ទូរស័ព្ទអេក្រង់អាចបត់បាន ឬហៅថា “Foldable Phone” នៅតែជាប្រធានបទក្តៅក្នុងវិស័យឧស្សាហកម្មស្មាតហ្វូនដែលគ្រប់គ្នាកំពុងតែនិយាយពីវាមិនដាច់។ ក្នុងនោះក្រុមហ៊ុន Samsung និង Lenovo បាននឹងកំពុងផ្តោតយកចិត្តទុកដាក់ក្នុងផលិតស្មាតហ្វូនប្រភេទនេះផងដែរ។ ហើយក្រុមហ៊ុន Lenovo ផ្ទាល់ក៏ធ្លាប់បានបង្ហាញចេញជាផ្លូវការណ៍នូវគំរូស្មាតហ្វូន និងថេបប្លេតដែលអាចបត់អេក្រង់បានម្តងរួចទៅហើយកាលពីដើមឆ្នាំនេះ។
ដោយឡែកសម្រាប់ Samsung វិញមិនទាន់បានបង្ហាញចេញគំរូស្មាតហ្វូនបត់អេក្រង់បានរបស់ខ្លួនជាផ្លូវការណ៍នៅឡើយទេ ប៉ុន្តែជារឿយៗគេតែងតែឃើញមានលេចចេញនូវរូបភាពគំរូរបស់វាជាហូរជាហែរផងដែរ ហើយគេបានព្យាករណ៍ថាវានឹងបង្ហាញវត្តមានលើទីផ្សារជាផ្លូវការណ៍នៅឆ្នាំក្រោយនេះជាក់ជាមិនខាន។ យ៉ាងណាមិញសម្រាប់ក្រុមហ៊ុនផលិតស្មាតហ្វូនរបស់ចិនម៉ាក ZTE វិញហាក់បានត្រៀមខ្លួនផលិតចេញស្មាតហ្វូនអាចបត់អេក្រង់បានដើម្បីវាយលុកទីផ្សារអោយបានមុនក្រុមហ៊ុន Samsung និង Lenovo ទៅទៀតក៏ព្រោះតែស្ងាត់ៗមានលេចចេញស្មាតហ្វូនស៊េរីថ្មីមួយម៉ូដែលនៅលើបណ្តាញតេស្តសមត្ថភាពឧបករណ៍អេឡិចត្រូនិក Geekbench ដែលគេសន្និដ្ឋានថាជាស្មាតហ្វូនអេក្រង់បត់បានម៉ូដែល Axon M។
នៅក្នុងបញ្ជីរបស់ Geekbench បានបង្ហាញចេញនូវគុណសម្បត្តិមួយចំនួននៃស្មាតហ្វូនស៊េរីថ្មីមួយនេះដូចជាវាមានរ៉េមទំហំ 4GB ប្រតិបត្តិការលើបន្ទះឈីប Qualcomm Snapdragon 821 កម្រិតល្បឿន Quad-core ប្រើក្រាហ្វិក Adreno 530 មានអេក្រង់អាចបត់បានដែលមួយមានកម្រិតបង្ហាញ 1080px ហើយបើសរុបផ្ទៃអេក្រង់បង្ហាញទាំងពីបញ្ចូលគ្នានៅពេលលាមានកម្រិតបង្ហាញ 2,160 x 1,920px។ បន្ថែមពីនេះវាក៏នឹងភ្ជាប់នូវទំហំផ្ទុកក្នុងម៉ាស៊ីនស្រាប់ 32GB, មានកាមេរ៉ាក្រោយមួយគ្រាប់ទំហំ 20MP និងមានថ្មខ្នាត 3,120mAh។
ហើយបើតាមការបញ្ជាក់នៅលើបញ្ជីរបស់ស្ថាប័ន FCC បានបញ្ជាក់ថា ZTE Axon M នឹងដំណើរការដោយប្រតិបត្តិការ Android 7.1.2 Nougat ចេញពីប្រអប់នៅពេលវាប្រកាសចេញជាផ្លូវការណ៍។ តាមការរំពឹងទុកទូរស័ព្ទអេក្រង់អាចបត់បាន ZTE Axon M អាចនឹងត្រូវប្រកាសចេញក្នុងព្រឹត្តិការណ៍ប្រចាំឆ្នាំរបស់ក្រុមហ៊ុននាទីក្រុង Brooklyn នៅថ្ងៃទី 17 ខែតុលានេះ។ ដូចនេះចាំមើលតើស្មាតហ្វូនអេក្រង់អាចបត់បានរបស់ ZTE ពិតជាលេចរូបរាងផ្លូវការណ៍ពិតមែនរឺទេ ហើយបើពិតមាននោះតើវាមានអ្វីអស្ចារ្យខ្លះដែរទៅ៕