AirPods Max គឺជាកាសឥតខ្សែស៊េរីថ្មី និងជាកាសប្រភេទក្តោបត្រចៀកដែលជាផលិតផលដំបូងរបស់ក្រុមហ៊ុន Apple។ ជាមួយកាសស៊េរីថ្មីនេះ ក្រុមហ៊ុន Apple នឹងធ្វើការប្រកាសចេញលក់ផ្លូវការណ៍នាថ្ងៃទី 15 ខែធ្នូ សប្តាហ៍ក្រោយនេះដែលមានតម្លៃខ្ទង់ $549។ ចំពោះគុណសម្បត្តិរបស់កាសស្តាប់ក្តោបត្រចៀកស៊េរីថ្មីដំបូងរបស់ Apple នេះគឺវាមានការរចនាឡើងជាមួយនឹងសមាសធាតុមានគុណភាពខ្ពស់បំផុតផ្តល់អោយការប្រើប្រាស់មានទំនុកចិត្តខ្ពស់។
កាស AirPods Max ត្រូវបានរចនារូបរាងឡើងជាមួយនឹងសារធាតុស្បែកដែលមានភាពទន់ល្មើយដូចសំឡីដែលផ្តល់នូវផាសុខភាពក្នុងការពាក់ មិនធ្វើអោយឈឺស្លឹកត្រចៀក។ សម្រាប់នៅលើផ្នែកខាងក្រោយនៃក្តោបត្រចៀកទាំងសងខាងរបស់វាត្រូវបានស្រោបដោយលោហៈធាត Stainless steal ដែលផ្តល់នូវភាពធន់រឹងមាំក្នុងការប្រើប្រាស់។ ហើយនៅលើក្តោបនៃកាសទាំងសងខាងត្រូវបានបំពាក់នូវឈីបប្រភេទ H1 ដែលត្រូវបានធ្វើការឌីស្សាញឡើងស្របតាមលំនាំ acoustic ជាមួយនឹងប្រព័ន្ធ Software ដ៏ល្អបំផុត។
ឈីប H1 របស់ AirPods Max វាផ្តល់នូវកម្រិតគុណភាពសំឡេង 10 audio-core ផ្តល់នូវល្បឿនកម្រិតសំឡេងដល់ទៅ 9 ពាន់លានក្នុងមួយវិនាទីធ្វើអោយគុណភាពសំឡេង និងការស្តាប់គឺមានភាពដ៏អស្ចារ្យបំផុតមិនធ្លាប់មាន។ ជាងនេះទៅទៀត Apple បាននិយាយថា AirPods Max របស់ខ្លួនបានភ្ជាប់នូវកម្រិតសំឡេងបែប Adaptive EQ, បច្ចេកវិទ្យាកាត់បន្ថយសំឡេងរំខាន Active Noise Cancelling ដូច AirPods Pro ដែរ រួមជាមួយមុខងារ Transparency Mode និង Spatial Audio ថែមទៀតផង។ សម្រាប់សំឡេងវិញ AirPods Max មានសមត្ថភាពខ្ពស់ក្នុងការបន្លឺសំឡេងបានលឺខ្លាំងកម្រិត 5.1 ទៅ 7.1 audio channel ជាមួយសាច់បាសប៊ុកខ្លាំងរងំមិនបែក ព្រមទាំងភ្ជាប់នូវបច្ចេកវិទ្យាសំឡេង Dolby Atmos ផងដែរ។ កាសស៊េរីថ្មី Apple AirPods Max មានជម្រើសរហូតដល់ទៅ 5 ពណ៌ក្នុងនោះមានដូចជាពណ៌ប្រផេះ, ទឹកប្រាក់, ខៀវ, បៃតង និងផ្កាឈូក។
សូមបញ្ជាក់ថា កាលពីខែកញ្ញា,2020 កន្លងទៅ ក្រុមហ៊ុន Apple បានប្រកាសឈប់ដាក់លក់កាសរបស់ក្រុមហ៊ុនផ្សេងនៅតាមហាង AppleStore របស់ខ្លួនជាច្រើននៅទូទាំងពិភពលោក ហើយក្នុងនោះក៏មានកាសម៉ាកល្បីរបស់អាមេរិកគឺម៉ាក BOSE ផងដែរ។ ហើយពេលនេះក្រុមហ៊ុនបច្ចេកវិទ្យា Cupertino របស់អាមេរិកមួយនេះ ក៏បានប្រកាសចេញកាសស៊េរីថ្មីអត់ខ្សែដែលជាប្រភេទកាសក្តោបត្រចៀកដំបូងរបស់ខ្លួនដើម្បីប្រជែងទីផ្សារជាមួយនឹងក្រុមហ៊ុនផ្សេងៗទៀត៕