MSI គឺជាម៉ាកយីហោកុំព្យូទ័រដែលមានការទទួលស្គាល់ និងល្បីល្បាញក្នុងការប្រើប្រាស់ និងត្រូវគេស្គាល់ថា គឺជាក្រុមហ៊ុនល្អបំផុត ដែលផ្តោតទៅលើការលេងហ្គេម។ ប៉ុន្តែ នៅពេលនេះ គឺមានការផ្លាស់ប្តូរហើយ ដោយសារតែមានការអះអាងថ្មីៗនេះថា ម៉ាស៊ីនកុំព្យូទ័ររបស់ក្រុមហ៊ុន MSI ក៏សក្តិសមបំផុតសម្រាប់សិស្សានុសិស្សដែលរៀននៅក្នុងមហាវិទ្យាល័យសម្រាប់កិច្ចការងារប្រើប្រាស់ប្រចាំថ្ងៃរបស់ពួកគេផងដែរ។ សម្រាប់ម៉ូដែលល្អ និងសក្តិសមបំផុតនោះ គឺ MSI PS63 ដែលកន្លងមកនេះ ម៉ាស៊ីនថ្មីនេះ គឺទទួលបាននូវពានរង្វាន់ជាកុំព្យូទ័រដ៏ល្អបំផុតសម្រាប់ប្រើប្រាស់នៅក្នុងមហាវិទ្យាល័យពីទស្សនាវដ្តី Forbes នៅក្នុងឆ្នាំ 2019 នេះទៀតផង។
ការឌីស្សាញដ៏ល្អឥតខ្ចោះ៖ PS63 Modern មានអេក្រង់ទំហំ 15.6-inch ជាមួយនឹងកម្រិតភាពច្បាស់ 1920x1080px ហើយនិងមានគែមអេក្រង់គឺ ពិតជាស្តើងមែនទែនសម្រាប់ប្រើប្រាស់។ កុំព្យូទ័រនេះមានរូបរាងស្រស់ស្អាតស្តើងក្នុងការប្រើប្រាស់ថែមទៀត។ កុំព្យូទ័រស៊េរីថ្មី PS63 នេះ គឺមិនមែនជាប្រភទ Touchscreen Laptop នោះទេ ប៉ុន្តែ Keyboard នៅលើម៉ាស៊ីនកុំព្យូទ័រគឺធំ និងល្អក្នុងការវាយអក្សរនៅលើ Keys របស់វា ជាពិសេសវាក៏មានភ្ជាប់ជាមួយនឹងប្រព័ន្ធស្កេនក្រយ៉ៅដៃ fingerprint reader នៅខាងក្នុងម៉ាស៊ីននេះថែមទៀត។ ជាមួយនឹងវិញ្ញាបនបត្រ “Quiet Mark” នោះ ម៉ាស៊ីនកុំព្យូទ័រនេះគឺមានសំឡេងស្ងាត់ក្នុងការប្រើប្រាស់បំផុត។
លក្ខណៈសម្បត្តិ៖ ម៉ាស៊ីនកុំព្យូទ័រ PS63 Modern របស់ក្រុមហ៊ុន MSI គឺមានភ្ជាប់ជាមួយនឹងបន្ទះឈីប 1.8GHz Core i7-8565U CPU ជំនាន់ទី 8 មានរ៉េមទំហំ 16GB និង SSD ទំហំ 512GB។ សម្រាប់កុំព្យូទ័រ Laptop នេះគឺប្រើប្រាស់ជាមួយនឹងក្រាហ្វិកកាត Nvidia GeForce ជំនាន់ថ្មី GTX 1650 4GB ដែលមានសមត្ថភាពខ្ពស់នៅ ក្នុងធ្វើការអោយដំណើរការទៅលើការងារជាច្រើន ដែលមានក្រាហ្វិកធំៗ បានយ៉ាងរលូន ជាពិសេស គឺការលេងហ្គេមតែម្តង។ ។ សម្រាប់រន្ធផតរបស់វាមានដូចជា 3 x full-size USB 3.1 ports, USB-C port, micro SD card slot និង full-size HDMI port ដែលល្អគ្រប់គ្រាន់សម្រាប់អ្នកប្រើប្រាស់នៅក្នុងមហាវិទ្យាល័យ។ កុំព្យូទ័រនេះមានទម្ងន់ 3.7 ផោន និងកម្រាស់ស្តើងត្រឹមតែ 21mm តែប៉ុណ្ណោះ។
កម្លាំងម៉ាស៊ីនខ្លាំងក្លា៖ កុំព្យូទ័រ PS63 នេះគឺមានចំណាត់ថ្នាក់ល្អនៅក្នុងការប្រើប្រាស់ជាមួយនឹងកម្មវិធី Apps ជាច្រើនរួមមានការ Render ទៅលើ Web Page កម្មវិធីសម្រាប់អាជីវកម្ម និងការបង្កើតការងារផ្នែកឌីជីថលថែមទៀត។ សម្រាប់ពិន្ទុនៃផ្នែកក្រាហ្វិកកាត និងការលេងហ្គេមរបស់វាគឺនៅពីក្រោយតែបន្តិចប៉ុណ្ណោះបើធៀបជាមួយនឹងកុំព្យូទ័រ Surface Book 2 នេះ។ កុំព្យូទ័រជំនាន់ថ្មីនេះ គឺភ្ជាប់ជាមួយនឹងសមាសភាគកម្រិតខ្ពស់ និងអេក្រង់ធំថែមទៀត។ មានថាមពលថ្មដែលអាចប្រើប្រាស់បានរយៈពេល ៩ ម៉ោង ៣ នាទីនៅក្នុងការតេស្ត៍ទៅលើការទស្សនាវីដេអូ Full-Screen និងធ្វើការធម្មតាបានរហូតដល់ទៅ 16 ម៉ោង។
ដូចនេះ សម្រាប់សិស្សានុសិស្ស ដែលទិញយកកុំព្យូទ័រនេះ ទៅប្រើប្រាស់នោះគឺល្អបំផុតក្នុងការងារស្រាវជ្រាវរបស់ពួកគេ មិនថា សម្រាប់មុខងារកម្សាន្តនោះ ឬការលេងហ្គេម ឬការធ្វើកិច្ចការងារសាលានោះទេ គឺពិតជារលូន និងអស្ចារ្យបំផុតក្នុងការប្រើប្រាស់៕