ក្រុមហ៊ុន Huawei ទើបតែបានប្រកាសចេញកំពូលស្មាតហ្វូនប្រភេទហ្វាប់ជំនាន់ថ្មីស្រឡាយ Mate 10 កាលពីពាក់កណ្តាលខែតុលាមុនសោះ ស្រាប់តែពេលនេះ ក្រុមហ៊ុនដ៏មានសក្តានុពលក្នុងវិស័យបច្ចេកវិទ្យាផលិតស្មាតហ្វូនលេខបីនៅក្នុងពិភពលោកមួយនេះ្បានត្រៀមបញ្ចេញអាវុធថ្មីមួយទៀតរបស់ខ្លួនក្នុងស្រឡាយ Huawei Honor គឺ Honor V10។ តាមរយះផ្ទាំងរូបភាព teaser ផ្លូវការណ៍មួយដែលបានបង្ហោះនៅលើគណនី Weibo ផ្លូវការណ៍របស់ honor បានអោយបញ្ជាក់ថា Honor V10 នឹងត្រូវប្រកាសចេញនៅថ្ងៃទី 28 នាជិតដំណាច់ខែវិច្ឆិកានេះក្នុងប្រទេសចិនផ្ទាល់ដែលជាដែនដីកំណើតរបស់ Huawei។
Honor V10 ត្រូវបានគេសន្មត់ថា គឺជាស្មាតហ្វូនដែលមានតម្លៃធូរថ្លៃជាង Mate 10 Pro។ V10 នឹងប្រើប្រាស់បន្ទះកញ្ចក់អេក្រង់បង្ហាញលាតទំហំ 6.0 អ៊ីងកម្រិត 18:9 aspect ratio ដូច Mate 10 Pro ដែរ, ហើយក៏ដើរលើបន្ទះឈីប Kirin 970 ដែលមានរ៉េមពីរទំហំ គឺ 6GB/8GB និងបំពាក់ប្រព័ន្ធកាមេរ៉ាភ្លោះនៅលើកាមេរ៉ាក្រោយដែលមានទំហំ 16MP+20MP ប៉ុន្តែគេមិនច្បាស់ថាតើវាប្រើបច្ចេកវិទ្យាកាមេរ៉ារបស់ Leica ឬក៏អត់ទេ។
នាយកប្រតិបត្តិគ្រប់គ្រងលើម៉ាកទូរស័ព្ទ honor បានបញ្ជាក់បន្ថែមថា Honor V10 នឹងត្រូវដំឡើងមកជាមួយប្រតិបត្តិការ Android 8.0 Oreo និងស្រោបដោយផ្ទៃ EMUI8.0 របស់ក្រុមហ៊ុនផ្ទាល់ចេញពីប្រអប់ដូចគ្រួសារ Mate 10 ដែរ ហើយវាក៏បំពាក់នូវថ្មកំលំាង 4,000mAh និងទ្រទ្រង់នូវបច្ចេកវិទ្យាសាកថ្មល្បឿនលឿនបំផុតថែមទៀតផង។ ក្រោយថ្ងៃប្រកាសចេញផ្លូវការណ៍នៅប្រទេសចិន Huawei នឹងពាំនាំ Honor V10 ទៅប្រកាសបង្ហាញនៅទីផ្សារក្នុងទ្វីអឺរ៉ុប នៅថ្ងៃទី 05 ខែធ្នូ ដែលព្រឹតិ្តការនោះ នឹងប្រារព្ធធ្វើឡើងនាទីក្រុងឡុងដ៍ក្នុងចក្រភពអង់គ្លេស។ សម្រាប់តម្លៃរបស់វាវិញត្រូវបានប្រភពបង្ហើបថាខ្ទង់ប្រហែល 3,000 CNY ឬ €383៕
