កាលពីសប្តាហ៍មុននេះ ក្រុមហ៊ុន Canalys បានបញ្ចេញនូវរបាយការណ៍សម្រាប់ទីផ្សារកុំព្យូទ័រសកលសម្រាប់ត្រីមាសទី 3 ឆ្នាំ 2020 នេះ។ នៅពេលនេះ ស្ថាប័ន Strategy Analytics ក៏បញ្ចេញនូវរបាយការណ៍មួយដែលមានការបង្ហាញអំពីទីផ្សារនៃកុំព្យូទ័រ Notebook សកលនៅក្នុងត្រីមាសទី 3 ឆ្នាំ 2020 នេះ ដូចគ្នាដែរ។
នៅក្នុងរបាយការណ៍នេះ គឺមិនមានការរាប់បញ្ចូលនូវថេប្លេត និងកុំព្យូទ័រ Desktops នោះទេ។ ប៉ុន្តែមានរបាយការណ៍មួយដែលមានការបង្ហាញអំពីភាពជោគជ័យរបស់ Chromebooks រួមជាមួយនឹងនិងក្រុមហ៊ុន HP ដែលបានក្លាយជាអ្នកនាំមុខទៅលើទីផ្សាររបស់ Notebook នេះផងដែរ។
តាមការបញ្ជាក់របស់ Strategy Analytics បានអោយដឹងថា ការនាំចេញទីផ្សារកុំព្យូទ័រ Notebook សម្រាប់ទីផ្សារសកល គឺមានចំនួនសរុប 62.2 លានគ្រឿងនៅក្នុងត្រីមាសទី 3 ឆ្នាំ 2020 នេះ ដែលមានការកើនឡើងដល់ទៅ 34% បើធៀបទៅនឹងឆ្នាំមុននេះ។ ក្រុមហ៊ុន HP គឺជាប់ចំណាត់ថ្នាក់នាំមុខគេជាមួយនឹងការនាំចេញចំនួន 14.7 លានគ្រឿង ដែលតាមពីក្រោយដោយក្រុមហ៊ុន Lenovo ដែលមានចំនួន 14.6 លានគ្រឿង។ សម្រាប់ក្រុមហ៊ុនជាប់ចំណាត់ថ្នាក់លេខ 3 លេខ 4 និងលេខ 5 គឺមានក្រុមហ៊ុន Dell, Apple និង Acer ដែលមានទីផ្សារចំនួន 8.5, 6.0 និង 4.9 លានគ្រឿង។
សម្រាប់ចំណែកទីផ្សារនោះ ក្រុមហ៊ុន HP និង Lenovo គឺមានចំណែកទីផ្សារចំនួន 23.6% ដែលតាមពីក្រោយដោយក្រុមហ៊ុន Dell, Apple និង Acer ដែលមានចំនែកទីផ្សារចំនួន 13.7%, 9.7% និង 7.9%។ ក្រុមហ៊ុន HP គឺមានការកើនឡើងចំនួន 43% បើធៀបទៅនឹងឆ្នាំមុននេះ។ ក្រុមហ៊ុន Apple គឺមានការកើនឡើងដល់ទៅ 39% បើធៀបទៅនឹងឆ្នាំមុននេះ។
បើនិយាយអំពីប្រព័ន្ធប្រតិបត្តិការវិញនោះ សម្រាប់ Windows គឺជាប់លេខ 1 ដែលមានការនាំចេញចំនួន 45.3 លានគ្រឿង និងមានចំណែកទីផ្សារចំនួន 72.8% មានការកើនឡើងចំនួន 23% បើធៀបទៅនឹងឆ្នាំមុននេះ។ រីការនាំចេញទៅលើ Chrome OS នេះគឺមានការកើនឡើងចំនួន 124% បើធៀបទៅនឹងឆ្នាំមុននេះ ជាមួយនឹងការនាំចេញចំនួន 10 លានគ្រឿង។ ក្រុមហ៊ុន Apple គឺមានការនាំចេញនូវ MacOS notebooks (Macbooks)ចំនួន 6 លានគ្រឿងដែលមានកំណើន 39% បើធៀបទៅនឹងឆ្នាំមុននេះ។ ក្រុមហ៊ុននេះ គឺជាប់ចំណាត់ថ្នាក់លេខ 3 ដែលមានចំណែកទីផ្សារចំនួន 9.7% សម្រាប់ប្រព័ន្ធប្រតិបត្តិការនេះ៕