ដើម្បីផ្តល់អោយអ្នកលេងហ្គេមនូវកុំព្យូទ័រលេងហ្គេមដែលមានសមត្ថភាព និងមានអនុភាពដ៏ល្អបំផុតនោះ នៅថ្ងៃនេះ ក្រុមហ៊ុន MSI បានបង្ហាញនូវកុំព្យូទ័រស៊េរីថ្មីរបស់ខ្លួន ដែលបំពាក់នូវអេក្រង់ទំហំ 17 អ៊ីង ដែលមានលេខកូដ GE75 Raider ដែលជាជំនាន់ថ្មីមួយទៀតនៃអធិរាជហ្គេមនេះ។ កុំព្យូទ័រលេងហ្គេមនេះ មានគែមព័ទ្ធ អេក្រង់ស្តើង និងការរចនារូបរាងកាន់តែស្រស់ស្អាតទាក់ទាញបំផុតក្នុងការប្រើប្រាស់។
តាមប្រសាសន៍របស់ លោក Eric Kuo ដែលជាអនុប្រធានផ្នែកលក់ និងទីផ្សាររបស់ក្រុមហ៊ុន MSI បាននិយាយថា “កុំព្យូទ័រ GE series ត្រូវបានរចនាឡើងសម្រាប់អ្នកលេងហ្គេមជាច្រើន ដែលមានចំណង់នៅក្នុងការលេងហ្គេមពិតៗ។ កុំព្យូទ័រនេះ គឺមានសមត្ថភាពខ្លាំងក្លា និងជាអាវុធមួយក្នុងការលេងហ្គេមរបស់ពួកគេ។” សម្រាប់ការរចនាទៅលើកុំព្យូទ័រលេងហ្គេមនេះ គឺនឹងផ្តល់អោយអ្នកលេងហ្គេមជាច្រើនពេញចិត្តនៅក្នុងការជ្រើសរើស ដោយសារតែ GE 75 Raider នេះ គឺមានការបំផុសគំនិត ច្នៃប្រឌិតយ៉ាងស្រស់ស្អាតជាមួយនឹងឡូហ្គោរូបនាគថ្មី។
ការរចនាគែមព័ទ្ធអេក្រង់ស្តើងជាមួយនឹងអេក្រង់ IPS-LEVEL PANEL
បើនិយាយអំពីអេក្រង់របស់កុំព្យូទ័រ GE75 Raider គឺមានការរចនាជាមួយនឹងគែមព័ទ្ធអេក្រង់ស្តើងដែលធ្វើឱ្យអ្នកលេងហ្គេមទទួលបាននូវបទពិសោធន៍នៃការទស្សនាកាន់តែអស្ចារ្យ។ អេក្រង់នេះ គឺមានទំហំ 17 អ៊ីងជាមួយនឹងកម្រិត Refresh Rate 144Hz ហើយនិងមានកម្រិតពន្លឺ 3ms Overclockable Response Time ដែលនឹងផ្តល់នូវភាពរលូនក្នុងការលេងហ្គេមដែលមិនធ្លាប់ទទួលបានពីមុនមកនោះទេ។
ប្រព័ន្ធត្រជាក់ COOLING SYSTEM ក្នុងការទ្រទ្រង់នូវក្រាហ្វិកកាត NVDIA® GEFORCE® GTX 1070
នៅក្នុងនាមជាអ្នកខ្លាំងក្លានៅក្នុងផ្នែក True Gaming កុំព្យូទ័រ MSI GE75 Raider ត្រូវបានដំឡើងមកជាមួយនូវសមត្ថភាពខ្លាំងក្លា និងមានមុខងារថ្មីៗជាច្រើន អ្វីដែលអស្ចារ្យបំផុតនោះ គឺការភ្ជាប់នូវក្រាហ្វិកកាត NVIDIA® GeForce® GTX 1070 តែម្តង។ ជាមួយនឹងការប្រើប្រាស់នូវ Cooler Boost 5 Technology កុំព្យូទ័រ MSI នឹងធានាថា ការលេងហ្គេមនេះ គឺមានភាពស្ងប់ស្ងាត់បំផុតនៅក្នុងខណៈពេលលេងហ្គេម។
MSI APP PLAYER សម្រាប់លេងហ្គេមទូរស័ព្ទនៅលើកុំព្យូទ័រ
ក្រៅពីរបកគំហើញនៅក្នុងផ្នែក Hardware នេះ កម្មវិធី MSI APP Player នេះ គឺជា Simulator ដែលអនុញ្ញាតឱ្យអ្នកលេងហ្គេមជាច្រើនរីករាយក្នុងការលេងហ្គេមស្មាតហ្វូនជាច្រើននៅលើកុំព្យូទ័ររបស់ពួកគេបាន។ សម្រាប់ Keyboards របស់វាភ្ជាប់ជាមួយនឹងភ្លើង lighting keycaps ផ្អែកទៅលើការជ្រើសរើសរបស់អ្នកលេងហ្គេមផ្សេងៗគ្នានោះ។ កុំព្យូទ័រ GE75 Raider ត្រូវគេរំពឹងថា នឹងអាចបំពេញនូវតម្រូវការរបស់អ្នកលេងហ្គេមជាមួយនឹងការរចនារូបរាងយ៉ាងស្រស់ស្អាត ការពង្រឹងទៅលើសមត្ថភាពនៃប្រព័ន្ធ Hardware និងការប្រើប្រាស់កម្មវិធី Software ផ្តាច់មុខដែលធ្វើឱ្យអ្នកលេងហ្គេមគ្រប់រូបពេញចិត្ត និងទទួលបានជោគជ័យជានិច្ច៕