Game Monitor នឹងមានការកើនឡើងនៅក្នុងឆ្នាំ 2018 នេះបើយោងតាមការបញ្ជាក់ពីក្រុមហ៊ុន Acer

ក្រុមហ៊ុន Acer បានរំពឹងថា ប្រាក់ចំណូលរបស់ខ្លួន ដែលបានមកពីអេក្រង់ Game Monitor នឹងមានការកើនឡើងនៅក្នុងឆ្នាំ 2018 នេះ ដោយសារតែការលក់យ៉ាងរឹងមាំរបស់ម៉ូដែលជាច្រើន ជាមួយនឹងកម្រិតភាពច្បាស់ Ultra HD នាពេលកន្លងមក។ ក្រុមហ៊ុន Acer បានរំពឹងថា អេក្រង់កម្រិតភាពច្បាស់ Ultra HD នេះ នឹងក្លាយជាម៉ូនីទ័រលេងហ្គេមដ៏ពិសេសមួយសម្រាប់ឆមាសទី 2 ឆ្នាំ 2018 ហើយនឹងពេញមួយឆ្នាំ 2019 ខាងមុខនេះ។

នៅក្នុងព្រឹត្តិការណ៍ IFA 2018 កន្លងមក ក្រុមហ៊ុន Acer បានបង្ហាញចេញនូវអេក្រង់ម៉ូនីទ័រលេងហ្គេមថ្មីនេះ នៅក្រោមឈ្មោះថា Predator និង Nitro series ហើយការលក់ម៉ូនីទ័រលេងហ្គេមនៅក្នុងប្រទេសអាល្លឺម៉ង់ ត្រូវបានគេរំពឹងថា នឹងមានការកើនឡើងដល់ទៅ 20% នៅក្នុងឆ្នាំ 2018 នេះ។ តាមការបញ្ជាក់របស់លោក Victor Chien ដែលជាអគ្គនាយករបស់ក្រុមហ៊ុន Digital Display របស់ក្រុមហ៊ុន Acer បាននិយាយថា ក្រុមហ៊ុននេះ ទើបតែបញ្ចេញនូវអេក្រង់ម៉ូនីទ័រ លេងហ្គេមកម្រិត Ultra HD រួមមានម៉ូដែល Predator XB273K និង Nitro XV273K សម្រាប់ឆមាសទី 2 ឆ្នាំនេះ។ អេក្រង់ Predator X27 របស់ក្រុមហ៊ុន Acer បញ្ចេញនៅក្នុងឆមាសទី 1 ឆ្នាំ 2018 មានតម្លៃដល់ទៅ US$2,199 ដែលមានគោលដៅសម្រាប់វិស័យកម្រិតខ្ពស់ ហើយអេក្រង់ម៉ូនីទ័រ Ultra HD ស៊េរីថ្មីសម្រាប់ឆមាសទី 2 នេះនឹងមានតម្លៃពី US$1,299-1,499 និង US$899 ផងដែរ។ 

អេក្រង់ Predator XB273K ថ្មីនេះ មានភ្ជាប់ជាមួយនឹងកម្រិតភាពច្បាស់ 3840x2160px ដែលទ្រទ្រង់នូវកម្រិត 144Hz Refresh Rate និងបច្ចេកវិទ្យា Nvidia's G-Sync Technology។ Nitro XV273K គឺជាអេក្រង់ម៉ូនីទ័រ 27 អ៊ីង Ultra HD ដែលប្រើប្រាស់នូវបច្ចេកវិទ្យា AMD's Radeon FreeSync Technology រួមទាំងបច្ចេកវិទ្យា Visual Response Boost និងកម្រិត 144Hz Refresh Rate។

ជាមួយនឹងការបង្ហាញនូវអេក្រង់ម៉ូនីទ័រ Nitro ថ្មីនេះ ថ្មីៗនេះក្រុមហ៊ុន Acer ក៏ បានបញ្ចេញនូវផលិតផលចំនួន 3 ម៉ូដែលប្រភេទ Nitro series: Nitro XV273K P ដែលភ្ជាប់ជាមួយនឹងអេក្រង់ Ultra HD IPS panel អេក្រង់ Nitro XV272U P និងប្រើប្រាស់អេក្រង់ WQHD IPS Panel និងអេក្រង់ Nitro XF272U P ជាមួយ នឹងបន្ទះ TN WQHD Panel។ អេក្រង់ម៉ូនីទ័រនេះគឺមានទំហំ 27 អ៊ីង។

លោក Chien បានកត់សម្គាល់ថា ទីផ្សារនៃអេក្រង់ម៉ូនីទ័រនេះ គឺមានការធ្លាក់ចុះ ប៉ុន្តែក្រុមហ៊ុន Acer ក៏នឹងមានការកើនឡើងទៅលើប្រាក់ចំណេញរបស់ខ្លួន និងកំណើននៃការនាំចេញនៅក្នុងឆមាសទី 1 ឆ្នាំ 2018 នេះ ហើយនឹងមានសន្ទុះខ្លាំងក្លាថែមទៀតនៅក្នុងឆមាសទី 2 នេះ។ ទោះជាយ៉ាងណាក៏ដោយ ភាពតានតឹងរបស់សហរដ្ឋអាមេរិក និងចិន គឺមានការព្រួយបារម្ភធំបំផុតសម្រាប់ឧស្សាហកម្មម៉ូនីទ័រនេះ។ គួរបញ្ជាក់ថា ការនាំចេញប្រចាំឆ្នាំនេះ គឺមានការកើនឡើងដល់ទៅ 3 ទៅ 4 លានគ្រឿង៕