ពេលនេះ ក្រុមហ៊ុន Xiaomi បានបង្កើតនូវការបោះជំហានមួយទៀត ដើម្បីពង្រីកទីផ្សាររបស់ខ្លួនចេញពីប្រទេសចិន។ ថ្មីៗនេះ ក្រុមហ៊ុនបច្ចេកវិទ្យានេះបានបើកហាង Mi Store របស់ខ្លួននៅក្នុងប្រទេសរុស្សី ដែលដំណើរការ 24 ម៉ោងក្នុងរយៈពេល 7 ថ្ងៃតែម្តង និយាយរួម គឺគ្មានថ្ងៃឈប់សម្រាកនោះទេ។ ថ្ងៃនេះ ក្រុមហ៊ុន Xiaomi បានចាប់ផ្តើមចូលប្រឡូកនៅក្នុងទីផ្សារនៅក្នុងប្រទេសរុស្សីជាមួយនឹងការបង្ហាញវត្តមាននូវស្មាតហ្វូនចំនួន 3 ស៊េរីម៉ូដែលគឺ Mi Mix, Mi Note 2 និង Redmi 4x។ ហើយក្រុមហ៊ុនក៏បានចាប់ផ្តើមរកក្រុមហ៊ុនដៃគូចែកចាយនៅក្នុងប្រទេសរុស្សី តាំងតែពីខែមេសា ហើយក្រុមហ៊ុននេះ ក៏បានចុះកិច្ចព្រមព្រៀងជាមួយដៃគូចែកចាយ RDC ផងដែរ។
ក្រុមហ៊ុន RDC បានធ្វើប្រតិបត្តិការសម្រាប់ក្រុមហ៊ុនចែកចាយបន្ត Mi Authorized Reseller Stores ចំនួន 6 ផ្សេងទៀតនៅក្នុងប្រទេសនេះ ប៉ុន្តែឥឡូវនេះ ក្រុមហ៊ុន Xiaomi ក៏បើកហាងថ្មី Mi Store នៅក្នុងទីក្រុងម៉ូស្គូផងដែរ។ នេះគឺជាលើកទីមួយហើយនៅលើពិភពលោក ដែលហាងថ្មីនេះនឹងបើកប្រតិបត្តិការលក់ 24 ម៉ោងក្នុងមួយថ្ងៃ។ បន្ថែមពីនេះទៀតក្រុមហ៊ុនបច្ចេកវិទ្យា នេះ ក៏បានបង្ហាញវត្តមានរបស់ស្មាតហ្វូន Mi Mix 2 នៅក្នុងទីផ្សារនៃប្រទេសរុស្សីជាមួយនឹងផលិតផលជាច្រើនរបស់ Mi Ecosystem ដូចជា Mi 4K Action Camera, Mi Bedside Lamp និង Mi Smart Weighing Scale។ ស្មាតហ្វូន Mi Mix 2 ដែលមានរ៉េមទំហំ 6GB RAM និងមេម៉ូរីទំហំ 64GB ត្រូវបានក្រុមហ៊ុន ដាក់លក់នៅក្នុងតម្លៃប្រហែលជា $580 ស្របពេលដែល Mi Bedside លក់នៅក្នុងតម្លៃប្រហែល $60 , Xiaomi Action Camera ដាក់លក់នៅក្នុងតម្លៃប្រហែល $150 និង Mi Weighing លក់នៅក្នុងតម្លៃ $41 ៕