no-alternative title
no-alternative title
no-alternative title
no-alternative title
no-alternative title
no-alternative title
no-alternative title

MSI GS65 ហ្គេមម៉ាស៊ីនកម្រ៉ាស់ស្តើង ទំងន់ស្រាល កំលាំងម៉ាស៊ីនខ្លាំង និងប្រើប្រាស់នូវបច្ចេកវិទ្យាទំនើបៗបំផុត

ស្របពេលដែល មានការរីកចំរើនលើវិស័យហ្គេមនៅក្នុងព្រះរាជាណាចក្រកម្ពុជានាពេលបច្ចុប្បន្ននេះ ក្រុមការងាររបស់ ពិភពអេឡិចត្រូនិក សូមណែនាំនូវម៉ាស៊ីនហ្គេមមួយម៉ូដែល គឺ MSI GS65។ នេះគឺជាម៉ាស៊ីនកុំព្យូទ័រយួរដៃប្រភេទ Gaming Laptop ជំនាន់ថ្មីមួយក្នុងស្រឡាយកុំព្យូទ័រ GS Series ដែលត្រូវបានក្រុមហ៊ុនធ្វើការរចនារូបរាងឡើងដោយមានកម្រាស់ស្តើង ព្រមទាំងមានភ្ជាប់មកជាមួយនូវកំលាំងម៉ាស៊ីន និងគុណសម្បត្តិប្រើការទូទៅមានភាពទំនើបក្រៃលែង។ GS65 មានទំហំវិមាត្រសរុប 357.7x 247.7x17.9 mm និងមានទំងន់ស្រាលល្មមត្រឹមតែ 1.88 គីឡូក្រាមប៉ុណ្ណោះ។ ម៉ាស៊ីនកុំព្យូទ័រមួយនេះ មានផ្ទៃខាងលើស្រោបដោយអាលុយមីញ៉ូមប្រភេទ Brushed aluminum chassis ដែលមានរំលេចភាពស្រស់ស្អាតនៅជុំវិញគែមដោយវ័ណ្ឌទឹកមាស និងនៅផ្នែកតួរម៉ាស៊ីនរបស់វាស្រោបដោយជ័រលោងស្វិតរលោងស្រដៀងលោហះ។ 

MSI បានសម្រេចបំពាក់នូវក្តារចុចប្រភេទ Per-RGB SteelSeries keyboard នៅលើម៉ាស៊ីនកុំព្យូទ័រស៊េរីថ្មីមួយនេះដែលក្តារចុចប្រភេទនេះមានគំលាតគ្រាប់ចុចសមល្មមងាយស្រួលដាក់ម្រាមដៃធ្វើអោយការចុចវាយអត្ថបទបានលឿន ការឆ្លើយតបការចុចបានរហ័ស និងជាពិសេសវាបានរំលេចដោយភ្លើងប្រភេទ LED RGB ចម្រុះប្រដេញពណ៌យ៉ាងស្រស់ស្អាតនៅពីលើ និងក្រោម ក្តារចុចងាយស្រួលក្នុងការវាយអត្ថបទ និងគ្រប់គ្រងចុចបញ្ជាលេងហ្គេមនៅពេលយប់។ យើងក៏អាចកំនត់ការលេងភ្លើង LED របស់ក្តារចុចរបស់វាបានផងដែរតាមរយះកម្មវិធី MSI Dragon Center។ Dragon Center គឺជាកម្មវិធីដែលអាចអោយអ្នកប្រើប្រាស់ម៉ាស៊ីនកុំព្យូទ័រមួយនេះតាមដានពីទំហំនៃការប្រើប្រាស់ដូចជាល្បឿនរត់របស់ CPU, GPU, RAM និងមុខងារកំនត់ជាច្រើនទៀត។ 

នៅខាងក្រោមក្តារចុចគឺក្តារ Touchpad ជាប្រភេទ Plastic Trackpad ដែលមានវ័ណ្ឌជុំវិញពណ៌ទឹកមាសយ៉ាងស្រស់ស្អាត។ វាមានសំគាល់ស្នាមម្រាមដៃបានរហ័សក្នុងការប៉ះថាច់បញ្ជាមុខងារទូទៅនៅលើកុំព្យូទ័រអាចប្រើជំនូស USB Mouse បាន។ ម៉ាស៊ីនកុំព្យូទ័រមួយនេះបំពាក់នូវឧប៉ាល័របំពងសំឡេងចំនួនពីរគ្រាប់កំលាំង 2W ដែលមានសមត្ថភាពបំពងសំឡេងបានលឺខ្លាំងច្បាស់មិនបែកកម្រិត 360° virtual surround sound ជាមួយបច្ចេកវិទ្យា Dynaudio ដែលមានសមត្ថភាពបំពង់សំឡេងលឺជាងស៊េរីមុនៗប្រមាណ 50% ពិសេសសំរាប់សំឡេងនៅពេលលេងហ្គេម។ 

យើងក៏អាចកំនត់ប្រភេទសំឡេងតាមដែលយើងចង់បាននៅលើម៉ាស៊ីនកុំព្យូទ័រមួយនេះតាមរយះកម្មវិធី NAHIMINC3 ។ ហើយអ្វីដែលកាន់តែពិសេសបំផុតនោះគឺវាមានកាមេរ៉ា HD Webcam ដែលអាចថតវីដេអូបានកម្រិត HD ក្នុងល្បឿន 30fps និងប្រើជាប្រព័ន្ធដោះសោរកុំព្យូទ័រដោយចំណាំផ្ទៃមុខ (Face Unlock) បានដូចស្មាតហ្វូនបច្ចុប្បន្នដែរ ហើយបន្ថែមពីនេះវាក៏មុខងារដោះសោរដោយស្កែនក្រយ៉ៅម្រាមដៃផងដែរដែលស្ថិតនៅលើប៊ូតុង Power ផ្ទាល់តែម្តង។ វាពិតជាមានសុវត្ថិភាពខ្ពស់ និងទំនើបបំផុតសម្រាប់ម៉ូដែល GS63 STEALTH THIN 8RF នេះ។ សម្រាប់មុខងារតភ្ជាប់នៅលើតួរម៉ាស៊ីនរបស់ GS65 មានច្រើនផ្តល់នូវភាពងាយស្រួលក្នុងការប្រើប្រាស់ភ្ជាប់ទៅកាន់ឧបករណ៍ដទៃទៀតស្របតាមការចង់បានរបស់យើងមានដូចជារន្ធដោត USB3.0 & 2.0, រន្ធ USB-C3.1 ឬរន្ធ Thunderbolt 3, HDMI1.4, Mini Display Port, រន្ធ Killer Ethernet, រន្ធដោត SD reader, រន្ធដោតកាស និងម៉ាយក្រូហ្វូន។ ក្រៅពីនេះយើងក៏អាចតភ្ជាប់តាមរយះបច្ចេកវិទ្យាប្លូធូស (Bluetooth v5) និងតាមរយះ Killer ac Wi-Fi ដែលមានល្បឿនលឿនបំផុត។

និយាយដល់បន្ទះកញ្ចក់អេក្រង់បង្ហាញដែលបំពាក់នៅលើម៉ាស៊ីនកុំព្យូទ័រ Gaming Laptop ដ៏ស្តើងមួយនេះពិតជាធ្វើអោយយើងជាអ្នកប្រើប្រាស់ទទួលភាពរីករាយក្នុងការទស្សនាវីដេអូ ការលេងហ្គេម និងបំពេញកិច្ចការងារទូទៅបានយ៉ាងរលូនច្បាស់រស់រវើក។ GS65 STEALTH THIN 8RF  ប្រើប្រាស់បន្ទះកញ្ចក់អេក្រង់បង្ហាញប្រភេទ Full-HD IPS Level ទំហំធំទូលាយដល់ទៅ 15.6 អ៊ីងជាមួយគែម Bezel ខាងលើឆ្វេងស្តាំអេក្រង់ស្តើងបំផុតត្រឹមតែ 4.8 មីលីម៉ែត្រ។ អេក្រង់របស់វាទ្រទ្រង់ការបង្ហាញរូបភាព-វីដេអូក្នុងកម្រិត Full-HD ទំហំ 1080x1290px ជាមួយបច្ចេកវិទ្យាល្បឿនអេក្រង់ដែលមានភាពរលូនកម្រិតខ្ពស់បំផុតដល់ទៅ 144Hz ដែលធ្វើអោយរាល់កម្មវិធីរត់នៅលើអេក្រង់របស់វាគឺរលូនបំផុតប្រើពេលសំគាល់ត្រឹមតែ 7 ms ហើយវាគឺជាម៉ាស៊ីនកុំព្យូទ័រដំបូងគេបង្អស់ក្នុងលោកដែលបំពាក់អេក្រង់កម្រិតខ្ពស់បែបនេះ។ បន្ថែមពីនេះ MSI ក៏បានបំពាក់នូវបច្ចេកវិទ្យា MSI True Color 2.0 ដែលវាកាន់តែជួយធ្វើអោយការបង្ហាញចេញនូវកម្រិតពណ៌ sRGB នៅលើកញ្ចក់អេក្រង់បានច្បាស់ដិត 100%។

នៅក្នុងតួរម៉ាស៊ីនកុំព្យូទ័រដ៏ស្តើងរបស់ GS65 ត្រូវបានក្រុមហ៊ុនផ្តុំដោយគ្រឿងបំលាស់ខ្លាំងៗ ដែលធ្វើអោយម៉ាស៊ីនកុំព្យូទ័រយួរដៃ MSI មួយនេះដំណើរការបានលឿនរហ័សទាន់ចិត្តសម្រាប់ការងារទូទៅ និងការងារកំសាន្ត។ GS65 STEALTH ដើរលើអង្គគណនា hexa-core Intel Core i7-8750H ដែលជាជំនាន់ទី 8 របស់ Intel មានល្បឿនប្រតិបត្តិការខ្លាំងទ្រទ្រង់ដោយបច្ចេកវិទ្យា Hyperthreading ដែលបង្កើនដល់ 12 threads នៅលើផ្ទាំង Motherboard ប្រភេទ Intel® HM370។ ម៉ាស៊ីនរបស់វារត់មិនចេះហត់ដោយមានជំនួយការពីរ៉េមទំហំ 16GB ប្រភេទ DDR4-4200MHz ហើយក៏មានរន្ធដាក់បន្ថែមរ៉េមបានមួយដើមទៀតដែលអាចបន្ថែមបានដល់ទំហំ 32GB។ 

នេះគឺជាម៉ាស៊ីនកុំព្យូទ័រជំនាន់ថ្មី ដែលប្រើនូវក្រាហ្វិចកាតរាងខ្ពស់កប់ស៊េរី  NVIDIA GeForce GTX1070 Max-Q។  MSI បានបំពាក់នូវដែកការពារការឆាប់ឡើងកំដៅម៉ាស៊ីនរបស់វាជាមួយកង្ហា Cooler Boost Trinity មានសមត្ថភាពបំភាយកំដៅបានខ្លាំងជួយរក្សាតុល្យភាពនូវភាពត្រជាក់លើម៉ាស៊ីនរបស់កុំព្យូទ័របានកាន់តែប្រសើរទោះបីជាប្រើក្នុងរយះពេលយូរ និងអូសកម្មវិធី ឬហ្គេមដែលមានទំហំធំៗប៉ុណ្ណាក៏ដោយ។ ចំពោះអង្គផ្ទុកទិន្នន័យវិញ គឺប្រើពពួក M.2 SSD Combo NVMe PCIe Gen3 / SATA  មានទំហំ 512GB ប្រើបច្ចេកវិទ្យាលំដាប់ RAID 0 ដែលជួយបង្កើនសមត្ថភាពក្នុងការផ្ទេរទិន្នន័យចេញចូលបានលឿងរហ័សក្នុងទំហំធំ។ GS65 STEALTH ទ្រទ្រង់ដោយប្រតិបត្តិការ Windows 10 Home/Pro។ កុំព្យូទ័រយូរដៃស៊េរីថ្មីមួយនេះភ្ជាប់នូវថ្មប្រភេទខ្នាត 4-cell កំលាំងថាមពល 82Whr ទ្រទ្រង់ឆ្នាំសាកកំលាំង 180W Slim AC Adapter។ ថាមពលថ្មរបស់វាទ្រទ្រង់ការប្រើប្រាស់ក្នុងការចាក់វីដេអូលើបណ្តាញ YouTube, ឆែកវ៉ិបសាយ លេងហ្គេម ទស្សនាខ្សែភាពយន្ត និងបំពេញកិច្ចការងារទូទៅជិត 8 ម៉ោង។ 

សរុបសេចក្តីមក បើសិនជាអ្នកលឺគេនិយាយដល់ម៉ាស៊ីនកុំព្យូទ័រប្រភេទ Gaming Laptop អ្នកនឹងនឹកស្រមៃទៅរកម៉ាស៊ីនកុំព្យូទ័រដែលមានកំលាំងខ្លាំង មានមាឌហំ កម្រាស់ក្រាស់ និងទំងន់ធ្ងន់។ ប៉ុន្តែអ្នកនឹងប្តូរការគិតស្រមៃរបស់អ្នកនៅពេលអ្នកបានប៉ះកាន់ប្រើម៉ាស៊ីនកុំព្យូទ័រ MIS GS65 នេះព្រោះថា នេះជាម៉ាស៊ីនកុំព្យូទ័រ Gaming Laptop ដែលមានកម្រាស់ស្តើងបំផុតជាមួយការរចនារូបឡើងយ៉ាងប្រណិតមានភាពទាន់សម័យ មានទំងន់ស្រាល កំលាំងម៉ាស៊ីនខ្លាំង និងបច្ចេកវិទ្យាប្រើប្រាស់ទំនើបៗបំផុតដែលអ្នកមិនធ្លាប់ជូប ឬឃើញនៅលើម៉ាស៊ីនកុំព្យូទ័រផ្សេងឡើយ៕

 

 

no-alternative title
ព័ត៌មានពាណិជ្ជកម្ម