បន្ទាប់ពីបានប្រកាសចេញលក់នៅប្រទេសចិនរួចមក នៅពេលនេះ Huawei MateBook 14s ត្រូវបានក្រុមហ៊ុន Huawei រៀបចំបង្ហាញចេញសម្រាប់ទីផ្សារសាកលឆាប់ៗនេះហើយ។ តាមការបញ្ជាក់របស់ Huawei Consumer Business Group បានអោយដឹងថា ម៉ាស៊ីនកុំព្យូទ័រស៊េរីថ្មី Huawei MateBook 14s នឹងបង្ហាញខ្លួននៅប្រទេសអង់គ្លេសជាមួយនិងអេក្រង់ទំហំ 14.1 អ៊ីង។
ក្រុមហ៊ុន Huawei ក៏បានប្រកាសដាក់អោយមានការបញ្ជាទិញទុកមុនផងដែរ ហើយសម្រាប់ការចេញលក់នេះ ក្រុមហ៊ុនបច្ចេកវិទ្យាចិនមួយនេះ ក៏មានបន្ថែមនូវ Accessories ផងដែរ។ MateBook 14s គឺម៉ាស៊ីនថ្មីមួយ ដែលមានការរចនាយ៉ាងពិសេស មានកម្រ៉ាស់ស្តើង និងបំពាក់អេក្រង់កម្រិត 2.5K ដែលជាប្រភេទ Touch FullView Display ខ្នាត 3:2។
Huawei MateBook 14s ត្រូវបានក្រុមហ៊ុនបន្ទះឈីប 11th Gen Intel® Core™ Processor និងមានបន្ថែមនូវបច្ចេកវិទ្យាសម្លេង និងបាសជំនាន់ថ្មី ដែលភ្ជាប់នូវ tweeters និង woofers ដែលជួយអោយសម្លេងកាន់តែមានគុណភាពខ្ពស់ផងដែរ។ MateBook 14s បំពាក់ក្តាចុច ទំហំ 1.5mm។
តាមការបញ្ជាក់របស់ក្រុមហ៊ុន Huawei បានបន្ថែមថា MateBook 14s បំពាក់មកជាមួយថាមពលថ្មទំហំ 60Wh និងមានការគាំទ្រដោយឆ្នាំងសាកដែលមានកម្លាំង 90W ហើយឆ្នាំងសាកនេះ ក៏មានភ្ជាប់នូវមុខងារបច្ចេកវិទ្យាសាកល្បឿនលឿនសម្រាប់សាកទៅលើស្មាតហ្វូន ហើយនឹងថេប្លេតផងដែរ។