កាលពីប៉ុន្មានសប្តាហ៍មុននេះ បន្ទាប់ពីការប្រកាសចេញស្មាតហ្វូន Xperia XZ1 នៅក្នុងសហរដ្ឋអាមេរិក នៅថ្ងៃនេះ ក្រុមហ៊ុនបច្ចេកវិទ្យាដ៏ធំរបស់ប្រទេសជប៉ុនមួយនេះ បានចាប់ផ្តើមដាក់លក់ស្មាតហ្វូនដែលមានទំហំតូចជាង និងមានតម្លៃថោកជាងបន្តិចនោះគឺ Xperia XZ1 Compact។ ស្មាតហ្វូននេះ ត្រូវបានក្រុមហ៊ុន ដាក់លក់នៅក្នុងតម្លៃ $599.99 ។
ស្មាតហ្វូននេះ គឺមានទំហំអេក្រង់មិនធំដូចទៅនឹងស្មាតហ្វូន XZ1 នោះទេ គឺមានអេក្រង់ទំហំត្រឹមតែ 4.6 អ៊ីង និងមានកម្រិត 720p ហើយស្មាតហ្វូន Xperia XZ1 Compact នេះ គឺពោរពេញដោយអានុភាពតាមរយៈការប្រើប្រាស់បន្ទះឈីប Qualcomm Snapdragon 835 និងមានរ៉េម ទំហំ 4GB ។ ស្មាតហ្វូន Compact ថ្មីនេះ ថែមបានទាំងភ្ជាប់នូវមុខងារការពារប្រព័ន្ធការពារការជ្រាបទឹក និងធូលីថែមទៀត។ បន្ថែមពិនេះ ក៏មានបំពាក់នូវកាមេរ៉ាខាងក្រោយទំហំ 19MP ភ្ជាប់ជាមួយនឹងមុខងារ Slow-Motion (960 fps) និងបច្ចេកវិទ្យា 3D Creator រួមជាមួយនិងថាមពលថ្មទំហំ 2700mAh ។
ស្មាតហ្វូន Sony Xperia XZ1 Compact ដំណើរការប្រព័ន្ធប្រតិបត្តិការ Android 8 Oreo ហើយវាក្លាយជាស្មាតហ្វូនទីពីរ ដែលបង្ហាញខ្លួននៅសហរដ្ឋអាមេរិកបន្ទាប់ពីស្មាតហ្វូន XZ1។ ស្មាតហ្វូននេះមានទំហំម៉េមូរីក្នុងម៉ាស៊ីន 32GB ប៉ុន្តែលោកអ្នកអាចបន្ថែម microSD បាន។ លោកអ្នកអាចកម្មង់ទិញស្មាតហ្វូន Sony Xperia XZ1 Compact ចេញពី Amazon និង Best Buy ហើយវាមាន 4 ពណ៌សម្រាប់ជ្រើសរើសគឺពណ៌ខ្មៅ ពណ៌ខៀវ ពណ៌ផ្កាឈូក និងពណ៌ទឹកប្រាក់។ ស្មាតហ្វូននេះ នឹងមានការភ្ជាប់ជាមួយនឹងការធានា ហើយវាអាចប្រើប្រាស់នៅលើបណ្តាញ AT&T និង T-Mobile ផងដែរ ប៉ុន្តែមិនមែននៅលើ Verizon, Sprint និង US Cellular នោះទេ៕