សម្រាប់បច្ចេកវិទ្យាអេក្រង់ថ្មី mini-LED Display ត្រូវបានក្រុមហ៊ុនបច្ចេកវិទ្យាកំពូលៗជាច្រើនត្រៀមប្រើប្រាស់នៅលើឧបករណ៍របស់ពួកគេក្នុងពេលអនាគត។ ហើយនាពេលកន្លងមកក្រុមហ៊ុន Apple ត្រូវបានប្រភពជាច្រើនរាយការណ៍ថាត្រៀមបញ្ចេញឧបករណ៍ iDevices មួយចំនួនរបស់ខ្លួនដែលប្រើប្រាស់បច្ចេកវិទ្យាអេក្រង់ថ្មីនេះនៅចុងឆ្នាំនេះផងដែរ។ យ៉ាងណាមិញសម្រាប់ក្រុមហ៊ុន Xiaomi របស់ចិនវិញទើបតែបានបញ្ចេញកំពូលស្មាតធីវីជំនាន់ថ្មីរបស់ខ្លួនដែលប្រើប្រាស់អេក្រង់ mini-LED Display រួចហើយដែរ កាលពីចុងខែកញ្ញាដែលទើបកន្លងទៅថ្មីនេះ។ ឥលូវនេះដល់វេនរបស់ក្រុមហ៊ុន Dell វិញម្តង។
ក្រុមហ៊ុនផលិតកុំព្យូទ័រម៉ាកល្បីមួយនេះបានប្រកាសចេញនូវម៉ូនីទ័រស៊េរីថ្មីទំហំ 24”,34” ដែលការប្រើរន្ធចម្លងប្រភេទ USB-C និងម៉ូនីទ័រម៉ូដែល P-Series ចំនួន 3 ស៊េរីផ្សេងទៀត។ ជាងនេះទៅទៀតកាលបីថ្ងៃអង្គារម្សិលមិញនេះ Dell ក៏បានប្រកាសចេញនៅម៉ូនីទ័រស៊េរីថ្មីហៅថា “UltraSharp 32 HDR PremierColor Monitor” ឬហៅថា “UP3221Q” ដែលម៉ូនីទ័រថ្មីត្រូវបានក្រុមហ៊ុនប្រាប់អោយដឹងថាគឺជាម៉ូនីទ័រដំបូគេក្នុងលោកដែលបំពាក់បច្ចេកវិទ្យាអេក្រង់ថ្មី mini-LED Backlit Display ដែលមានអំពូលបាញ់ពន្លឺ 2,000 dimming zones ជាមួយបច្ចេកវិទ្យាចាក់ពណ៌ DCI-P3 99.8% និង Adobe RGB Color gamut 93% ក៏ដូចជាទ្រទ្រង់នូវមុខងារ VESA-certified HDR 1000 ជាមួយកម្រិតបង្ហាញចេញដល់ 4K IPS Panel។
បន្ថែមពីនេះវាក៏ភ្ជាប់នូវមុខខងារវ៉ាស់កម្រិតពណ៌របស់ក្រុមហ៊ុន Calman ថែមទៀតផង។ មុខងារសំខាន់មួយទៀតដែលមាននៅលើម៉ូនីទ័រ Dell-UP3221Q គឺ Picture-to-Picture ដែលវាអនុញ្ញាតិអោយអ្នកប្រើប្រាស់អាចភ្ជាប់ម៉ាស៊ីនកុំព្យូទ័រពីរជាមួយវាបានក្នុងពេលតែមួយដើម្បីបង្ហាញរាល់កិច្ចការងារទាំងឡាយដែលមាននៅលើម៉ាស៊ីនកុំព្យូទ័រទាំងពីរនៅលើអេក្រង់តែមួយរបស់វា។
ជាងនេះទៅទៀតវាក៏អនុញ្ញាតិអោយយើងធ្វើការកំនត់កម្រិតពណ៌ (Color Space) ផ្សេងគ្នារវាងម៉ាស៊ីនកុំព្យូទ័រទាំងពីរក្នុងពេលដំណាលគ្នាបានផងដែរ។ Dell-UP3221Q ត្រូវបានក្រុមហ៊ុនប្រកាសដាក់លក់ក្នុងតម្លៃខ្ទង់ $5,000 ហើយវាក៏មានស៊េរីដែលមានតម្លៃដល់ទៅជិត $10,000 ផងដែរ។ ហើយសម្រាប់ម៉ូនីទ័រស៊េរីថ្មីនេះគឺនឹងអាចរកជាវបានចាប់ពីថ្ងៃទី 05 នាខែវិច្ឆិកា, 2020៕