គិតមកដល់ថ្ងៃនេះ គឺមានរយៈពេលពីឆ្នាំហើយ បន្ទាប់ពីបានបញ្ចេញនូវ Prestige Series។ សម្រាប់ម៉ាស៊ីនកុំព្យូទ័រយួរដៃរបស់ក្រុមហ៊ុន MSI របស់តៃវ៉ាន់ ដែលផ្តោតសំខាន់ទៅលើការប្រើប្រាស់ក្នុងកិច្ចការងារទូទៅ ដែលមិនមែនជា Gaming Laptop យើងឃើញមានដូចជាម៉ាក MSI Prestige Series, Modern Series និង Summit Series ជាដើម។ ហើយ MSI Summit E15 គឺជាកុំព្យូទ័រយួរដៃស៊េរីថ្មីមួយម៉ូដែលទៀតដែលស្ថិតក្នុងស្រឡាយ Summit Series Laptop។
ម៉ាស៊ីនកុំព្យូទ័រយួរដៃស៊េរីថ្មីនេះត្រូវបាន MSI ធ្វើការផលិតឡើងដើម្បីផ្តល់នូវភាពងាយស្រួលប្រើដល់អ្នកប្រើប្រាស់ ពិសេសសម្រាប់អ្នកប្រើដែលជាអ្នកជំនួញជួញដូរ ឬក៏សិស្សនិសិត្ស ដែលចង់បានម៉ាស៊ីនកុំព្យូទ័រយួរដៃដែលមានគុណភាពផលិតកម្រិតខ្ពស់ ធន់នឹងការប្រើប្រាស់ និងមានសមត្ថភាពខ្លាំងប្រើលើកិច្ចការងារទូទៅបានរលូនដោយមិនមានបញ្ហា។ MSI Summit E15 មានតួរខ្លួនរឹងមាំស្រោបឡើងពីសារធាតុលោហៈរំលេចនូវភាពប្រណិតបែប Premium ជាមួយនឹងទំងន់ស្រាលល្មមត្រឹម 1.7 គីឡូក្រាម និងមានកម្រាស់សរុប 16.9 ម.ម។
ម៉ាស៊ីនកុំព្យូទ័រយួរដៃមួយនេះមានអេក្រង់ទំហំ 15.6 អ៊ីញប្រភេទ IPS Touch Screen ទ្រទ្រង់កម្រិតបង្ហាញដល់ 4K Ultra-HD ជាមួយបច្ចេកវិទ្យាចាក់ពណ៌ 100% Adobe RGB Color gamut ដូចនេះវាផ្តល់នូវភាពទូលាយស្រឡះល្អសម្រាប់ការបំពេញកិច្ចការងារទូទៅជាមួយនឹងកម្រិតពន្លឺ និងពណ៌ចាក់ចេញច្បាស់ដិតត្រជាក់ភ្នែក។
ចំនែកផ្ទាំងក្តារ Keyboard វិញគឺពិតជាផ្តល់នូវភាពងាយស្រួលដល់ការវាយអត្ថបទ ព្រោះថា វាត្រូវបានរចនាតំរៀបឡើងជាមួយគ្រាប់ចុចទាលធំ និងមានគម្លាតសមល្មមដាក់ម្រាមដៃ ព្រមទាំងមានភ្លើង LED នៅពីក្រោមថែមទៀតផង។ រីឯផ្ទាំងក្តា Touchpad នៅលើ Summit E15 ក៏មានធំល្មមផ្តល់នូវភាពងាយស្រួលដល់ការប្រើប្រាស់ដោយមិនចាំបាច់ពឹងលើ USB Mouse ឡើយ ហើយក៏មានបង្កប់នូវ បច្ចេកវិទ្យាស្កែនក្រយ៉ៅម្រាមដៃដោះសោរសុវត្ថិភាពនៅជាមួយថែមទៀតផង។
សម្រាប់ម៉ាស៊ីនរបស់ MSI Summit E15 វិញគឺដំណើរការលើខួរក្បាលជំនាន់ចុងក្រោយបំផុតរបស់ Intel គឺ 11th Gen-core i7 លេខ 1185G7 កម្រិត Quad-core ដែលអូសល្បឿនបានជាំមធ្យមដល់ 1.2GHz និងអាច Boost ល្បឿនដោយប្រើបច្ចេកវិទ្យា Dual-core Turbo ឡើងដល់ 4.8GHz ទ្រទ្រង់ដោយរ៉េមប្រភេទ DDR4-3200 ទំហំ 16GB និងអាចដាក់បន្ថែមបានដល់ 64GB ជាមួយរន្ធ SO-DIMM Slot។
សម្រាប់អង្គក្រាហ្វិចវិញគឺប្រើនូវ Intel Iris-X GPU និង Nvidia GeForce GTX1650Ti ជាមួយប្រព័ន្ធ Max-Q Design (A11SCS)4GB GDDR6 ។ ចំនែកឯទំហំថាសរឹកផ្ទុកឯកសារវិញគឺមានទំហំធំរហូតដល់ទៅ 1TB ជាប្រភេទ NVMe SSD។ និយាយរួមទៅការជ្រើសរើសប្រើជាមួយ MSI Summit E15 គឺថារាល់ការងារទាំងឡាយរបស់លោកអ្នកនឹងបញ្ចប់ទៅបានលឿនរហ័សទាន់ពេលវេលាតែម្តង។
ហើយក្រៅតែពីមានការឌីស្សាញរូបរាងខាងក្រៅមើលទៅទាក់ភ្នែកបែប Premium ភ្ជាប់ដោយអេក្រង់គុណភាពល្អទំហំធំទូលាយ និងមានកំលាំងម៉ាស៊ីនខ្លាំងហើយ MSI Summit E15 នៅមានភ្ជាប់នូវគុណសម្បត្តិល្អៗជាច្រើនទៀតក្នុងនោះ រួមមានដូចជា ថ្មកំលាំង 82Whr ដែលសាកពេញម្តងកាន់ប្រើក្នុងកិច្ចការងារធម្មតាៗបានដល់ 17 ម៉ោង និងសាកភ្លើងចូលវិញបានលឿនជាមួយឆ្នាំងកំលាំង 90W ដោយប្រើរន្ធចម្លង USB-C 4.0, ប្រើប្រាស់ម៉ូឌឹម Wi-Fi 6, ប្លូធូស v5.1, មានរន្ធដោតម៉ាយក្រូហ្វូន/កាសខ្នាត 3.5mm Combo Jack, រន្ធដោត microSD, HDMI កម្រិត 4K@60Hz, 2x USB-A3.2, 2x USB-C Version 4/Thunderbolt 4 និងទ្រទ្រង់ដំណើរការដោយប្រតិបត្តិការ Microsoft Windows 10 Home/Pro 64bit។
MSI Summit E15 បានចេញដាក់លក់នៅលើបណ្តាញលក់អនឡាញរបស់ក្រុមហ៊ុន Amazon ក្នុងតម្លៃខ្ទង់ $1,699៕