កាលពីខែកុម្ភៈកន្លងទៅក្រុមហ៊ុន Redmi ដែលជាបុត្រសម្ព័ន្ធរបស់ក្រុមហ៊ុន Xiaomi បានធ្វើការប្រកាសចេញនូវម៉ាស៊ីនកុំព្យូទ័រយួរដៃស៊េរីថ្មីក្នុងស្រឡាយ RedmiBook Pro Series ដែលមានដូចជា RedmiBook Pro 14 និង Pro 15 នៅប្រទេសចិន។ ហើយសម្រាប់ម៉ូដែល Pro 14 ត្រូវបានក្រុមហ៊ុនប្រកាសដាក់អោយធ្វើការបញ្ជាទិញមុនចាប់តាំងពីថ្ងែទី 25 ខែកុម្ភៈកន្លងមកម្ល៉េះ ហើយនិងបានចេញលក់ផ្លូវការណ៍នៅថ្ងៃទី 04 ខែមិនា កន្លងទៅនេះ។ ចំនែកម៉ូដែល Pro 15 វិញត្រូវបានក្រុមហ៊ុនប្រកាសដាក់អោយបញ្ជាទិញមុនចាប់ពីថ្ងៃទី 06 ខែមិនា និងចេញលក់ផ្លូវការណ៍នៅថ្ងៃទី 15 មិនានេះតែម្តង។
ទៅលើគុណសម្បត្តិផ្នែករឹងរបស់ម៉ាស៊ីនកុំព្យូទ័រយួរដៃម៉ាក RedmiBook Pro ទាំងពីរស៊េរីនេះគឺដូចគ្នាទាំងអស់លើកលែងតែទំហំអេក្រង់ ទំហំថ្ម និងបច្ចេកវិទ្យាសាកថ្មតែប៉ុណ្ណោះ។ RedmiBoook Pro 15 បំពាក់នូវអង្គ CPU Intel-core i5 ឬ i7 ជំនាន់ទី 11 និងភ្ជាប់ដោយអង្គក្រាហ្វិចប្រភេទ NVIDIA MX450 mobile GPU។ នៅលើម៉ាស៊ីនរបស់ Pro 15 មានជំនួយល្បឿនប្រតិបត្តិការណ៍ពីរ៉េមទំហំ 16GB ប្រភេទ DDR4-3200Hz និងប្រើថាសរឹងផ្ទុកឯកសារប្រភេទ PCIe SSD ទំហំ 512GB។ ម៉ាស៊ីនកុំព្យូទ័រយួរដៃ RedmiBook Pro 15 មានថ្មទំហំ 70Whr ទ្រទ្រង់បច្ចេកវិទ្យាសាកភ្លើងល្បឿនលឿនកំលាំង 100W តាមរយះរន្ធចម្លង USB-C ដែល Redmi បានធ្វើការអះអាងថា មានសមត្ថភាពសាកថាមពលអោយថ្មពី ០% ទៅ 50% ប្រើពេលតែ 30 នាទី ប៉ុណ្ណោះ។
RedmiBook Pro 15 មានអេក្រង់ទំហំ 15.6 អ៊ីញ ទ្រទ្រង់កម្រិតបង្ហាញរូបភាព-វីដេអូបានដល់ 3.2K ទំហំ 3200×2000px លើផ្ទៃបង្ហាញសរុប 89.1% ធៀបនឹងផ្ទៃអេក្រង់ទាំងមូល ជាមួយកម្រិតបង្ហាញ 178 ដឺក្រេ viewing angle នៅលើខ្នាតអេក្រង់ 16:10 ratio និងមានកម្រិតល្បឿន refresh rate 90Hz។ បន្ទះអេក្រង់របស់ Pro 15 ប្រើប្រាស់បច្ចេកវិទ្យាចាក់ពណ៌កម្រិត 100% sRGB Color gamut ជាមួយមុខងារបាញ់ពន្លឺ DC dimming និងមានកម្រិតភាពច្បាស់ 242ppi។
សម្រាប់តម្លៃលក់ផ្លូវការណ៍របស់ RedmiBook Pro 15 នៅចិនគឺខ្ទង់ប្រហែល $758 សម្រាប់ម៉ូដែលពាក់ Intel-core i5 CPU និងខ្ទង់ប្រហែល $968 សម្រាប់ម៉ូដែលពាក់ Intel-Core i7 CPU។ ហើយបច្ចុប្បន្ន ម៉ាស៊ីនកុំព្យូទ័រយួរដៃស៊េរីថ្មីនេះត្រូវបានដាក់លក់នៅលើគេហទំព័រលក់ទំនិញអនឡាញ JD.com៕