នៅក្នុងព្រឹត្តិការណ៍ពិពណ៌ផលិតបច្ចេកវិទ្យា CES 2019 ក្រុមហ៊ុនបច្ចេកវិទ្យាយក្សរបស់ចិន Huawei បានបង្ហាញនូវដំណឹងល្អជាច្រើនសម្រាប់អ្នកគាំទ្រនៅឯនាយសមុទ្រ ដោយក្រុមហ៊ុនបច្ចេកវិទ្យាយក្សក្នុងតំបន់អាស៊ីមួយនេះនឹងធ្វើការនាំយកឧបករណ៍ស៊េរីថ្មីចំនួនពីរ របស់ខ្លួនទៅចរាចរលក់ក្នុងទីផ្សារសហរដ្ឋអាមេរិក ដោយចាប់ផ្តើមពីខែមករានេះ។ ឧបករណ៍ស៊េរីថ្មីទាំងពីរនោះរួមមានឧបករណ៍ថេប្លេតធុនកណ្តាលម៉ូដែល MedaiPad M5 Lite និងកុំព្យូទ័រយួរដៃដ៏ស្តើងម៉ូដែល MateBook 13 Laptop។
បើនិយាយទៅសម្រាប់ឧបកណ៍ MediaPad M5 Lite នេះ ត្រូវបាន Huawei ធ្វើការប្រកាសចេញតាំងពីកំឡុងខែតុលា ឆ្នាំ 2018 មកម៉្លេះ ប៉ុន្តែវាទើបនឹងត្រូវបានក្រុមហ៊ុនរៀបចំបញ្ចេញទៅលក់នៅទីផ្សារសហរដ្ឋអាមេរិក ដើម្បីធ្វើការប្រកូតប្រជែងទីផ្សារថាប្លែតអេក្រង់ទំហំ 10 អ៊ីងនៅពេលនេះ។ MediaPad M5 Lite បំពាក់នូវបន្ទះអេក្រង់បង្ហាញប្រភេទ IPS LCD ទំហំ 10.1 អ៊ីង មានខ្នាតអេក្រង់ 16:10 ratio និងទ្រទ្រង់ការបង្ហាញចេញក្នុងទំហំ 1920x1200 ភិចសែល។ កំលាំងម៉ាស៊ីនរបស់វាវិញ គឺអូសដោយបន្ទះឈីប Kirin 659 កម្រិតល្បឿន octa-core ជាមួយរ៉េមទំហំ 3GB និងមានអង្គផ្ទុកទិន្នន័យទំហំ 32GB និងមានថ្មធំកំលាំងថាមពលខ្លាំងរហូតដល់ទៅ 7,500mAh។
បន្ថែមពីនេះ MediaPad M5 Lite បានបំពាក់នូវប្រព័ន្ធបំពងសំឡេងចំនួនបួនគ្រាប់ “Quad Speaker” ដែលធ្វើអោយសំឡេងបញ្ចេញបានលឺខ្លាំងពិរោះរណ្តំជាមួយបច្ចេកវិទ្យាសំឡេង Harman Kardon ហើយនឹងទ្រទ្រង់ជាមួយការចុចបញ្ជាដោយប៊ិច M-Pen Lite ថែមទៀតផង (ប៊ិចភ្ជាប់មកស្រាប់នៅក្នុងប្រអប់របស់វា)។ ហើយអ្វីដែលរិតតែពិសេសបំផុតនោះគឺវាមានដំឡើងមកស្រាប់នូវកម្មវិធី Kid’s Corner ដែលវាអនុញ្ញាតិអោយមាតាបិតាអាចធ្វើការកំនត់នូវកម្មវិធីមានអត្ថប្រយោជន៍ចំពោះកូនតូចៗរបស់ពួកគាត់ប្រើប្រាស់បាននៅលើអេក្រង់ថេប្លេតនេះផងដែរ។ Huawei MediaPad M5 Lite នឹងត្រូវប្រកាសចេញលក់ក្នុងទីផ្សារអាមេរិកជាមួយជម្រើសពណ៌ប្រផេះ (Space Gray) នៅក្នុងខែមករានេះតាមរយះបណ្តាញចែកចាយ Amazon, Newegg និងហាងលក់រាយជាច្រើនទៀតដែលមានតម្លៃខ្ទង់តែ $299 ប៉ុណ្ណោះរួមបញ្ចូលជាមួយប៊ិច M-Pen Lite Style មកក្នុងប្រអប់ស្រាប់។
ងាកមកកុំព្យូទ័រយួរដៃដែលមានកម្រាស់ដ៏ស្តើងរបស់ Huawei ស៊េរីថ្មី MateBook 13 Laptop នេះ វិញវាត្រូវបានធ្វើការរចនារូបរាងឡើងបែប Premium ដោយច្របាច់បញ្ចូលការរចនារវាងកុំព្យូទ័រយួរដៃថ្នាក់កំពូលរបស់ Huawei ស្រឡាយ MateBook X Pro និងថ្នាក់កណ្តាលស្រឡាយ MateBook D។ MateBook 13 Laptop បំពាក់នូវអេក្រង់ទំហំ 13 អ៊ីងប្រភេទ IPS LCD Touch ខ្នាតបង្ហាញ 3:2 ratio ទ្រទ្រង់ការបង្ហាញចេញទំហំ 2160x1440 ភិចសែលជាមួយកម្រិតពន្លឺ 300nits និងទ្រទ្រង់បច្ចេកវិទ្យាចាក់ពណ៌ 100% Adobe sRGB color gamut។ ដូចគ្នាទៅនឹងកំពូលកុំព្យូទ័រយួរដៃស្រឡាយ MateBook X Pro ដែរដោយ MateBook 13 ត្រូវបាន Huawei ធ្វើការរចនាឡើងជាមួយគែមស៊ុមជុំវិញអេក្រង់មានទំហំតូចស្តើងបំផុតដែលបន្សល់ផ្ទៃអេក្រង់របស់វាបង្ហាញបានពេញប្រមាណ 88% នៃផ្ទៃអេក្រង់សរុប។
តួរខ្លួនខាងក្រៅរបស់វាត្រូវបានរចនាឡើងយ៉ាងប្រណិតរឹងមាំតាមទម្រង់នៃការរចនាបែប Diamond-Cute Charmfered Edge ពីលោហះធាតុអាលុយមីញ៉ូមប្រភេទ Alloy និងមានទ្រនាប់ស្កែនក្រយ៉ៅម្រាមដៃសម្រាប់ដោះសោរសំងាត់ដែលបង្កប់នៅពីលើប៊ូតុង Power ផ្ទាល់ផងដែរ។ ចំពោះកំលាំងម៉ាស៊ីនរបស់វាវិញគឺរត់ដោយបន្ទះឈីបជំនាន់ទី 8 របស់ Intel ស៊េរី Whiskey Lake Chipsets ទ្រទ្រង់ដោយអង្គគណនាបណ្តោះអាសន្នទំហំ 8GB ប្រភេទ LPDDR-32133Hz RAM, ប្រើប្រាស់ទំហំផ្ទុកទិន្នន័យប្រភេទ PCle SSD មានទំហំចាប់ពី 256GB ដល់ 512GB រួមជាមួយថ្មកំលាំង 41.7Wh ហើយវាក៏មានម៉ូដែលប្រើអង្គក្រាហ្វិចកាតពពួក NVIDIA GeForce MX150-2GB RAM និងបច្ចេកវិទ្យាបង្កើនល្បឿនក្រាហ្វិក TDP 25W។
Huawei នឹងនាំយកកុំព្យូទ័រយួរដៃស៊េរីថ្មី MateBook 13 នេះទៅចរាចរលក់ក្នុងទីផ្សារសហរដ្ឋអាមេរិកនៅថ្ងៃទី 29 ក្នុងខែមករានេះតាមរយះបណ្តាញចែកចាយ Amazon, Newegg និងបន្ទាប់មកទៀតតាមរយះហាកលក់រាយមួយចំនួននៅក្នុងខែកុម្ភះ។ សម្រាប់តម្លៃរបស់វាវិញគឺម៉ូដែលប្រើប្រាស់កំលាំងម៉ាស៊ីន Intel 8th-gen whiskey lake-i5 ជាមួយ RAM ទំហំ 8GB RAM, ទំហំផ្ទុក 256GB និងមានពណ៌ទឹកប្រាក់ (Mystic Silver) គឺខ្ទង់ $999 ហើយសម្រាប់ម៉ូដែលកំពូលដែលប្រើប្រាស់កំលាំងម៉ាស៊ីនខ្លាំង Intel 8th-gen whiskey lake-i7 ជាមួយ RAM ទំហំ 8GB, ទំហំផ្ទុកទិន្នន័យប្រភេទ PCle SSD ទំហំ 512BG, ប្រើអង្គក្រាហ្វិក NVIDIA GeForce MX150-2GB ជាមួយបច្ចេកវិទ្យា more-powerful 25W TDP និងមានពណ៌ប្រផេះ (Space Gray) គឺមានតម្លៃខ្ទង់ $1,299៕
