ជាថ្មីម្តងទៀតក្រុមហ៊ុនផលិតគ្រឿងបរិក្ខាអេឡិចត្រូនិចឈ្មោះថា Anker បានប្រកាសចេញនូវឧបករណ៍ផ្ទុកអគ្គិសនីស៊េរីថ្មីម៉ូដែល Anker PowerHouse II 400 ដែលមានលទ្ធភាពអោយអ្នកប្រើប្រាស់អាចសាកឧបករណ៍អេឡិចត្រូនិចបានជាច្រើនប្រភេទតាមតម្រូវការ។ ឧបករណ៍ផ្ទុក អគ្គិសនីស៊េរីថ្មីនេះមានភ្ជាប់នូវរន្ធសាកភ្លើងចេញប្រភេទ AC/DC ដែលអាចសាកបានចាប់ពីស្មាតហ្វូន ថេបប្លែត រហូតដល់ម៉ាស៊ីនស្វានថែមទៀតផង។ Anker PowerHouse II 400 មានសមត្ថភាពផ្ទុកភ្លើងបាន 388Wh ដែលសរុបទៅវាផ្តល់នូវថាមពលបានដល់ទៅជាង 500W ឯណោះ។
នៅលើឧបរណ៍ផ្ទុកភ្លើងស៊េរីថ្មីមួយនេះមានភ្ជាប់មកជាមួយរន្ធ Car Charger, UBS-A និង USB-C សម្រាប់ភ្លើងអោយទូរស័ព្ទ និងថេបប្លែត ហើយរន្ធ USB-C របស់វាអាចសាកភ្លើងចេញបានលឿនជាមួយកំលាំង 60W។ បើតាមការបញ្ជាក់ពី Anker បានអោយដឹងថាឧបករណ៍ PowerHouse II 400 នេះអាចសាកថ្មរបស់ MacBook Air 2020 ពី 0% ទៅ 50% ក្នុងរយះពេល 40 នាទី។ ជាងនេះទៅទៀតជាមួយរន្ធសាកភ្លើងចេញ AC នៅលើវាអាចអោយយើងប្រើជាមួយឆ្នាំងដាំបាយអគ្គិសនី, កន្រ្តៃអគ្គិសនី, ឧបករណ៍បញ្ចាំងរូបភាព (Projector), ទូរទឹកកក និងឧបករណ៍អគ្គិសនីជាច្រើនផ្សេងទៀត។
ហើយអ្វីដែលកាន់តែពិសេសគឺការផ្ទេរចរន្តអគ្គិសនីរបស់វាទៅកាន់គ្រឿងអេឡិចត្រូនិចដែលភ្ជាប់ជាមួយវាគឺមានស្ថេរភាពល្អបំផុតដែលមិនមានចរន្តឡើងចុះៗធ្វើអោយប៉ះពាល់ដល់ឧបករណ៍ដែលដោតសាកជាមួយវានោះឡើយ។ ចំនែកឯការសាកភ្លើងចូលវិញវាប្រើរយះពេល 6.5 ម៉ោងសម្រាប់ការសាកតាមរយះ Wall Charging, 7.5 ម៉ោងតាមរយះ USB-Charging និង 7 ម៉ោងតាមរយះការសាកដោយប្រើថាមពលផ្ទាំងសូឡា (Solar Charging)។ Anker នឹងដាក់លក់ឧបករណ៍ PowerHouse II 400 នៅទីផ្សារប្រទេសចិននៅថ្ងៃទី 21 ក្នុងខែតុលានេះជាមួយតម្លៃខ្ទង់ $389 ហើយវានឹងមានដាក់លក់នៅលើវ៉ិបសាយ Amazon ផងដែរជាមួយតម្លៃខ្ទង់ $355.99៕