំងម៉ាស៊ីនរបស់ GL704 មានពីរជម្រើសគឺជម្រើសប្រើ CPU Intel Core i5-8300H-4-core ដែលមាន 8 thread និង 8MB Cache មានល្បឿន 2.3GHz អាចបង្កើនល្បឿនឡើងដល់ 4.0GHz និងជម្រើសប្រើ CPU Intel Core i7-8750H-Six-core ដែលមាន 12 thread និង 9MB Cache មានល្បឿន 2.2GHz អាចបង្កើនល្បឿនដល់ 4.1GHz។ ម៉ាស៊ីនទាំងពីរគឺប្រើក្រាហ្វិចកាតស៊េរី NVIDIA GTX 1060-192-bit 6GB GDDR5 និងរ៉េមប្រភេទ DDR4-2666 ទំហំដល់ទៅ 32GB ដូចគ្នា។ Asus ROG Strix SCAR II GL704 ប្រើប្រាស់ថាសរឹងសម្រាប់ផ្ទុកទិន្នន័យចំនួនពីរដោយមួយជាប្រភេទ M.2 NVMe PCIe SSD មានទំហំបីជម្រើសគឺ 128GB/256GB និង 512GB ហើយមួយផ្សេងទៀតជាប្រភេទ optional SSHD ឬ HHD Drive ដែលមានទំហំ 1000GB (1TB)។
ចំពោះគុណសម្បត្តិផ្សេងៗទៀតដែលមាននៅលើម៉ាស៊ីនកុំព្យូទ័រហ្គេមីងស៊េរីថ្មីនេះមានដូចជាប្រើប្រាស់ក្តារចុចបំពាក់ភ្លើងពណ៌ដេញចម្រុះប្រភេទ RGB LED Backlight យ៉ាងប្រណិត, មានឧប៉ាល័របំពងសំឡេងចំនួនពីរកម្រិតបន្លឺសំឡេងចេញបាន 3.5 វ៉ាត់, រន្ធដោត USB 3.1 Gen2 Type-C, USB 3.1 Gen1 Type-A, USB 3.1 Gen2 Type-A, mDP 1.2, HDMI 2.0, Ethernet, SD Card Reader, Headset jack, បច្ចេកវិទ្យា Wifi 802.11ac 2x2:2 Wave2 និង Bluetooth 5.0។ ASUS ROG Strix SCAR II GL704 នឹងត្រូវចេញលក់ក្នុងខែកញ្ញានេះហើយ ប៉ុន្តែ Asus មិនទាន់ប្រកាសអោយដឹងពីតម្លៃរបស់វានៅឡើយទេ៕