Galaxy Note8 គឺជាកំពូលស្មាតហ្វូនស៊េរីថ្មី ដែលបានបំបែកកំណត់ត្រានៃការបញ្ជាកម្មង់ទិញមុន(Pre-Order) ហើយស្មាតហ្វូនស៊េរីថ្មីនេះ ក៏នៅតែបន្តភាពរឹងមាំនៃការលក់របស់ខ្លួនបន្ទាប់ពីការប្រកាសដាក់លក់ជាផ្លូវការហើយក៏ដោយ។ យោងទៅតាមរបាយការណ៍នៃឧស្សាហកម្មនេះ បានឱ្យដឹងថា សម្រាប់ជំនាន់ 64GB គឺលក់ដាច់ខ្លាំងបំផុតនៅក្នុងប្រទេសកូរ៉េខាងត្បូងនៅក្នុងសប្តាហ៍ទីពីរនៃខែតុលានេះ ដែលមានរហូតទៅដល់ 28.3%។ សម្រាប់បើមានកំណែទំហំ 256GB នោះ ចំនួនភាគរយនៃការលក់នឹងមានការកើនឡើងខ្ពស់ជាងនេះ ថែមទៀត។
ក្រុមហ៊ុន ATLAS Research & Consulting បាននិយាយថា សម្រាប់ការកម្មង់ទិញមុនដំបូងរបស់ស្មាតហ្វូននេះ មានចំនួនដល់ទៅ 850,000 គ្រឿង ហើយក្រុមហ៊ុន Samsung នៅតែរក្សាការលក់របស់ខ្លួនចាប់ពី 20,000 គ្រឿងទៅ 30,000 គ្រឿងរបស់ស្មាតហ្វូន Galaxy Note 8 នៅក្នុងសប្តាហ៍ទី 4 នៃខែកញ្ញានេះ។ កាលពីខែតុលា ក្រុមហ៊ុន Samsung នៅតែបន្តការលក់ស្មាតហ្វូននេះ បានចំនួន 10,000 ទៅ 20000 គ្រឿងក្នុងមួយថ្ងៃ ហើយប្រភពខាងក្នុងនៃឧស្សាហកម្មនេះ បានបញ្ជាក់ថែមទៀតថា ចំនួននេះ គឺស្រដៀងគ្នាទៅនឹងឆមាសដំបូងនៅក្នុងឆ្នាំនេះ នៅពេលដែលស្មាតហ្វូន Galaxy S8 ដាក់លក់ជាផ្លូវការនោះ។ ក្រុមហ៊ុន Strategy Analytics ដែលបានតាមដានឧស្សាហកម្មនេះ បាននិយាយថា នៅក្នុងកម្រិតអត្រានេះ ក្រុមហ៊ុនបច្ចេកវិទ្យា Samsung ពិតជាអាចលក់ស្មាតហ្វូននេះបានដល់ទៅ 10 លានគ្រឿងនៅត្រឹមចប់ឆ្នាំ 2017 នេះ៕
