ពេលនេះ គឺជាពេលវេលាមួយពិតជាគួរឱ្យអស្ចារ្យមែនទែនសំរាប់ក្រុមហ៊ុន Apple ដែលបានប្រកាស កាត់បន្ថយទៅលើពេលវេលានៃការនាំចេញទូរស័ព្ទ iPhone X ចូលមកក្នុងទីផ្សារនៃសហរដ្ឋ អាមេរិកនោះ។ សំរាប់អតិថិជនជាច្រើន ដែលបានកម្មង់ទិញទូរស័ព្ទនេះ នៅលើ Apple Store គឺនឹងអាចទទួលទូរស័ព្ទស៊េរីថ្មីនេះ នៅក្នុងរយៈពេល 2 ទៅ 3 សប្តាហ៍តែប៉ុណ្ណោះ មានន័យថា ទូរស័ព្ទស៊េរីថ្មីនេះ នឹងបង្ហាញខ្លួននៅដើមខែធ្នូខាងមុខនេះ គឺនៅមុនរដូវវិស្សមកាល ដូច្នេះអតិថិជន នឹងមិនចាំបារម្ភនោះឡើយ។ ថ្ងៃនេះ មាន មានការព្យាករណ៍ថា iPhone X នឹងមានតម្រូវការកើនឡើងនៅក្នុងសហរដ្ឋអាមេរិក ស្របពេលដែលក្រុមហ៊ុន ផ្គត់ផ្គង់បាននិយាយថា សង្វាក់នៃការផលិតកំពុងតែមានការយឺតយ៉ាវ។
ដូចអ្វីដែលលោកអ្នកធ្លាប់បានដឹងហើយ ទូរស័ព្ទ iPhone X ត្រូវបានប្រកាសបង្ហាញខ្លួនរយៈពេល 6 សប្តាហ៍បន្ទាប់ពីទូរស័ព្ទ iPhone 8 និង iPhone 8 Plus បានដាក់លក់នៅលើ Apple Stores ហើយការនាំចេញ ត្រូវបានគេរំពឹងថា នឹងចាប់ផ្តើមនៅក្នុងរយៈពេល 5 ទៅ 6 សប្តាហ៍បន្ទាប់ពីការបង្ហាញនេះ។ អ្នកតាមដាននានា បានបញ្ជាក់ថា ការពន្យារពេលទៅលើការបង្ហាញវត្តមានរបស់ទូរស័ព្ទតម្លៃ $1000 នេះ ទំនងជាបណ្តាលមកពីការរាំងស្ទះទៅលើផលិតកម្មជាច្រើន ដែលពាក់ព័ន្ធទៅនឹងគ្រឿងបន្លាស់ថ្មី នៅក្នុងទូរស័ព្ទដ៏ទាក់ទាញមួយនេះ។
សូមជំរាបថា នេះគឺជាលើកទីពីរហើយ ដែលអ្នកតាមដាននៅក្នុងវិស័យនេះ បានព្យាករណ៍ទៅលើការនាំចេញទូរស័ព្ទ iPhone X ថាវានឹងមានការពន្យាពេលសំរាប់ការនាំចេញមកកាន់ទីផ្សារ។ ស្របពេលជាមួយគ្នានេះ ក្រុមហ៊ុន Apple បានបង្កើតនូវក្តីចាប់អារម្មណ៍មួយ ដោយបានប្រកាសថា ខ្លួននឹងបន្ថយនូវរយៈពេលនៃការរង់ចាំមកត្រឹមសប្តាហ៍ទី 4 នៅក្នុងខែវិច្ឆិកានេះ។ ដែលមានន័យថា ក្រុមហ៊ុន នឹងមានការនាំចេញ iPhoneX ទៅកាន់ទីផ្សារនានា ក្នុងពេលឆាប់ៗនេះ។ ហើយថែមទាំងបានបញ្ជាក់ទៀតថា ការផ្គត់ផ្គង់ នឹងអាចបំពេញតម្រូវការនៅក្នុងប៉ុន្មានខែខាងមុខនេះ។ ហើយការផលិតទូរស័ព្ទ iPhone 8, iPhone 8 Plus និង iPhone X ក៏នឹងមានការកើនឡើងនៅក្នុងត្រីមាសទី 4 ឆ្នាំ 2017 ខាងមុខនេះផងដែរ៕
