យោងតាមរបាយការណ៍ប្រព័ន្ធផ្សព្វផ្សាយថ្មីៗនេះ បានឱ្យដឹងថា ការលក់ស្មាតហ្វូនរបស់ក្រុមហ៊ុន Samsung Electronics មានកំណើនល្អបំផុតនៅក្នុងប្រទេសចិននៅក្នុងឆមាសទីមួយនៃឆ្នាំនេះ។ ប្រាក់ចំណូលរបស់ក្រុមហ៊ុន Samsung នៅក្នុងតំបន់ភាគខាងកើតប្រទេស (Far Eastern) មានការកើនឡើងរហូតដល់ 16,86 ពាន់លានដុល្លារអាមេរិចក្នុងរយៈពេល 6 ខែដំបូងក្នុងឆ្នាំ 2017 ពោល គឺកើនឡើង 14 % បើប្រៀបធៀបទៅនឹងរយៈពេលដូចគ្នាកាលពីឆ្នាំមុន ដែលនេះលូតលាស់លឿនបំផុតរបស់ប្រទេសចិន នៅក្នុងត្រីមាសទី 2 នៃឆ្នាំនេះផងដែរ។ សម្រាប់ការលក់ស្មាតហ្វូនរបស់ក្រុមហ៊ុន Samsung នៅសហរដ្ឋអាមេរិកកើនឡើង 9,4 % ខណៈប្រាក់ចំណូលនៅទ្វីបអឺរ៉ុបកើនឡើងដល់ទៅ 8%។ ប្រាក់ចំណូលរបស់ក្រុមហ៊ុនបច្ចេកវិទ្យាយក្សប្រទេសកូរ៉េខាងត្បូង នៅក្នុងបណ្តាប្រទេសអាស៊ីផ្សេងៗទៀត និងអាហ្វ្រិកក៏កើនឡើងប្រហែល 9 % ផងដែរ។ សរុបមក ការលក់ទូទាំងសកលលោករបស់ក្រុមហ៊ុនបច្ចេកវិទ្យា Samsung Electronics ឈានដល់ 86,81 ពាន់លានដុល្លារក្នុងកំឡុងពេលនេះពោលគឺកើនឡើង 9,9 % ពីមួយឆ្នាំទៅមួយឆ្នាំ។
កត្តាសំខាន់នៃភាពជោគជ័យរបស់ក្រុមហ៊ុន Samsung នៅពេលនេះ គឺដោយសារតែតម្រូវការខ្ពស់នៃបន្ទះឈីប និងអេក្រង់ នេះបើយោងតាមអ្នកឃ្លាំមើលជាច្រើន។ ជាងនេះទៅទៀត បន្ទះ ឈីប DRAM និង NAND ផលិតដោយក្រុមហ៊ុន Samsung ត្រូវបានប្រើប្រាស់ដោយក្រុមហ៊ុនផលិតស្មាតហ្វូនជាច្រើន ហើយនាពេលបច្ចុប្បន្ននេះ បន្ទះឈីបដែលភាគច្រើនដែលត្រូវបានប្រើប្រាស់ដោយ OEMs មានប្រភពសំខាន់ៗមកពីក្រុមហ៊ុន 3 គឺក្រុមហ៊ុន SK Hynix, Toshiba និង Samsung ។ ដោយ សារតែតម្រូវការកើនឡើងខ្លាំងក្រុមហ៊ុនបច្ចេកវិទ្យាទាំងបីនេះ ខិតខំប្រឹងប្រែងយ៉ាងខ្លាំងដើម្បីរក្សាទីផ្សារបច្ចុប្បន្ន ហើយនេះ ជាហេតុដែលនាំឱ្យតម្លៃកើនឡើងខ្លាំង។
សូមជំរាបថា រហូតមកដល់ពេលនេះ ក្រុមហ៊ុន Samsung នៅតែផលិតអេក្រង់ OLED Panel សម្រាប់ប្រើប្រាស់នៅលើស្មាតហ្វូន និងថេប្លេតដដែល។ រីឯអេក្រង់ (Super) AMOLED គឺផ្តល់នូវកម្រិត Contrast និងពណ៌ដែលមានលក្ខណៈទូលំទូលាយប្រសើរជាងអេក្រង់ LCD ដែលធ្វើអោយក្រុមហ៊ុននានាបានចាប់អារម្មណ៍ និងបានកុម្ម៉ងយ៉ាងច្រើនផងដែរ ចំណុចនេះហើយ គឺជាហេតុផលសម្រាប់ការពេញនិយមអេក្រង់ប្រភទេនេះក្នុងពេលបច្ចុប្បន្ន។ នៅក្នុងកំឡុងពេលពីរបីខែកន្លងមកនេះ ក្រុមហ៊ុន Samsung ក៏បានផ្គត់ផ្គង់បន្ទះអេក្រង់តូចៗ ដែលមានទំហំមធ្យមដល់ទំហំកណ្តាលទៅកាន់ក្រុមហ៊ុនផលិតស្មាតហ្វូនជាច្រើនដូចជា Huawei, Oppo និង Vivo ផងដែរ។ សរុបមក ក្រុមហ៊ុន Samsung នឹងនៅតែបន្តភាពរឹងមាំរបស់ខ្លួនជានិច្ចសម្រាប់ពេលអនាគត៕