ស្របពេលដែលពិភពលោកកំពុងតែមានការពេញនិយមជាមួយនឹងការរចនារូបរាងស្មាតហ្វូនស៊េរីថ្មីរបស់ខ្លួន ដែលមានស៊ុមព័ទ្ធអេក្រង់ស្តើង ក្រុមហ៊ុន ZOPO ក៏ជាក្រុមហ៊ុនមួយ ដែលបានប្រកាសចេញនូវស្មាតហ្វូនស៊េរីថ្មីរបស់ខ្លួនផងដែរ។ Flash X2 គឺជាស្មាតហ្វូនដែលមានអេក្រង់ធំកម្រិតដល់ទៅ 18:9 Aspect Ratio របស់ ZOPO ដែលគេច្នៃប្រឌិតជាមួយនឹងអេក្រង់ធំ ធៀប តួខ្លួនមានទំហំដល់ទៅ 83% ដែលផ្តល់នូវបទពិសោធន៍អស្ចារ្យគ្មានគូប្រៀបនោះទេ ជាពិសេស គឺមានតម្លៃសមរម្យ ឥលូវនេះ បានបង្ហាញវត្តមានជាផ្លូវការនៅលើទីផ្សារកម្ពុជាហើយ។
អេក្រង់កញ្ចក់ភ្លឺច្បាស់ FHD និងការបន្ថែមមុខងារកាន់តែច្រើនលើប្រព័ន្ធកាមេរ៉ា : ស្មាតហ្វូនស៊េរីថ្មី Flash X2 ភ្ជាប់ជាមួយនឹងអេក្រង់ទំហំ 5.99 អ៊ីញ កម្រិតភាពច្បាស់ FHD + FF កញ្ចក់ IPS 18:9 ដែលទ្រទ្រង់នូវកម្រិតអេក្រង់ 1440 x 720 ភិចសែល (400 ppi) ។ ស្មាតហ្វូនស៊េរីថ្មីនេះមាន 3 ពណ៌សម្រាប់ជ្រើសរើសគឺពណ៌ Coral Blue, Alien Black និង Citrine Gold ដែលពិតជាស៊ីវិល័យស្រស់ស្អាតទាក់ទាញគួរអោយចង់ប្រើប្រាស់ជាទីបំផុត។ បើនិយាយអំពីប្រព័ន្ធកាមេរ៉ាវិញ ស្មាតហ្វូននេះភ្ជាប់ជាមួយនឹងកាមេរ៉ាខាងក្រោយទំហំ 8MP ភ្ជាប់ជាមួយនឹងមុខងារ Auto Focus, IMX 219 និង Aperture f/2.4 ។ ចំនែកកាមេរ៉ាខាងមុខរបស់ស្មាតហ្វូននេះមានទំហំ 5MP ភ្ជាប់ជាមួយនឹងមុខងារ Bokeh Mode, Face Beauty Mode, Mixed Focus, Sensor GC5025, Aperture f/2.2 និងភ្លើង Flash LED ថែមទៀត។
កម្លាំងម៉ាស៊ីនខ្លាំងក្លា: ស្មាតហ្វូនស៊េរីថ្មី Flash X2 ភ្ជាប់ជាមួយនឹងបន្ទះឈីបប្រភេទ MT6737T 64-bit ដែលមានអង្គគណនា Quad-Core ដែលមានល្បឿន 1.5GHz ។ ស្មាតហ្វូននេះភ្ជាប់ជាមួយនឹងរ៉េមទំហំ 2GB DDR3 និងម៉េមូរីក្នុងម៉ាស៊ីនទំហំ 64GB រួមជាមួយនឹងម៉េមូរីប្រភេទ microSD ថែមទៀត។ កាន់តែពិសេសជាងនេះទៀតនោះ ស្មាតហ្វូននេះប្រើប្រាស់នូវប្រព័ន្ធប្រតិ បត្តិការ Android 7.0 Nougat រួមជាមួយនឹងថាមពលថ្មទំហំ 3380mAh ដែលអាចនិយាយបានរយៈពេល 15.5 ម៉ោង និង Standby Time រយៈពេល 310 ម៉ោង។ ស្មាតហ្វូននេះប្រើប្រាស់នូវ Sensors ជាច្រើនដូចជា 3D-G Sensor, Proximity & Light Sensor, E-compass និងប្រព័ន្ធទំនាក់ទំនងដូចជា Bluetooth 4.0, GPS និង Wi-Fi 802.11 a/b/g/n ។
ការរចនារូបរាងដ៏ល្អឥតខ្ចោះ: ក្រឡេកទៅមើលការរចនារូបរាងរបស់ស្មាតហ្វូនស៊េរីថ្មី Flash X2 វាពិតជាស្រស់ស្អាតទាក់ទាញបំផុតប្លែកខុសពីស្មាតហ្វូនជំនាន់មុនៗ។ នៅផ្នែកខាងមុខរបស់ស្មាតហ្វូនស៊េរីថ្មីនេះមានអេក្រង់រាបស្មើទំហំ 5.99 អ៊ីញដ៏ស្រស់ស្អាត។ ផ្នែកខាងលើអេក្រង់គេសង្កេតឃើញមានភ្លើង Flash LED ឧបាល័របំពងសំឡេង សែនស័រ និងកាមេរ៉ាខាងមុខនៅផ្នែកខាងស្តាំ ខណៈដែលផ្នែកខាងក្រោមអេក្រង់មិនមានប៊ូតុងអ្វីនោះទេ។ នៅគែមផ្នែកខាងស្តាំរបស់ស្មាតហ្វូនស៊េរីថ្មីនេះភ្ជាប់ជាមួយនឹងប៊ូតុងចំនួន 3 គឺប៊ូតុងឡើងចុះសំឡេង និងប៊ូតុងបិទបើកទូរស័ព្ទ។
នៅផ្នែកខាងលើរបស់ស្មាតហ្វូននេះ គេសង្កេតឃើញមានរន្ធដោតកាស 3.5mm Jack និងរន្ធសាកបញ្ចូលថាមពលថ្ម។ នៅបាតផ្នែកខាងក្រោម គេសង្កេតឃើញមានឧបាល័របំពងសំឡេង។ នៅផ្នែកខាងក្រោយរបស់ស្មាតហ្វូន Flash X2 គេសង្កេតឃើញមានប្រព័ន្ធកាមេរ៉ាផុសឡើងបន្តិច ភ្លើង LED Flash នៅពីក្រោម និងប្រព័ន្ធស្កែនក្រយ៉ៅដៃដ៏ស្រស់ស្អាត នៅក្រោម Fingerprint Scanner គេសង្កេតឃើញមានតួអក្សរ ZOPO ដ៏ទាក់ទាញ។ កម្រាស់របស់ស្មាតហ្វូនស៊េរីថ្មីនេះគឺមានប្រវែងត្រឹមតែ 3.7mm តែប៉ុណ្ណោះ។ សរុបមក ស្មាតហ្វូនស៊េរីថ្មី Flash X2 ពិតជាមានការរចនារូបរាងស្រស់ស្អាតទាក់ទាញបំផុត ហើយវាបំពាក់នូវមុខងារសំខាន់ៗជាច្រើន ដែលលោកអ្នកអាចប្រើប្រាស់បានតាមតម្រូវការ។ ការរចនាអេក្រង់ភ្លឺច្បាស់ត្រជាក់ភ្នែក ទំហំធំពិតជាល្អឥតខ្ចោះសម្រាប់ការទស្សនា និងការកម្សាន្តគ្មានដែនកំណត់នោះទេ៕
