ក្រុមហ៊ុន Oukitel មានគម្រោងក្នុងការដាក់បង្ហាញនូវស្មាតហ្វូនស៊េរិថ្មីមួយទៀត ដែលមានការរចនារូបរាងស្រស់ស្អាត ថ្មីស្រឡាងតែម្តងនៅក្នុងទីផ្សារនោះ គឺម៉ូដែល Oukitel K5។ រហូតមកដល់ពេលនេះ ក្រុមហ៊ុនបច្ចេកវិទ្យាមួយនេះ នៅតែដើរតាមនិន្នាការនៃទីផ្សារបច្ចុប្បន្នគឺការប្រើប្រាស់អេក្រង់ 18:9 Display ហើយនឹងការប្រើប្រាស់ថាមពលថ្មធំ និងតម្លៃសមរម្យថែមទៀតផង។ សម្រាប់ស្មាតហ្វូន Oukitel K5 នឹងក្លាយជាស្មាតហ្វូនដែលប្រកួតប្រជែងនៅលើទីផ្សារសម្រាប់ការលក់នៅក្នុងពេលឆាប់ៗនេះ។
ស្មាតហ្វូន Oukitel K5 មានការរចនារូបរាងយ៉ាងទាន់សម័យជាមួយនឹងទំនើបកម្មនៃបច្ចេកវិទ្យា 3D និងម៉ូតសិប្បកម្មដ៏ស្រស់ស្អាត IML ដែលធ្វើឱ្យស្មាតហ្វូននេះទាក់ទាញ និងស្រស់ឆើតឆាយបំផុត។ ស្មាតហ្វូននេះ ប្រើប្រាស់កញ្ចក់អេក្រង់ 5.7 អ៊ីង កម្រិតភាពច្បាស់ HD+ 18:9 Display ជាមួយនឹងកញ្ចក់ 3D គែមកោងផងដែរ។ កាន់តែពិសេសជាងនេះទៀត ស្មាតហ្វូនេះ មានរូបរាងស្តើង តូចងាយស្រួលកាន់នៅក្នុងដៃយ៉ាងអស្ចារ្យបំផុតតែម្តង។
បន្ថែមពីនេះទៀតនោះ ស្មាតហ្វូន Oukitel K5 ស៊េរីថ្មីនេះ ត្រូវបានភ្ជាប់ជាមួយនឹងថាមពលថ្មទំហំ 4000mAh ដែលអាចប្រើប្រាស់បានរយៈពេលដល់ទៅ 1-2 ថ្ងៃ។ ទន្ទឹមនឹងនេះផងដែរ ស្មាតហ្វូននេះ ក៏មានប្រើប្រាស់នូវកាមេរ៉ាខាងក្រោយជាប្រភេទកាមេរ៉ាភ្លោះ 13MP/2MP និងកាមេរ៉ាមុខទំហំ 5MP ។ ស្មាតហ្វូននេះ ដំណើរការបន្ទះឈីប MT6737T quad-core SoC ជាមួយនឹងរ៉េមទំហំ 2GB និងម៉េមូរីក្នុងម៉ាស៊ីនទំហំ 16GB ។ យោងតាមការបញ្ជាក់របស់ក្រុមហ៊ុនបច្ចេកវិទ្យានេះ បានអោយដឹងថា ស្មាតហ្វូនស៊េរីថ្មីនេះ នឹងមានដាក់លក់នៅក្នុងពេលឆាប់ៗនេះ ប្រហែលជានៅចុងខែនេះ ឬនៅដើមខែធ្នូខាងមុខនេះ។ សម្រាប់ព័ត៌មានបន្ថែម សូមចូលទៅកាន់គេហទំព័ររបស់ក្រុមហ៊ុន http://www.oukitel.com/ ៕
