មហិច្ឆិតាជាយូរមកហើយរបស់ក្រុមហ៊ុន Huawei ក្នុងការយកឈ្នះក្រុមហ៊ុនប្រកួតប្រជែង Apple ទៅលើការនាំចេញស្មាតហ្វូនរបស់ខ្លួនពិតជាអាចនឹងកើតឡើងក្នុងពេលឆាប់ៗនេះ លឿនជាងការរំពឹងទុក។ តាមរយៈរបាយការណ៍មួយ ដែលមានប្រភពចេញពីកោះតៃវ៉ាន់ បានបញ្ជាក់ថា ក្រុមហ៊ុន Huawei កំពុងតែនាំមុខក្រុមហ៊ុន Apple អាចនឹងក្លាយជាក្រុមហ៊ុនផលិតស្មាតហ្វូនចំនួនច្រើមចំណាត់ថ្នាក់លេខ 2 នៅលើពិភពលោក សម្រាប់ការនាំចេញស្មាតហ្វូននៅក្នុងត្រីមាសទី 3 នៃឆ្នាំនេះ។ ការកើនឡើងនៃការនាំចេញស្មាតហ្វូនរបស់ក្រុមហ៊ុន Huawei ផ្អែកទៅលើស្មាតហ្វូនត្រកូល M និងត្រកូល P រួមទាំងស្មាតហ្វូនរបស់ក្រុមហ៊ុនបុត្រសម្ព័ន្ធ Honor ដែលកំពុងតែមានការកើនឡើងនៅលើទីផ្សារ។
ក្រុមហ៊ុន Huawei បានបិទបញ្ចប់នូវគម្លាតរបស់ខ្លួនជាមួយក្រុមហ៊ុន Apple ទៅលើកំណើននៃការលក់ដ៏ខ្លាំងក្លានៅក្នុងត្រីមាសទី 2 ក្នុងឆ្នាំ 2017 នេះ ដែលមានការនាំចេញសរុបចំនួន 38.5 លានគ្រឿង ដែលស្មើរនឹងចំណែកទីផ្សារពិភពលោកចំនួន 11.3% នេះបើតាមការបញ្ជាក់របស់ក្រុមហ៊ុន IDC។ ក្រុមហ៊ុន Apple វិញបានបំបែក កំណត់ត្រានៃការលក់បានចំនួន 41 លានគ្រឿង (ចំនែកទីផ្សារបានដល់ទៅ 12%) នៅក្នុងត្រីមាសទី 2 ដែលចំនួននៃការលក់របស់ក្រុមហ៊ុន Apple គឺ លើសការនាំចេញរបស់ក្រុមហ៊ុន Apple ដល់ទៅជាង 2.5 លានគ្រឿង។ ការល់ក្រុមហ៊ុន Huawei នៅក្នុងប្រទេសចិន ត្រូវបានគេរាយការណ៍ថា មានការកើនឡើងដល់ទៅ 22.6% បើធៀបជាមួយនឹងឆ្នាំមុននេះ។
នៅក្នុងកំណត់ត្រានេះ ក្រុមហ៊ុន Huawei បាននាំចេញស្មាតហ្វូនរបស់ខ្លួនបានចំនួន 23.5 លានគ្រឿងនៅក្នុងត្រីមាសទី 2 ឆ្នាំ 2017 ដែលមានចំណែកទីផ្សារដល់ទៅ 21% ។ ផ្ទុយមកវិញ ការនាំចេញរបស់ក្រុមហ៊ុន Apple នៅក្នុងប្រទេសចិន មានការធ្លាក់ចុះចំនួន 7.6% គឺស្មើរនឹង 8 លានគ្រឿង។ នៅក្នុងរយៈពេលដូចគ្នានេះផងដែរ ទីផ្សាររបស់ក្រុមហ៊ុន Huawei នៅក្រៅប្រទេសចិន ក៏មានការកើនឡើងផងដែរចាប់ពីត្រីមាសទី 1 ឆ្នាំ 2017។ កំណើននៃការកើនឡើងមានរហូតដល់ទៅ 45% នៅក្នុងតំបន់អាស៊ីអាគ្នេយ៍ ប្រទេសជប៉ុន និងប្រទេសកូរ៉េ។ នៅក្នុងទី្វបអ៊ឺរ៉ុបវិញ ការនាំចេញរបស់ស្មាតហ្វូនរបស់ក្រុមហ៊ុន Huawei នៅក្នុងឆមាសទី 1 ឆ្នាំ2017 នេះមានការកើនឡើង 8% បើធៀបជាមួយនឹងទិន្នន័យឆ្នាំមុននេះ។ កំណើននៃការកើនឡើងខ្ពស់គឺនៅក្នុងប្រទេសអាឡឺម៉ង់ ប្រទេសហ្វាំងឡង់ និងប្រទេសប៉ូឡូញដែលមានការលក់កើនដល់ទៅទ្វេរដង។
ក្រុមហ៊ុន Huawei បញ្ជាក់រួចមកហើយថា ខ្លួនមានគម្រោងក្នុងការបង្កើនការលក់របស់ខ្លួនសម្រាប់ផ្នែកដែលនៅសល់ក្នុងឆ្នាំនេះ។ ក្រុមហ៊ុនកំណត់នូវផែនការក្នុងការនាំចេញស្មាតហ្វូនចំនួន 40 លានគ្រឿងនៅក្នុងត្រីមាសទី 3 នៃឆ្នាំ 2017 នេះ។ ថ្មីៗនេះ ក្រុមហ៊ុនបច្ចេកវិទ្យាយក្សនេះក៏រៀបគម្រោងផែនការក្នុងការលក់ស្មាតហ្វូនរបស់ខ្លួននៅក្រៅនៅក្នុងទីផ្សារជាច្រើនទៀត។ នៅក្នុងពេលបច្ចុប្បន្នហាងលក់ស្មាតហ្វូនរបស់ក្រុមហ៊ុន Huawei មានចំនួនដល់ទៅ 42000 កន្លែងដែលមានការកើនឡើងចំនួន 19% ខ្ពស់ជាងឆ្នាំមុន។ ការពេញនិយមរបស់ក្រុមហ៊ុន Huawei នៅក្នុងទីផ្សារជាច្រើននេះក្រៅពីប្រទេសចិនគឺមានការកើនឡើង ហើយក្រុមហ៊ុនក៏ព្យាករណ៍អំពីកំណើនខ្ពស់បន្ថែមទៀតក្នុងរយៈពេល 2 ទៅ 3 ឆ្នាំខាងមុខទៀត។
ការនាំចេញរបស់ក្រុមហ៊ុន Apple នៅក្នុងត្រីមាសទី 3 ប្រហែលជាមានការធ្លាក់ចុះបន្តិចពីចំនួននៃការនាំចេញ 41 លានគ្រឿងនៅក្នុងត្រីមាសទី 2 ។ ការព្យាករណ៍នេះផ្អែកទៅលើការរំពឹងទុកថាអ្នកប្រើប្រាស់ជាច្រើនកំពុងតែសម្លឹងត្រៀមក្នុងការបង្ហាញវត្តមានរបស់ទូរស័ព្ទ iPhone 8 នៅក្នុងត្រីមាសទី 4 ។ ក្រុមហ៊ុនបច្ចេកវិទ្យា Huawei នៅតែរំពឹងអំពីកំណើននៃការយកឈ្នះទៅលើការនាំរបស់ក្រុមហ៊ុន Apple នៅក្នុងត្រីមាសទី 3 ប៉ុន្តែក្រុមហ៊ុន Apple អាចនឹងដណ្តើមយកតំណែងនេះ មកវិញបាននៅក្នុងត្រីមាសទី 4 ខាងមុខនេះ៕
