នៅក្នុងទីផ្សារបណ្តាប្រទេសជាច្រើន ត្រូវបានគេរាយការណ៍ថា “ទូរស័ព្ទ OnePlus 5 ពេលនេះ មិនមាននៅក្នុងស្តុកសម្រាប់លក់ទៀតទេ”។ ហើយបច្ចុប្បន្ននេះ បើតាមរបាយការណ៍ថ្មីចុងក្រោយដែលទទួលបាន គឺវាមានតែនៅទីផ្សារប្រទេសឥណ្ឌា ហុងកុង និងចិនដីគោកតែមួយគត់ដែលនៅមានក្នុងស្កុក ប៉ុន្តែមានចំនួនមិនច្រើនប៉ុន្មាននោះទេ។ ពេលនេះជាពេលវេលាមួយដ៏ល្អសម្រាប់ក្រុមហ៊ុន OnePlus បង្ហាញចេញអាវុធថ្មីដើម្បីបំពេញតម្រូវការទីផ្សារនៃអ្នកប្រើប្រាស់។ ហើយអ្វីដែលទន្ទឹងរង់ចាំវាជិតចាប់ផ្តើមហើយដោយពេលនេះ OnePlus បានចែកលិខិតអញ្ជើញសម្រាប់ព្រឹត្តិការណ៍ថ្ងៃទី 05 ខែវិចិ្ឆកាខែក្រោយនេះ ដែលគេសន្និដ្ឋានបានថាជាព្រឹត្តិការណ៍បង្ហាញចេញស្មាតហ្វូនជំនាន់ថ្មីគឺ OnePlus 5T។
កាលបរិច្ឆេទដំបូង គឺជាជំនួយដ៏សំខាន់ដែលបានបញ្ជាក់ច្បាស់ថា OnePlus 5TH សម្រាប់ខែវិច្ឆិកា។ ប្រសិនបើយើងពិនិត្យមើលអោយជិតផ្ទៃរូបភាពយើងនឹងបានឃើញទម្រង់ស្រមោលទូរស័ព្ទដែលមានគែមអេក្រង់ខាងលើស្តើង (Bezel) បើធៀបនឹងម៉ូដែលមុន OnePlus 5។ លើសពីនេះទៅទៀតនៅក្រោមគែមខាងលើគឺបង្ហាញយ៉ាងច្បាស់នូវអក្សរ “T”។ ព្រឹត្តិការណ៍នោះនឹងប្រារព្ធធ្វើឡើងនាមជ្ឈមណ្ឌលកីឡាដ្ឋាន Shenzhen Spring Sports Center ហើយក៏នឹងធ្វើការផ្សាយផ្ទាល់ផងដែរ “livestream”។
OnePlus 5T ត្រូវបានព័ត៌មានចចាមអារ៉ាមនិយាយពីគុណសម្បតិ្តមួយចំនួនរបស់វាផងដែរថាម៉ូដែលជំនាន់ថ្មីនេះនឹងបំពាក់កញ្ចក់អេក្រង់លាតគែមស្តើងទំហំ 6.0 អ៊ីងមានកម្រិត aspect ratio 18:9។ ស្មាតហ្វូននេះក៏នឹងភ្ជាប់នូវបច្ចេកវិទ្យាការពារទឹកកម្រិត IP67, បំពាក់កាមេរ៉ាក្រោយពីរគ្រាប់, មានថ្មធំជាងជំនាន់មុន និងដំណើរការដោយ Android ជំនាន់ចុងក្រោយគឺ 8.0 Oreo ជាដើម៕