Huawei គឺជាក្រុមហ៊ុនយក្សរបស់ប្រទេសចិន ដែលឈរនៅចំណាត់ថ្នាក់លេខរៀងទី 3 ពិភពលោកក្នុងការផ្គត់ផ្គង់ស្មាតហ្វូន ហើយក្រុមហ៊ុននេះ ល្បីល្បាញឈ្មោះមិនមែនដោយសារតែការលក់ស្មាតហ្វូនថ្នាក់ទាបនោះទេ។ ក្រោយពេលដែលក្រុមហ៊ុន Huawei បានព្យាយាមពង្រឹងខ្លួនឯងអោយក្លាយជាក្រុមហ៊ុនមួយថ្មី ដែលមិនផ្តោតទៅលើស្មាតហ្វូនថ្នាក់ទាបតម្លៃថោកនោះ ក្រុមហ៊ុន Huawei ក៏សម្រេចចិត្តបោះបង់ទីផ្សារស្មាតហ្វូនដែលមានតម្លៃថោកសមរម្យនោះចោលទាំងអស់។
ថ្មីៗនេះ លោក Richard Yu បានបញ្ជាក់ថា ប្រាក់ចំណេញរបស់ក្រុមហ៊ុនទៅលើការលក់ស្មាតហ្វូនថ្នាក់ទាបនេះ គឺពិតជាតិចតួចមែនទែន ដែលមានន័យថា គំរូអាជីវកម្មមួយនេះ មិនមាននិរន្តរភាពនោះទេ។ សម្រាប់ការធ្វើដំណើរឆ្ពោះទៅមុខទៀតនោះ ក្រុមហ៊ុន Huawei នឹងផ្តោតតែទៅលើស្មាតហ្វូនថ្នាក់ខ្ពស់ប្រណិតៗ សម្រាប់ដាក់លក់នៅលើទីផ្សារ ពីព្រោះថា នាពេលបច្ចុប្បន្ននេះ វាមានការប្រកួតប្រជែងគ្នាខ្លាំងទៅលើការផលិតផលស្មាតហ្វូនថ្នាក់ខ្ពស់នេះ។
Huawei និងបោះបង់ចោលទីផ្សារថ្នាក់ទាប ព្រោះថា វានៅមានកម្រិតទាបខ្លាំងពេក ហើយវាមិនអាចផ្តល់ប្រាក់ចំណេញគ្រប់គ្រាន់របស់ Huawei មកវិញនោះទេ។ ទីផ្សារអាទិភាពរបស់ Huawei គឺនៅទ្វីបអ៊ឺរ៉ុប និងប្រទេសចិន ហើយនិងប្រទេសជប៉ុន ដែលជាកន្លែងមានសេដ្ឋកិច្ចល្អ ហើយមនុស្សមានលទ្ធភាពប្រើប្រាស់ស្មាតហ្វូនថ្នាក់ខ្ពស់បាន។ ពេលនេះ ក្រុមហ៊ុន Huawei បានព្យាយាមពង្រីកទីផ្សារចូលទៅកាន់ទឹកដីសហរដ្ឋអាមេរិចកាន់តែច្រើន បើទោះបីជាទីផ្សារទាំងនេះ នៅមិនទាន់កំណត់ជាអាទិភាពសម្រាប់ក្រុមហ៊ុន Huawei នៅឡើយក៏ដោយ។ ទោះជាយ៉ាងណាក៏ដោយ គ្រប់ស្មាតហ្វូនទាំងអស់ ដែលក្រុមហ៊ុន Huawei បញ្ចេញនោះ នឹងដាក់លក់នៅក្នុងទឹកដីសហរដ្ឋអាមេរិចផងដែរ ហើយនេះ ក៏មិនមែនជាលើកទីមួយនោះដែរ៕