ថេប្លេត iPad Pro ស៊េរីថ្មីរបស់ក្រុមហ៊ុនបច្ចេកវិទ្យា Apple នឹងមានការពង្រឹងបន្ថែមទៀតត្រៀមនឹងបង្ហាញខ្លួននៅឆ្នាំក្រោយនេះ។ សម្រាប់យុទ្ធសាស្រ្តរបស់ក្រុមហ៊ុនបច្ចេកវិទ្យា Apple ថេប្លេត iPad ជំនាន់បន្ទាប់នេះនឹងប្រើប្រាស់នូវបន្ទះឈីបដូចគ្នាទៅនឹងទូរស័ព្ទ iPhone X និង iPhone 8 ដែរ។ លក្ខណៈផ្សេងគ្នានោះគឺវាមានការបន្ថែមទៅលើអង្គគណនាចំនួន 2 បន្ថែមទៀតទៅលើបន្ទះឈីប Chipset ដែលនឹងប្រើប្រាស់នៅលើថេប្លេត 2018 iPad Pro ។
កាលពីថ្ងៃពុធកន្លងទៅនេះ គេហទំព័រ MyDrivers របស់ប្រទេសចិន បានទម្លាយព័ត៌មានថា ថេប្លេត iPad Pro របស់ក្រុមហ៊ុន Apple នឹងបំពាក់នូវបន្ទះឈីប Octa-Core Processors ដែលប្រើប្រាស់នូវបច្ចេកវិទ្យា 7nm របស់ក្រុមហ៊ុន TSMC។ ហើយប្រភពនៃក្រុមហ៊ុនចែកចាយជាច្រើន ក៏បានអះអាងថា បន្ទះឈីប Octa-Core Processor នេះមានឈ្មោះថា A11X Bionic chip។ នៅពេលដែលក្រុមហ៊ុន Apple បានបង្ហាញនូវទូរស័ព្ទស៊េរីថ្មីរបស់ខ្លួន និងទូរស័ព្ទ iPhone X នោះ ក្រុមហ៊ុន Apple ក៏បានប្រកាសចេញនូវបន្ទះឈីប A11 Bionic chip ដែលប្រើប្រាស់នូវបច្ចេកវិទ្យា 64-bit ARM-based system on chip (SoC) ផងដែរ។ សម្រាប់បន្ទះឈីប A11 Bionic chip គឺជាប្រភេទ Six-Core Processor ដែលមានអង្គគណនា 2 Cores ប្រភេទ High-Performance និង 4 Cores ប្រភេទ High-Efficiency។ បន្ទះឈីបនេះ នឹងមានល្បឿនលឿនជាង A10 Fusion ដល់ទៅ 25% ។
បន្ទះឈីប A11X Bionic chip ក៏មានការពង្រឹងទៅលើបន្ទះឈីប A11 Chip ថែមទៀត។ ប្រភពពី MacRumors បានទម្លាយថា ក្រុមហ៊ុននេះ ក៏នឹងបន្ថែមនូវអង្គគណនា 2 Cores បន្ថែមទៀតផងដែរ។ ដូចនេះ 2018 iPad Pro នឹងប្រើប្រាស់នូវបន្ទះឈីប Octa-Core ជាមួយនឹងបច្ចេកវិទ្យា 7nm។ បន្ថែមពីនេះទៀត ថេប្លេត 2018 iPad Pro នឹងភ្ជាប់ជាមួយនឹងបច្ចេកវិទ្យា Face ID Facial Recognition System ថែមទៀតផង។ តើអាចទេដែលថេប្លេត iPad Pro ជំនាន់បន្ទាប់នេះ នឹងភ្ជាប់ជាមួយនឹងអេក្រង់ LCD ដដែល ហើយនិងប្រើប្រាស់នូវ Hardware ដូចគ្នាទៅនឹង iPhone X នោះ? បើសិននេះជាការពិតមែននោះ ថេប្លេតនេះ នឹងមានស៊ុមព័ទ្ធអេក្រង់ស្តើងជាមិនខាន៕
