ថ្មីៗនេះ យោងតាមព័ត៌មានផ្លូវការមួយបានអោយដឹងថា MSI ដែលជាក្រុមហ៊ុនបច្ចេកវិទ្យាឈានមុខគេទៅលើឧស្សាហកម្មហ្គេមនោះ ត្រូវបានគេចាត់ទុកថា គឺជាម៉ាកយីហោបច្ចេកវិទ្យា ដែលអាចជឿជាក់បានបំផុតនៅក្នុងវិស័យ Notebook នៅក្នុងតំបន់អ៊ឺរ៉ុប។ បន្ថែមពីនេះទៀតនោះក៏មានការរាយការណ៍មួយផ្សេងទៀតបានបន្តថា ក្រុមហ៊ុន MSI បានក្លាយជាអ្នកផ្គត់ផ្គង់ធំបំផុតនៅក្នុងទីផ្សារ Gaming Notebook ទៅលើការនាំចេញផងដែរ។
ការស្ទាបស្ទង់ដែលអាចជឿជាក់បានមួយដែលធ្វើឡើងដោយ UFC-Que Choisir ដែលជាស្ថាប័នអ្នកប្រើប្រាស់របស់ប្រទេសបារាំងធ្វើការសម្ភាស៍ទៅលើមនុស្សប្រមាណជា 43000 នាក់នៅក្នុងអ៊ឺរ៉ុប ហើយលទ្ធផល គឺមានការបង្ហាញថាក្រុមហ៊ុនបច្ចេកវិទ្យា MSI គឺជាម៉ាកយីហោកុំព្យូទ័រ Laptop ដែលគួរអោយជឿជាក់បំផុត ខណៈពេលដែលក្រុមហ៊ុន Microsoft និង Apple គឺតាមពីក្រោយ។
សម្រាប់ការស្ទាបស្ទង់ទីមួយទៀតដែលធ្វើឡើងដោយ Digitimes មួយនៅក្នុងចំណោម Media ធំបំផុតទៅលើបច្ចេកវិទ្យានោះនៅក្នុងតៃវ៉ាន់រាយការណ៍ថា ក្រុមហ៊ុន MSI មានការនាំចេញនូវ Gaming Notebooks ចំនួន 1.2 លានគ្រឿងនៅក្នុងឆ្នាំ 2018 ហើយក្រុមហ៊ុន Asustek Computer លែងក្លាយជាក្រុមហ៊ុនធំជាងគេបំផុតទៀតហើយនៅក្នុងទីផ្សារ Gaming Notebook ទៅលើការនាំចេញនោះ។
MSI ទើបតែបង្ហាញនូវកុំព្យូទ័រលេងហ្គេមជំនាន់ថ្មីជាច្រើនរបស់ខ្លួនដែលប្រើប្រាស់នុវបន្ទះឈីប Intel processors និងក្រាហ្វិកកាតចុងក្រោយបំផុតរបស់ Nvidia ដែលគេរំពឹងថា នឹងមានការកើនឡើងផងដែរសម្រាប់ទីផ្សារ Gaming Laptop នៅក្នុងឆ្នាំ 2019 នោះ៕