កាមេរ៉ាថតរូបប្រភេទ DSLR របស់ក្រុមហ៊ុន Canon គឺជាប្រភេទកាមេរ៉ាមួយ ដែលទទួលបានការគាំទ្រ និងពេញនិយមបំផុតសម្រាប់អ្នកថតរូបនៅទូទាំងសកលលោក ហើយជារៀងរាល់ឆ្នាំ ក្រុមហ៊ុន Canon បានបញ្ចេញកាមេរ៉ាប្រភេទនេះ ដេញទៅតាមជំនាន់ជានិច្ច ដើម្បីបំពេញតម្រូវការទីផ្សារនៃអ្នកប្រើប្រាស់។ ដោយថ្មីៗនេះ ក្រុមហ៊ុន Canon ទើបតែបានប្រកាសចេញនូវកាមេរ៉ាថតរូបជំនាន់ថ្មីប្រភេទ EOS DSLR ចំនួនពីរម៉ូដែលគឺ EOS 1500D និង EOS 3000D។ កាមេរ៉ាទាំងពីរនេះ ត្រូវបានផលិតឡើង ដើម្បីបំពេញបំណងរបស់អ្នកប្រើប្រាស់ដែលចង់ចាប់ផ្តើមដំបូងសម្រាប់ការប្រើកាមេរ៉ាថតរូប ហើយកំពុងតែសម្លឹងមើលម៉ាស៊ីនកាមេរ៉ាដែលពេញនិយមទំនើបសមនឹងការ ប្រើប្រាស់របស់ពួកគេ។ EOS 1500D និង EOS 3000D ដំណើរការលើឈីប DIGIC 4+ Image Processor ដែលមានល្បឿនដំណើរការលឿនក្នុងផលិតរូបភាព។
Canon EOS 1500D គឺមានបំពាក់នូវសែនស័រកាមេរ៉ាទំហំ 24.1MP រីឯ EOS 3000D ត្រូវបានបំពាក់នូវសែនស័រកាមេរ៉ាទំហំ 18.0 MP។ កាមេរ៉ាទាំងពីរនេះ ប្រើប្រាស់សែនស័រចាប់រូបភាព APS-C size CMOS Sensor ដែលជាសែនស័រខ្លាំងជួយអោយការចាប់រូបភាពបានច្បាស់ទោះបីជាស្ថិតនៅក្រោមលក្ខខណ្ឌពន្លឺទាបយ៉ាងណាក៏ដោយជាមួយកម្រិតពន្លឺ ISO ស្វ័យប្រវត្តិចន្លោះពី 100-6400 ព្រមទាំងអាចបង្កើនដល់ 12800។
លោក Naohiko Hayashi ដែលជា នាយកគ្រប់គ្រងជាន់ខ្ពស់ និងជាអ្នកចាត់ការទូទៅក្នុងតំបន់ ICP នៃមជ្ឈមណ្ឌលលក់ និងទីផ្សាររបស់ក្រុមហ៊ុន Canon ក្នុងប្រទេសសិង្ហបុរី បានមានប្រសាសន៍លើកឡើងថា “នៅក្នុងពិភពលោក នាពេលបច្ចុប្បន្ន គឺមានរូបភាពយ៉ាងច្រើនត្រូវបានថត និងចរចរណ៍នៅលើបណ្តាញទំនាក់ទំនងនានា កាន់តែច្រើនឡើងៗ ហើយមានមនុស្សជាច្រើនមានរកឃើញនូវអ្វីដែលជាសេក្តីស្រឡាញ់របស់គេតាមរយះការថតរូបតាមទូរស័ព្ទដៃស្មាតហ្វូនរបស់ពួកគេ”។
ប៉ុន្តែសម្រាប់ក្រុមហ៊ុន Canon វិញ បាននឹងកំពុងខិតខំប្រឹងប្រែងផលិតចេញនូវកាមេរ៉ាថតរូប ដែលមានលក្ខណៈទំនើបដើម្បីជម្រុញអោយអ្នកប្រើប្រាស់អោយរក្សាបាននូវការចង់ចាំរបស់ពួកគេតាមរយះការថតរូបទុកជាអនុស្សាវរីយ៍ ហើយពេលនេះពួកគេអាចចាប់ផ្តើមផ្តិតយកនូវកម្រងរូបថតអនុស្សាវរីយ៍ទាំងឡាយ តាមរយះម៉ាស៊ីនថតរូបជំនាន់ថ្មីម៉ូដែល EOS 1500D និង EOS3000D ដែលមានសមត្ថភាពដ៏អស្ចារ្យមិនធ្លាប់មាន។
ជាមួយនិងការប្រើប្រាស់សែនស័រ APS-C size CMOS គឺមានសមត្ថភាពបង្កើននូវទំហំស្រទាប់ចាប់រូបភាពធំជាង 19 ដង បើធៀបនឹងសែនស័រខ្នាត 1/3.2 inch ដែលជាសែនស័រស្តង់ដារ ដែលធ្លាប់ប្រើលើកាមេរ៉ាស្មាតហ្វូនបច្ចុប្បន្ន។ APS-C size CMOS មានសមត្ថភាពខ្ពស់ក្នុងការចាប់រូបភាពបានច្បាស់នៅគ្រប់ស្ថានភាពមិនថានៅទីដែលមានពន្លឺទាបក៏ដោយចុះ ក៏សិនស័រនេះ នៅតែអាចផ្តិតយករូបភាពបានច្បាស់ជាមួយគុណភាពខ្ពស់បំផុត។ ទាំងម៉ូដែល EOS 1500D និង EOS 3000D បានបំពាក់នូវមុខងារ Optical Viewfinder ដែលជួយធ្វើអោយដំណើរការចាប់ចំនុចវត្ថុ (Focus) និងទំហំ Frame របស់រូបភាពបានជាក់លាក់លឿនរហ័ស ហើយមុខងារនេះ នឹងជួយសម្រួលដល់ការផលិតរូបភាពអោយបានច្បាស់ ជាពិសេសការផលិតវីដេអូក្នុងកម្រិត Full-HD ជាមួយសាច់វីដេអូច្បាស់ម៉ដ្ឋ។
បន្ថែមពីនេះ ម៉ាស៊ីនកាមេរ៉ាទាំងពីរនេះ ភ្ជាប់មកជាមួយមុខងារកំនត់ការថតសំខាន់ៗមានដូចជា On top of the portrait, landscape, close-up, sports, night portrait និង food mode ជាមួយការលេងនូវ Filter ប្លែកៗដើម្បីធ្វើអោយរូបភាព និងវីដេអូដែលផលិតចេញមកកាន់តែមានភាពទាក់ទាញដូចជា soft focus feel, toy camera effect, fish-eye effect, miniature effect និង artsy grainy black & white effect។ ម៉ាស៊ីនកាមេរ៉ា EOS 1500D បំពាក់កញ្ចក់អេក្រង់បង្ហាញប្រភេទ TFT ទំហំ 3.0 អ៊ីងមានកម្រិតភិចសែល 920,000 dots និងម៉ូដែល EOS 3000D មានកញ្ចក់អេក្រង់ទំហំ 2.7 អ៊ីងមានកម្រិតភិចសែល 230,000 dots សម្រាប់មើលមុខងារកំនត់ការថត ប្លង់ថត បង្ហាញរូបភាព និងវីដេអូដែលបានថតរួច។ កញ្ចក់អេក្រង់របស់ពួកវាជាប្រភេទ TFT។
ម៉ាស៊ីនកាមេរ៉ាទាំងពីរស៊េរីនេះ ប្រើប្រាស់ប្រព័ន្ធ Wi-Fi ក្នុងការតភ្ជាប់ទៅកាន់ទូរស័ព្ទស្មាតហ្វូន និងឧបករណ៍អេឡិចត្រូនិកផ្សេងៗ ដែលដំណើរការដោយ iOS និង Android សម្រាប់ការផ្ទេរទិន្នន័យរូបភាព-វីដេអូ បានកាន់តែរហ័សដោយមិនចាំបាច់ប្រើខ្សែចម្លង ឬដោះម៉េមូរីចេញ។ ជាមួយកម្មវិធី Canon Camera Connect App កាន់តែផ្តល់នូវភាពងាយស្រួលក្នុងការចែករំលែករូបភាព និងវីដេអូទៅកាន់បណ្តាញសង្គមបានភ្លាមៗដោយផ្ទាល់តែម្តង។ ដោយកម្មវិធីនេះ អាចដំឡើងបាននៅលើ ពីក្នុង App Store និង Play Store ហើយកម្មវិធីនេះអាចអោយអ្នកប្រើប្រាស់ធ្វើការបញ្ជាការថត និងកំនត់មុខងារទាំងឡាយនៅលើកាមេរ៉ាបពីចំងាយតាមរយះទូរស័ព្ទដៃស្មាតហ្វូន។
បន្ថែមពីនេះសម្រាប់ម៉ូដែល EOS 1500D បានភ្ជាប់បន្ថែមនូវមុខងារ NFC សម្រាប់ភ្ជាប់ទៅកាន់ឧបករណ៍អេឡិចត្រូនិកទាំងឡាយដែលភ្ជាប់នូវមុខងារ NFC នេះដើម្បីផ្លាស់ប្តូរទិន្នន័យបានកាន់តែលឿន។ ក្រៅពីនេះម៉ាស៊ីនកាមេរ៉ាទាំងពីរនេះនូវមានភ្ជាប់នូវមុខងារពិសេសៗជាច្រើនទៀតសម្រាប់កំនត់ការថតដែលបំពេញតាមតម្រូវការរបស់អ្នកប្រើប្រាស់។ កាមេរ៉ាថ្មីទាំងពីរម៉ូដែលនេះ នឹងមានលក់នៅក្នុងប្រទេសកម្ពុជា នាពេលឆាប់ៗនេះ តាមរយៈក្រុមហ៊ុន i-Qlick Cambodia៕