បែកធ្លាយចេញនូវខិត្តប័ណ្ណផ្សព្វផ្សាយថ្មីមួយ បញ្ជាក់អំពីលក្ខណៈសម្បត្តិរបស់ស្មាតហ្វូន Huawei Mate 10

យើងធ្លាប់និយាយរួចមកហើយអំពីលក្ខណៈសម្បត្តិរបស់ស្មាតហ្វូន Huawei Mate 10 តាមរយៈរូបភាព Teasers ដែលបែកធ្លាយនៅលើបណ្តាញអ៊ីនធើណិត ខណៈពេលដែលក្រុមហ៊ុនបច្ចេក វិទ្យាចិនមួយនេះ មិនទាន់ទម្លាយព័ត៌មានអ្វីពាក់ព័ន្ធទៅនឹងស្មាតហ្វូនស៊េរីថ្មីនេះ នៅឡើយទេ។ ការប្រើប្រាស់ថាមពលថ្ម 4000mAh និងបន្ទះឈីប Kirin 970 គឺជាលក្ខណៈសម្បត្តិមួយចំនួនក្នុងចំណោមលក្ខណៈសម្បត្តិជាច្រើន ដែលក្រុមហ៊ុនបច្ចេកវិទ្យា Huawei ធ្លាប់ប្រកាសប្រាប់ដើម្បីផ្សព្វផ្សាយអំពីស្មាតហ្វូន Mate 10 របស់ខ្លួននាពេលថ្មីៗនេះ។ 

តាមរយៈរូបភាពប័ណ្ណផ្សព្វផ្សាយមួយបង្ហាញថា ឥឡូវនេះ ក្រុមហ៊ុនបច្ចេកវិទ្យាចិននេះ បានទម្លាយនូវព័ត៌មានកាន់តែច្រើនអំពីលក្ខណៈសម្បត្តិនៃស្មាតហ្វូនHuawei Mate 10 ប៉ុន្តែវាមិនមែនថាយើងមិនធ្លាប់បានដឹងពីមុនមកនោះទេ។ ជាក់ស្តែង នៅក្នុងប័ណ្ណផ្សព្វផ្សាយនេះ ស្មាតហ្វូន Mate 10 នឹងមានអេក្រង់ទំហំធំដល់ទៅ 6.2 អ៊ីង ជាមួយនឹងកម្រិតភាពច្បាស់ 2160 x 1080 ភិចសែល។ ស្មាតហ្វូននេះ ភ្ជាប់ជាមួយនឹងកាមេរ៉ាភ្លោះ 20MP + 23MP ម៉ាក LEICA ថាមពលថ្ម 4000mAh និងបន្ទះឈីបដ៏អស្ចារ្យ Kirin 970 ។ 

នៅក្នុងនោះ ក៏មានពាក្យចចាមអារ៉ាមបន្ថែមទៀតថា ស្មាតហ្វូន Huawei Mate 10 នឹងដាក់លក់នៅក្នុងតម្លៃ $650 នៅក្នុងប្រទេសចិន ខណៈពេលដែលស្មាតហ្វូន Mate 10 Pro នឹងលក់ក្នុងតម្លៃ $835 ។ ទោះជាយ៉ាងណាក៏ដោយ យើងរំពឹងថាស្មាតហ្វូននេះនឹងមានតម្លៃខុសគ្នាតិចតួចប៉ុណ្ណោះសម្រាប់ទីផ្សារជាច្រើនតំបន់ទៀតនៅលើពិភពលោកនោះ៕