យោងតាមរបាយការណ៍ព័ត៌មានដែលបានចេញផ្សាយកាលពីពេលថ្មីៗនេះ បាននិយាយថាក្រុមហ៊ុន Lenovo ត្រៀមប្រកាសចេញស្មាតហ្វូនហ្គេមីងជំនាន់ថ្មីដែលចូលមកស្នងដំណែងម៉ូដែល Legion Duel ឬ Legion Pro ដែលបានប្រកាសចេញកាលពីឆ្នាំទៅក្នុងពេលឆាប់ៗនេះ។ ដែលយោងតាមប្រភពព័ត៌មានចចាមអារាមដែលមានទម្លាយចេញនាពេលកន្លងមកផងដែរនោះបាននិយាយថា ទូរស័ព្ទហ្គេមជំនាន់ថ្មីរបស់ Lenovo នោះគឺម៉ូដែល Legion 2 Pro។
ប្រភពក៏បានបញ្ជាក់ទៀតថា ទូរស័ព្ទជំនាន់ថ្មីនេះនឹងបំពាក់នូវបន្ទះឈីបកំពូលគឺ Snapdragon 888 រួមនឹងការអភិវឌ្ឍន៍ថ្មីទៅលើប្រព័ន្ធកង្ហាលត្រជាក់ (re-vamped fan cooling) ដើម្បីជួយសម្រួលដល់ប្រព័ន្ធដំណើរការម៉ាស៊ីនឲ្យកាន់តែមានប្រសិទ្ធិភាពខ្លាំងជាងជំនាន់មុនទៀតផង។ ក្រឡេកមកថ្ងៃនេះវិញម្តង យើងក៏បានប្រទះឃើញទូរស័ព្ទជំនាន់ថ្មីមួយរបស់ Lenovo ដែលប្រើលេខកូដសំគាល់ម៉ូដែល L70081 នៅលើកម្មវិធី Geekbench ដែលគេជឿជាក់ថាស្មាតហ្វូននេះគឺជា Lenovo Legion 2 Pro យ៉ាងពិតប្រាកដ។
ហើយបើតាមការបង្ហាញនេះ Lenovo L70081 គឺមានរ៉េមទំហំធំដល់ 16GB (14.81GB) និងដំណើរការដោយ Android 11។ រីនៅលើរូបភាពនៃភាសាកូដចំនួនពីរផ្សេងទៀតគឺបង្ហាញថា ស្មាតហ្វូននេះគឺប្រើប្រាស់អង្គក្រាហ្វិច Adreno 660 ដែលជាអង្គក្រាហ្វិចប្រើជាមួយនឹងកំពូលឈីប Snapdragon 888។ បើតាមរយះពិន្ទុដែលធ្វើតេស្តដោយកម្មវិធី Geekbench 5 គឺទទួលបាន 1,129 ពិន្ទុនៅលើអង្គគណនា Single-core និង 3,763 ពិន្ទុនៅលើអង្គគណនា Multi-core។
បើតាមប្រភពព័ត៌មានបែកធ្លាយនានាបាននិយាយថា Lenovo Legion 2 Pro នឹងបំពាក់មកជាមួយនូវបន្ទះអេក្រង់ AMOLED ដែលមានកម្រិត refresh rate ដល់ទៅ 144Hz, បំពាក់នូវកំពូលឈីប Snapdragon 888 ភ្ជាប់ដោយរ៉េមប្រភេទ LPDDR5 និងអង្គផ្ទុកទិន្នន័យប្រភេទ UFS3.1, រួមទាំងមានថ្មទំហំធំដល់ 5,000mAh ជាដើម៕