ក្រុមហ៊ុន Samsung ត្រូវបានគេរាយការណ៍ថាត្រៀមបើកព្រឹត្តិការណ៍សម្ភោធបង្ហាញចេញនូវវត្តមានកំពូលស្មាតហ្វូនត្រកូល Note ជំនាន់ទី9 គឺ Galaxy Note 9 នៅថ្ងៃទី 09 ខែសីហាត្រូវនឹងខែក្រោយនេះតែម្តង។ នាពេលកន្លងមកកំពូលស្មាតហ្វូន Note ជំនាន់ថ្មីនេះត្រូវបានប្រភពព័ត៌មានចចាមអារ៉ាមបានទម្លាយចេញពីលក្ខណៈសម្បត្តិ និងគុណសម្បត្តិផ្សេងៗរបស់វាជាហូរជាហែរមិនដាច់។ ហើយថ្មីៗនេះយោងតាមប្រភពព័ត៌មានពីបណ្តាញ sammobile.com បានឲ្យដឹងថា “Galaxy Note9 ដែលត្រៀមបង្ហាញខ្លួនក្នុងពេលឆាប់ៗខាងមុខនេះនឹងមានការផ្លាស់ប្តូរការរចនាលើផ្នែកមួយចំនួនខុសពីជំនាន់ Note 8 ឬអាចនឹងប្រើរចនាបថដូចគ្នាទៅនឹងបងប្អូនត្រកូល Galaxy S9 វិញ ហើយវាក៏នឹងបន្ថែមនូវម៉ូដែលបំពាក់រ៉េមទំហំ 8GB ជាមួយម៉េមូរីក្នុងម៉ាស៊ីនទំហំ 256GB មួយទៀតផងដែរ។ ប្រភពដដែលក៏បានធ្វើការព្យាករណ៍ទៅលើគុណសម្បត្តិមួយចំនួនដែលនឹងត្រូវបានធ្វើការកែប្រែបន្ថែមពីជំនាន់ Galaxy Note 8 ទៀតផងដែលមានដូចជា៖
-ប្រព័ន្ធកាមេរ៉ាភ្លោះភ្ជាប់នូវបច្ចេកវិទ្យាកាមេរ៉ាថ្មីកាន់តែទំនើប
Note 9 នឹងមិនត្រូវបានប្រើកាមេរ៉ាបីគ្រាប់សម្រាប់កាមេរ៉ាក្រោយនោះទេ ព្រោះថា Samsung កំពុងធ្វើការអភិវឌ្ឍប្រព័ន្ធកាមេរ៉ាបីគ្រាប់ (Triple camera) ទុកសម្រាប់បំពាក់នៅលើកំពូលស្មាតហ្វូនជំនាន់ Galaxy S10 ដែលត្រៀមចេញនៅដើមឆ្នាំក្រោយវិញ។ យ៉ាងណាមិញ Samsung ក៏ទើបតែបានបង្ហាញបច្ចេកវិទ្យាកាមេរ៉ាថ្មីដែលហៅថា ISOCELL Plus technology ដែលគេជឿកជាក់ថានឹងត្រូវប្រើនៅលើ Note 9 ដំបូងគេ។ បច្ចេកវិទ្យាថ្មីនេះមានសមត្ថភាពជួយអោយកាមេរ៉ាស្រូបពន្លឺបានខ្លាំងជាងមុន (ពិសេសនៅពេលថតនៅទីតាំងពន្លឺទាប ឬពេលយប់) ហើយនិងបន្ថែមរសពណ៌កាន់តែច្បាស់ដិតស្រស់ធ្វើអោយរូបភាពដែលបានផលិតចេញមកមានពន្លឺច្បាស់គ្រប់គ្រាន់ និងមានពណ៌ដិតស្រស់ស្អាតបំផុត។ ចំនែកឯកាមេរ៉ាក៏ត្រូវបានភ្ជាប់នូវមុខងារ AR Emoji ដែលជាការបន្ថែមរសជាតិថ្មីដើម្បីផ្គាប់ចិត្តហ្វែនត្រកូល Note អោយទទួលបានភាពសប្បាយរីករាយក្នុងការថតរូបសែលហ្វីថែមមួយកម្រិតទៀត។
-ប៊ិច S-Pen បង្កើននូវភាពទំនើបក្នុងការប្រើប្រាស់
ស្មាតហ្វូនត្រកូ Note គឺជាស្រឡាយស្មាតហ្វូនតែមួយគត់របស់ Samsung ដែលត្រួវបានគេស្គាល់ច្បាស់តាមរយះការប្រើប្រាស់នូវប៊ិច S Pen ដែលបានភ្ជាប់មកជាមួយវា។ ប៊ិច S Pen របស់ស្រឡាយ Note ផ្តល់នូវភាពងាយស្រួលដល់អ្នកប្រើប្រាស់ជាពិសេសអ្នកធ្វើជំនួញក្នុងការកត់ត្រាចំណាំ និងបំពេញកិច្ចការងារផ្សេងៗបានរហ័សភ្លាមៗកំឡុងពេលធ្វើដំណើរ។ ហើយពីមួយជំនាន់ទៅមួយជំនាន់ប៊ិចដែលភ្ជាប់នៅលើកំពូលស្មាតហ្វូន Galaxy Note ត្រូវបានធ្វើការអភិវឌ្ឍលើមុខងារប្រើប្រាស់កាន់តែទំនើបឡើងៗ។ សម្រាប់ប៊ិច S Pen របស់ Galaxy Note 9 ត្រូវបានគេរំពឹងទុកថានឹងមានភ្ជាប់នូវបច្ចេកវិទ្យាប្លូធូសដើម្បីផ្តល់នូវភាពងាយស្រួលក្នុងការភ្ជាប់ដើម្បីបញ្ជាមុខងារមួយចំនួននៅលើទូរស័ព្ទពីចំងាយដូចជាការកំណត់ម៉ោង (Self-Timer) ដោយស្វ័យប្រវត្តិ, គ្រប់គ្រងការចាក់តន្ត្រី គ្រប់គ្រងលើមុខងារលេងហ្គេមមួយចំនួន និងមុខងារជាច្រើនទៀត។
-មុខងារជំនួយការ Bixby កាន់តែមានភាពឆ្លាតវៃជាងមុន
Samsung បាននិយាយថាមុខងារជំនួយការសំឡេងឆ្លាតវៃជំនាន់ថ្មី Bixby2.0 ដែលត្រូវបានធ្វើការអភិវឌ្ឍឡើងថ្មីកាន់តែមានភាពឈ្លាសវៃជាងជំនាន់ដំបូងហើយវាក៏នឹងត្រូវបានប្រើនៅលើ Note 9 ផងដែរ។ Bixby 2.0 មានសមត្ថភាពក្នុងការឆ្លើយតប ឆាប់យល់នៅអី្វដែលយើងបានសួរនិងស្វែងរកនូវចម្លើយបានលឿនរហ័សជាងមុន។ វាក៏ត្រូវបានគេរំពឹងទុកទៀតថានឹងយល់ពីភាសានិយាយ (Natural Language) បានច្រើនជាងមុន និងមិនច្រឡំនូវសំឡេងរំខានទាំងឡាយពីមជ្ឍដ្ឋានជុំវិញបានកាន់តែប្រសើរបំផុតទៀតផង។
-ថាមពលថ្មនឹងត្រូវបង្កើនកំលាំងខ្លាំងជាងមុន
ជំនាន់ទី8 (Note 8) ប្រើប្រាស់ថ្មកំលាំង 3,300 មីលីអំពែម៉ោងនៅពេលប្រកាសចេញដំបូងវាធ្វើអោយអ្នកប្រើប្រាស់ និងហ្វែនរបស់វារាងអន់ចិត្តបន្តិច ប៉ុន្តែកំលាំងថ្ម 3,300 មីលីអំពែរបស់វាធ្វើការបានយ៉ាងល្អមិនដូចអ្វីដែលយើងបានគិតឯណាគឺវាកាន់បានយូរដែលអាចកំដរការប្រើប្រាស់របស់យើងបានយូរគួរសម។ យ៉ាងណាមិញសម្រាប់ថ្មរបស់ Galaxy Note 9 ត្រូវបានគេរំពឹងទុកយ៉ាងមុតមាំថានឹងបង្កើនកំលាំងខ្លាំងរហូតដល់ទៅ 4,000 មីលីអំពែម៉ោងឯណោះ។ ប្រភពបានអោយដឹងទៀតថា “ថ្មកំលាំង 4,000 មីលីអំពែរបស់ Galaxy Note 9 មានសមត្ថភាពកាន់បាន 2 ថ្ងៃ និងការចាក់វីដេអូនៅលើអេក្រង់ជាប់ជាមួយកម្រិតពន្លឺពេញលេញបាន 25 ម៉ោង”។ ជារួមមកវិញទាំងអស់នេះគ្រាន់តែជាមុខងារសំខាន់ៗមួយចំនួនដែលប្រភពព័ត៌មានបានទម្លាយចេញមកប៉ុណ្ណោះ ចំពោះការរចនារូបរាង បច្ចេកវិទ្យា និងមុខងារទូទៅពិតប្រាកដដែលនឹងបំពាក់នូវលើកំពូលស្មាតហ្វូនកូនកាត់ហ្វាប់ប្លែតជំនាន់ថ្មី Samsung Galaxy Note 9 យើងនឹងបានដឹងច្បាស់នៅថ្ងៃ Samsung ប្រកាសចេញផ្លូវការណ៍ដែលអាចនៅកំឡុងខែក្រោយនេះតែម្តង៕