នៅថ្ងៃនេះ សមាជិកថ្មីមួយទៀតនៃស្មាតហ្វូន Android របស់ក្រុមហ៊ុន HMD Global បានបង្ហាញខ្លួនជាផ្លូវការនៅក្នុងប្រទេសចិននៅថ្ងៃនេះ។ Nokia 7 គឺជាស្មាតហ្វូន Android ដំបូងបំផុតរបស់ក្រុមហ៊ុន HMD Global ដែលប្រើប្រាស់កញ្ចក់អេក្រង់នៅផ្នែកខាងក្រោយដែលជាប្រភេទ 3D Corning Gorilla Glass ។ ស្មាតហ្វូនស៊េរីថ្មីនេះផលិតឡើងពីលោហធាតុអាលុយមីញ៉ូមប្រភេទ 7000 series ជាមួយគែមកោងភ្លឺស្រស់ស្អាតបំផុត។ នៅពេលដែលកាន់ស្មាតហ្វូននេះនៅក្នុងដៃវាពិតជាប្រណិតបំផុត ហើយជាពិសេសស្មាតហ្វូននេះភ្ជាប់ជាមួយនឹងវិញ្ញាបណ្ណបត្រ IP54 ដែលមានន័យថាវាអាចទប់ទល់នឹងធាតុអាកាសខាងក្រៅបានយ៉ាងល្អ។
ស្មាតហ្វូននេះដំណើរការបន្ទះឈីប Qualcomm Snapdragon 630 រ៉េមផ្ទុកទិន្នន័យបណ្តោះអាសន្នទំហំ 4GB/6GB និងម៉េមូរីប្រភេទ microSD បន្ថែមពីលើមេម៉ូរីក្នុងម៉ាស៊ីនទំហំ 64GB ថែមទៀតផង។ ស្មាតហ្វូននេះ មានអេក្រង់ទំហំ 5.2 អ៊ីង ប្រភេទ 1080p IPS LCD ភ្ជាប់ជាមួយកញ្ចក់ប្រភេទ Gorilla Glass 3 ។ កាមេរ៉ាខាងក្រោយរបស់ស្មាតហ្វូននេះគឺទំហំ 16MP ភ្ជាប់ជាមួយនឹង f/1.8 aperture, 1.12um pixels, និងភ្លើង dual-tone LED flash ថែមទៀត។ ចំនែកកាមេរ៉ាមុខ Selfie មានទំហំ 5MP ភ្ជាប់ជាមួយមុខងារ f/2.0 ជាមួយនឹង 1.4um pixels និងអាចលំងាកបានដល់ទៅ 84 ដឺក្រេ។
Nokia ភ្ជាប់ជាមួយនឹងការតភ្ជាប់ជាច្រើនដូចជា Wi-Fi 802.11ac, Bluetooth 5.0, GPS, USB Type-C, 3.5mm headset jack, NFC និង LTE Cat.6 ថែមទៀត។ ប្រព័ន្ធស្កេនក្រយ៉ៅដៃរបស់ស្មាតហ្វូននេះ គឺស្ថិតនៅផ្នែកខាងក្រោយ ចំនែកប្រព័ន្ធប្រតិបត្តិការគឺ Android 7.1.1 Nougat ហើយវាថែមទាំងភ្ជាប់ជាមួយថាមពលថ្ម 3000mAh ទ្រទ្រង់នូវបច្ចេកវិទ្យា 18W Fast Charging ផងដែរ។ស្មាតហ្វូន Nokia 7 ភ្ជាប់ជាមួយនឹងសមត្ថភាពថ្មីនៃការថតរូបរបស់ Zeiss ដែលក្រុមហ៊ុនបច្ចេកវិទ្យា HMD Global ហៅឈ្មោះថា Bothies ដែលមានសមត្ថភាពក្នុងការបែងចែកអេក្រង់សម្រាប់រូបភាព និងវីដេអូតាមរយៈការប្រើប្រាស់កាមេរ៉ាមុខ និងកាមេរ៉ាខាងក្រោយក្នុងពេលជាមួយគ្នាថែមទៀត។ Nokia OZO audio ត្រូវបង្កើតឡើងដើម្បីថតនូវសំឡេងដ៏អស្ចារ្យបំផុត។
ស្មាតហ្វូនស៊េរីថ្មីនេះ មានពណ៌ខ្មៅ Gloss Black និងពណ៌ស Matt White។ស្មាតហ្វូននេះ នឹងដាក់លក់នៅក្នុងប្រទេសចិននៅថ្ងៃទី 24 ខែតុលាខាងមុខនេះនៅក្នុងតម្លៃ CNY 2,499 (ប្រហែល $377 ឬ €320) ជាមួយនឹងរ៉េមផ្ទុកទិន្នន័យទំហំ 4GB និងតម្លៃ CNY 2,699 ($407 ឬ €345) ។ នៅពេលនេះ យើងនៅមិនទាន់ដឹងថា តើស្មាតហ្វូន Nokia 7 នេះនឹងដាក់លក់នៅប្រទេសផ្សេងឬអត់នោះ៕
